ოკუპირებულ აფხაზეთში კორონავირუსით დაავადებულებისთვის დამატებით 100 ახალ ადგილი შეიქმნება. ასევე იგეგმება ეპიდემიოლოგიურ სამსახურთან მოქმედი ლაბორატორიის შტატების გაფართოება და ახალი აღჭურვილობის შეძენა.
თვითგამოცხადებული პრეზიდენტის ასლან ბჟანიას თქმით, 1 ოქტომბრიდან, 1993 წელს საქართველოსთან ომში გამარჯვების აღნიშვნის შემდეგ, მასობრივი ღონისძიებები შეიზღუდება.
ამ დროისთვის აფხაზეთის თვითაღიარებულ რესპუბლიკაში რუსეთიდან მივლენილი ექიმების 2 ბრიგადა მუშაობს, მთლიანად კი covid19-ით დაავადებულებისთვის ქალაქ გუდაუთაში გამოყოფილ საავადმყოფოში 125 სპეციალისტი მუშაობს.
მთავარმა სანიტარულმა ექიმმა ლიუდმილა სკორიკმა ვირუსის პირველი ტალღა, როდესაც მხოლოდ 38 ადამიანი დაინფიცირდა, მეორე ტალღას შეადარა - დღეს აფხაზეთში 700-ზე მეტი ინფიცირებულია. ის მიიჩნევს, რომ ეპიდემიოლოგიური ვითარება რესპუბლიკაში ძალიან რთულია და აუცილებელია მკაცრი შეზღუდვების დაწესება.
„პირველ რიგში უნდა აიკრძალოს ყველა მასობრივი და გასართობი ღონისძიება, განსაკუთებით კი დახურულ სივრცეში. არ უნდა იყოს ხანგძლივი რიტუალები, მაგალითად, პანაშვიდები, სადაც ადამიანები მასობრივად იკრიბებიან ერთ ადგილას 5-6 დღის მანძილზე. ასევე პირბადეების ტარება აუცილებელი უნდა გახდეს, განსაკუთრებით დაწესებულებებში, სადაც ბევრი ასაკოვანი ადამიანია თავმოყრილი“ - განაცხადა მან.
სკორიკის თქმით, ლაბორატორია, რომელიც კორონავირუსის დადგენაზე მუშაობს, დატვირთვას ვერ უძლებს და აუცილებელია მისი გადაიარაღება და შტატების ზრდა.
„ჩვენ გვჭირდება ლაბორატორიის მეორე ხაზი, რომელიც დღეში მინიმუმ 500 ტესტს ჩაატარებს. ამ დროისთვის ლაბორატორიაში ბევრი ბიოსინჯებია დაგროვილი და ჩვენ ამ რაოდენობას ვერ უმკლავდებით. დღეს ჩვენი მაქსიმუმია 200 ანალიზი დღეში და თუ ამ მაჩვენებელს 500-მდე გავზრდით, ბრძოლა ვირუსის წინააღმდეგ გაცილებით უფრო ეფექტური იქნება“ - მიიჩნევს ლიუდმილა სკორიკი.
პრემიერ-მინისტრის ალექსანდრ ანქვაბის თქმით, დღეს აფხაზეთში ერთ-ერთი სერიოზული პრობლემა კვალიფიციური სპეციალისტების დეფიციტია.
„კადრების იმ რაოდენობით, რომელიც ჩვენ გვყავს, ეპიდემიასთან ბრძოლა საერთოდ შეუძლებელია. შესაბამისად, ჩვენ უნდა ვიზრუნოთ სპეციალისტების მომზადებაზე. მაგრამ ეს გრძელვადიანი პროცესია, კორონავირუსი კი დღესაა. ყველას თხოვნით მივმართავთ - აუცილებლად უნდა ატაროთ პირბადეები. პირველ რიგში ეს იმათ ეხება, ვისაც ბევრ ადამიანებთან უშუალო შეხება აქვს - მედიკოსებს, სამართალდამცავებს, მებაჟეებს, მესაზღვრეებს, და ა.შ. საჯარო მოხელეებმა ხალხს ვირუსთან ბრძოლის მაგალითი უნდა აჩვენონ“ - თვლის ანქვაბი.
თუმცა, მისი თქმით, პანიკის საფუძველი არ არსებობს, რადგანაც ხელისუფლება ეფექტურ ზომებს იღებს და სიტუაცია კონტროლდება.
კორონავირუსის მძლავრმა ტალღამ აფხაზეთში რუსეთთან საზღვრის გახსნისა და რუსი ტურისტების მასობრივი შემოსვლის შემდეგ იფეთქა. საშუალოდ დღეში ინფიცირდება 25-დან 60 ადამიანამდე.
მთლიანობაში არაღიარებულ რესპუბლიკაში კორონავირუსით 726 ადამიანი დაავადდა, 192 პაციენტი განიკურნა, 7 გარდაიცვალა.
მოამზადა თენგიზ აბლოთიამ