„კომერსანტი“ გთავაზობთ EKHOKAVKAZA-ს  სტატიის ქართულ ვერსიას, სადაც გამოყენებულია ოკუპირებულ რეგიონში მოქმედი ტოპონიმები და ტერმინები, რომელთაც რედაქცია არ იზიარებს.

აფხაზეთში ბევრი იმედოვნებდა, რომ 2020 წელი კორონავირუსსაც თან გაიყოლებდა, თუმცა, ყველაფერი პირიქით მოხდა  - იანვარის პირველი დღეებში დაინფიცირების შემთხვევათა ნახტომისებრი ზრდა დაფიქსირდა.

დღე-ღამეში დაავადებულთა რაოდენობამ 170-ს გადააჭარბა, რაც ძალიან ბევრია რესპუბლიკისთვის, სადაც 280 000 ადამიანი ცხოვრობს.

თითქმის ერთდროულად კოვიდით აფხაზეთის ხელმძღვანელობის 3 ყველაზე მაღალი რანგის წარმომადგენელი დაავადდა - პრეზიდენტი, პრემიერ-მინისტრი, და პარლამენტის სპიკერი.

პრემიერ-მინისტრის ალექსანდრ ანქვაბის ჯანმთელობის მდგომარეობა საკმაოდ მძიმეა - ის დღესაც მოსკოვის ერთ-ერთ საავადმყოფოში მკურნალობს და ხელოვნური სუნთქვის აპარატთანაა მიერთებული.

ჯანდაცვის მინისტრის თამაზ წახნაკიას თქმით, მდგომარეობა აფხაზეთში მართლაც გართულდა. .

„ნოემბერში ჩვენთან მდგომარეობა მკვეთრად გაუმჯობესდა და ალბათ ამიტომ მოსახლეობამ სიფრთხილე დაკარგა, ყველამ იფიქრა, რომ ეპიდემია დასრულდა. ეს  მდგომარეობის დამძიმების ერთ-ერთი ფაქტორია. გარდა ამის, ზოგადად პანდენია ტალღისებრად ვითარდება, და ეს არა მხოლოდ აფხაზეთს, არამედ მთელს მსოფლიოს ეხება. სწორედ ეს მოხვდა ჩვენთანაც - დეკემბრის ბოლოს დაინფიცირების მაჩვენებელი მკვეთრად გაიზარდა, და ეს პროცესი დღესაც გრძელდება“ - განაცხადა მან.

თუმცა, იმის მიუხედავად, რომ ეპიდემიოლოგიური ვითარება აფხაზეთში საკმაოდ რთულია, ის მსოფლიოში არსებული ტენდენციებისგან დიდად განსხვავებული არაა. მაგალითად, 100 000 ადამიანზე კორონავირუსისგან სიკვდილიანობის თვალსაზრისით აფხაზეთმა რუსეთს გაუსწრო - აფხაზეთში ეს მაჩვენებელი 60 ადამიანს შეადგენს, ხოლო რუსეთში 45-ს.

თუმცა, უარესია მდგომარეობა სომხეთში (100), შტატებში (120), ბრიტანეთში (140), ესპანეთში  - 180.

აფხაზეთში საკმაოდ გავრცელებულია აზრი, თითქოს ინფიცირების ზრდას ხელი იანვრის დასაწყისში რუსი ტურისტების რაოდენობის მკვეთრმა მატებამაც შეუწყო. თუმცა, ტურისტული სექტორის წარმომადგენლები ამ აზრს არ ეთანხმებიან.

საქმე იმაშია, რომ ტურისტების დიდი ნაწილი აფხაზეთი 1-დღიანი ექსკურსიებით, ძირითადად რიწის ტბაზე ჩამოდის, დასახლებულ პუნქტებში არ შედის, და ადგილობრივ მოსახლეობას თითქმის არ ეკონტაქტება.

სამაგიეროდ დიდ პრობლემას წარმოადგენდა საახალწლო ზეიმები, წვეულებები, ქორწილები, და ქელეხები, რომლებიც ყოველგვარი შეზღუდვების და რეგულაციების დაცვის გარეშე ტარდება.

შესაბამისად, ტურისტებზე მეტად ინფიცირების ზრდას ხელს ადგილობრივი ტრადიციები უწყობს.

აფხაზეთში დამოკიდებულება რეგულაციებისადმი მნიშვნელოვნად შეიცვალა - თუ ადრე მათ ყველა აკრიტიკებდა, დღეს უკვე მოსახლეობა აკრძალვებს გაგებით ეკიდება.

მაგალითად, რესპუბლიკაში ოქტომბრიდან სკოლები დაიხურა. ნოემბერში სკოლებში კარანტინის გახანგძლივებამ მშობელთა მწვავე რეაქცია გამოიწვია, თუმცა, იანვარში, როდესაც სკოლების დახურვა 1 თებერვლამდე გაგრძელდა, ამ გადაწყვეტილების კრიტიკა თითქმის არ ისმოდა.

აფხაზეთის მთავარი სანიტარული ექიმის ლუდმილა სკორიკის თქმით,  ამჟამად კარანტინის მოხსნისთვის არავითარი პირობები არ არსებობს.

„როგორც მინიმუმ, ამას ხელს ამინდიც არ იწყობს. ზამთარი ხომ გრიპის სეზონია, და ამ დროს ბავშვების სკოლაში სიარული დაუშვებელია. შეგახსენებთ, რომ დღეს აფხაზეთში აქტიურ დაავადებულებს შორის 50-ზე მეტი ბავშვია“ - განაცხადა მან.

Ekhokavkaza.com

მოამზადა თენგიზ აბლოთიამ