„ვაქცინაცია არის ჯერჯერობით ერთადერთი იარაღი, იმისათვის რომ დავასრულოთ შეზღუდვები და ის  დამთრგუნველი ცხოვრების წესი, რაც პანდემიამ მოგვიტანა - ამის შესხებ რადიო „კომერსანტის“ გადაცემაში „კომერსანტის დილა“ ჯანდაცვის ექსპერტმა აკაკი ზოიძემ ისაუბრა.

მისივე განცხადებით, მასობრივი შეკრებები არის განგაშის პირველი ნიშანი იმაზე, რომ საქართველოში კლასტერული გავრცელება იწყება. ზოიძემ აღნიშნა, რომ ახალი შტამის, რომელიც საქართველოში გამოჩნდა კონტროლქვეშ მოქცევა გაცილებით რთულია.

„ჩვენზეა დამოკიდებული რა გაკვეთილი ვისწავლეთ შემოდგომა - ზამთრიდან, როდესაც ზუსტად ასეთი სცენარით ვითარდებოდა ვითარება, ბათუმში 9 ქორწილი იყო ერთ  დღეში და მაშინ აფეთქდა ეპიდემიოლოგიური სიტუაცია, მაშინ პოლიტიკური მოსაზრებების გამო  არ მოხდა  ლოკალური შეზღუდვა და შედეგად მივიღეთ ის რაც მივიღეთ. არჩევნებზე მოვიყვანეთ 2 მილიონი ადამიანი და  გვყავდა 3800 გარდაცვლილი. იმედი მაქვს, რომ ამ გაკვეთილს გავითვალისწინებთ და პირბადის ტარების  მაჩვენებელს 50% -იდან 75%-მდე ავიყვანთ, რადგან ამან შეგვაძლებინა, რომ დაგვესრულებინა მაშინ გამოცხადებული ასეულობით ადამიანის  სიკვდილის  ქრონიკა, თუმცა დღეს უკვე მივეჩვიეთ სიკვდილის  ანონიმურ შემთხვევებს.  

Covid 19 - ით გამოწვეულმა დაღლილობამ ამ ტრაგიზმის განცდის დასრულება გამოიწვია და თითქოს უკვე  მიჩვეულები ვართ, რომ ყოველ დღე ათი მოქალაქე დაიღუპება“, - აღნიშნა აკაკი ზოიძემ.

ზოიძის განცხადებით მნიშვნელოვანია, რომ სახელმწიფომ სტრატეგიული კომუნიკაცია ორივე მიმართულებით დაიწყოს, რაც გულისხმობს რეგულაციების აღსრულებას და ადამიანებისთვის იმის ახსნას, რომ პანდემია არ დასრულებულა და კოვიდი რეალური სიფრთხეა და სახელმწიფოს ერთადერთ გამოსავლად კვლავ მკაცრი ლოქდაუნის დაწესება რჩება, რომელიც წინა ლოქდაუნებთან შედარებით გაცილებით მძიმე ფორმით იქნება, რაც ზოიძის განცხადებით ქვეყნისთვის სრული კატასტროფაა.

აკაკი ზოიძემ ვაქცინაციის ტემპების დაჩქარებაზეც ისაუბრა და აღნიშნა, რომ ვაქცინციასთან დაკავშირებულ ყველა კითხვაზე არსებობს ამომწურავი პასუხები.

„დღეის მდგომარეობით 700 მილიონი ადამიანია აცრილი, გარდა ამისა ჯერ კიდევ ერთი წლის წინ 100 000 - მდე ადამიანი კვლევებში მონაწილეობდა და მათზე დაკვირვება დღემდე გრძელდება და ყველა ეს ადამიანი  დაცულია იმ გართულებებისგან, რომელიც შეიძლება სიკვდილით დასრულდეს. პირველ რიგში ვიცით, რომ ვაქცინა ადამიანებს სიკვდილისგან იცავს.

გარდა ამისა, ერთეული შემთხვევებია, რომ ვაქცინაციას ისეთი გართულება მოჰყვეს, რომ ვაქცინირებული ადამიანი საავადმყოფოში მოხვდეს, ფაიზერის ვაქცინაზე მონაცემებმა უკვე აჩვენა, რომ ის ადამიანს 90% - ით იცავს ან საერთოდ აღარ არის ვირუსის მატარებელი, სხვას არ გადასცემს და მასთანაც სრულიად  უსიმპტომოდ მიმდინარეობს.

ეს ძალიან მნიშვნელოვანი ინფორმაციაა იმისთვის, რომ მას შემდეგ რაც მოსახლეობის 60-70% აიცრება სახელმწიფოებმა შეზღუდვების მოხსნის შესახებ გადაწყვეტილება უფრო თამამად მიიღოს. ვაქცინაცია პანდემიის დასრულების ერთადერთი გზაა, წინააღმდეგ შემთხვევაში მეცხრე და 30-ე ტალღის მოლოდინში ვიქნებით“, - აღნიშნა აკაკი ზოიძემ.

აკაკი ზოიძე აღნიშნავს, რომ ადამიანები ვაქცინციის აუცილებლობაში უნდა დარწმუნდნენ, მთავრობის მხრიდან ყველაზე დიდი შეცდომა არის ის, რომ აქტიური სტრატეგიული კომუნიკაცია, რომელშიც ერთიანი ფაბულით ჩაერთვებოდა საზოგადოების სხვადასხვა ინსტიტუტები ჯერ  არ დაწყებულა. მისივე განცხადებით,  მხოლოდ სარეკლამო რგოლები, ვებ გვერდზე ინფორმაციის განთავსება და რამდენიმე ადამიანის საკუთარი ინიციატივით საჯაროდ აცრა საკმარისი არ არის.

„ჩვენ ვირუსთან ვართ ომში და ამ ომში სტრატეგიული კომუნიკაცია არის ვერტიკალური და ექვემდებარება  ერთიან ძალისხმევას. იგივე თუნდაც როდესაც ვაქცინასთან დაკავშირებით გამოჩნდება მითი, უნდა  დავუპირისპიროთ სანდო წყაროდან შესაბამისი ინფორმაცია და ყველას თავისი და გასაგები ენით უნდ ა ავუხსნათ ვაქცინაციის მნიშვნელობა. ვაქცინის შოვნა და მობილიზება კარგია, მაგრამ ძალიან მნიშვნელოვანია, რომ ეს ვაქცინა თითოეულ ადმიანამდე მივიტანოთ და ამას ვერ გავაკეთებთ თუ სტრატეგიული კომუნიკაცია  არ ვაწარმოეთ.

ისრაელისთვის უკვე დასრულდა პანდემია, ცოტა ხანში დასრულდება ინგლისისთვის და შტატებისთვის და ჩვენ დავრჩებით ბოლოს, პანდემია დასრულდება ჩვენ ირგვლივ და ეპიდემია დარჩება საქართველოში და შემდეგ იზოლირებას გაგვიკეთებს მთელი მსოფლიო როგორც ანტივაქსერულ ქვეყანას“, -  აღნიშნა აკაკი ზოიძემ.

თაკო კვაჭანტირაძე