„ცხადია, ასეთ სიტუაციაში, როდესაც მთავრობამ იძულებით შეაჩერა საწარმოები და ბევრი წარმოება, არ შეიძლება იგივე პირობები შეუნარჩუნდეთ მეწარმეებს, რაც აქამდე ჰქონდათ . ძალიან ლოგიკურია, რომ იყოს მიღებული გადაწყვეტილებები, რომელიც ამ ადამიანებს შეუმსუბუქებს ვალდებულებების შესრულებას. საწარმოთა გადახდისუუნარობის შესახებ კანონის დროული ამოქმედება ყველაზე გონივრული იქნება. ამას გარდა, საკმაოდ ფართო სპექტრია გადაწყვეტილებების და გადასაჭრელი პრობლემების.“- ამის შესახებ ეკონომიკურმა ექსპერტმა პაატა შეშელიძემ კომერსანტთან საერთაშორისო სავალუტო ფონდის მისიის ხელმძღვანელის ვერა მარტინის განცხადებაზე კომენტირებისას განაცხადა. როგორც ცნობილია, მარტინმა ხელისუფლებას მოუწოდა, რომ სწრაფად აამოქმედოს საწარმოთა გადახდისუუნარობის შესახებ კანონი.
პაატა შეშელიძე მიიჩნევს, რომ დახურული საწარმოების ამოქმედებას რიგი დამატებითი ღონისძიებები სჭირდება, რათა მათ მოახერხონ დაკარგული დროის და შემოსავლების უმოკლეს ვადაში ანაზღაურება.
რაც შეეხება ვერა მარტინის მტკიცებას, რომ პენსიის ინდექსირების წესის დამტკიცება მოხუცთა სიღარიბეს შეამცირებს და ამისთვის მიზანშეწონილად საბაზისო პენსიის ინდექსირების წესის დამტკიცებას მიიჩნევს, პაატა შეშელიძე აღნიშნავს, რომ გარკვეული უნდა იყოს რა მექანიზმით და პრინციპით მოხდება პენსიის ინდექსირების წესი.
„პენსიის ინდექსირება მიბმულია ეკონომიკის ზრდაზე, თუ ეკონომიკური ზრდა არ იქნება მაშინ შემცირდება? ამ კითხვაზე პასუხი ვერ მოვისმინე. მშპ შეიძლება გაიზარდოს 5 პროცენტით ან შემცირდეს, ანუ ყოველ ჯერზე იმატებს და კლებულობს პენსია? მაშინ მინიმალური რამდენია - ეს გაუგებარია ჩემთვის. უნდა იყოს გარკვეული როგორი მექანიზმით და პრინციპით მოხდება ეს ყველაფერი. ინდექსირების ზრდა უკეთესი ცხოვრების წინაპირობაა, მაგრამ პენსიებს ზრდიან და მერე მონეტარულ პოლიტიკაზე და ინფლაციაზე პასუხისმგებელი არ არიან. რატომღაც ჰქონიათ რომ ეს ყველაფერი ერთმანეთზე მიბმული არ არის. შარშანდელი 200 ლარი დღეანდელი 200 ლარისგან განსხვავებულია. არცერთი მიმართულებით არ უნდა იყოს ხარვეზი, როცა მსგავს გადაწყვეტილებებზე ვსაუბრობთ.“ განმარტავს შეშელიძე.
შეგახსენებთ, პენსიების ინდექსაცია ნიშნავს, რომ პენსიის ზრდა ინფლაციის პარალელურად მოხდება. პენსიის ოდენობა ასევე მიბმული იქნება ქვეყანაში საშუალო ხელფასზე, ეკონომიკურ ზრდასა და სხვა მაკროეკონომიკურ პარამეტრებზე. ფინანსთა სამინისტრო პენსიის ინდექსაციასთან დაკავშირებული საკანონმდებლო ცვლილებების პაკეტის ინიცირებას 2020 წელს, ხოლო მის ამოქმედებას 2021 წლიდან გეგმავს.
მარიამ მორგოშია