ევროპული ბიზნეს ასოციაციის ორგანიზებით 2020 წლის 29 ივლისს ონლაინ საჯარო-კერძო დიალოგი გაიმართა თემაზე: „DCFTA-ის როლი პანდემიასთან გამკლავების პროცესში“.

შეხვედრას ესწრებოდნენ საქართველოში ევროკავშირის დელეგაციისა და ევროპის ქვეყნების დიპლომატიური კორპუსის წარმომადგენლები, საქართველოს პარლამენტის თავმჯდომარის მოადგილე, ეკონომიკისა და მდგრადი განვითარების სამინისტროს, შემოსავლების სამსახურის და სხვა სახელმწიფო ორგანოების წარმომადგენლები, GIZ-ის წარმომადგენლები, ევროპული ბიზნეს ასოციაციის წევრები, სექტორული ასოციაციები და სხვა დაინტერესებული პირები.

საჯარო-კერძო დიალოგი ემყარებოდა აღნიშნულ თემაზე 2020 წლის ივლისში ჩატარებულ კერძო სექტორის კვლევის შედეგებს, რომელიც შეხვედრის მონაწილეებს წარუდგინა პროექტის მთავარმა ექსპერტმა და TBSC Consulting-ს მმართველმა პარტნიორმა თენგიზ ლომიტაშვილმა. შეხვედრის ფარგლებში მონაწილეებმა განიხილეს, თუ რა შეიცვალა პანდემიის შედეგად ევროპასთან ვაჭრობისა და ინვესტიციების კუთხით, რა ახალი შესაძლებლობები გააჩინა DCFTA-მ კერძო სექტორისთვის პანდემიასთან გამკლავების და კონკურენტუნარიანობის ამაღლების მიმართულებით. მონაწილეებმა ასევე განიხილეს ის არსებული და ახალი სირთულეები, რაც ხელს უშლის ქართულ ბიზნესს DCFTA-ს მიერ შემოთავაზებული სარგებლების სრულად ათვისების მიმართულებით.დისკუსიის შედეგად გამოიკვეთა, რომ DCFTA-ს შეუძლია მნიშვნელოვანი როლი ითამაშოს პანდემიასთან გამკლავების კუთხით რამდენიმე მიმართულებით, რისთვისაც საჭიროა ინდივიდუალურ სექტორებზე და ხშირ შემთხვევებში ინდივიდუალურ კომპანიებზე მორგებული სისტემური და კოორდინირებული მიდგომა ყველა დაინტერესებული მხარის ჩართულობით, რათა:

ა) მოხდეს იმ შესაძლებლობების გამოყენება, რაც პანდემიამ წარმოშვა;

ბ) მოხდეს ასევე პანდემიის მიერ წარმოშობილი ახალ გადაუდებელ საჭიროებებზე რეაგირება; გ) ხელი შეეწყოს კერძო სექტორის პოტენციალის რეალიზაციას ტრადიციულად არსებული წინაღობების აღმოფხვრის მიმართულებით რეფორმების გაგრძელებით.

დისკუსიაზე დაყრდნობით ევროპული ბიზნეს ასოციაცია როგორც სახელმწიფოს, ასევე ევროკავშირის ინსტიტუტებს შესთავაზებს რეკომენდაციებს. ღონისძიება ორგანიზებული იყო ევროპული ბიზნეს ასოციაციის მიერ პროექტის „DCFTA-ის როლი პანდემიასთან გამკლავების პროცესში“ ქვეშ. აღნიშნული პროექტი ხორციელდება როგორც საქართველოში, ასევე უკრაინასა და მოლდოვაში აღმოსავლეთ პარტნიორობის საჯარო მმართველობის რეფორმის რეგიონალური ფონდის ფარგლებში, გერმანიის საერთაშორისო თანამშრომლობის საზოგადოების (GIZ) ხელშეწყობით, გერმანიის ეკონომიკური განვითარებისა და თანამშრომლობის ფედერალური სამინისტროს (BMZ) დაკვეთით.