საქართველოს საგარეო საქმეთა მინისტრი დავით ზალკალიანი აცხადებს, რომ „კოვაქსის“ პლატფორმის მიღმა ვაქცინის ქვეყანაში შემოტანასთან დაკავშირებით მუშაობა მიმდინარეობს. ამის შესახებ მან მთავრობის ადმინისტრაციაში გამართულ ბრიფინგზე განაცხადა.
მისი თქმით, უახლოეს პერიოდში მნიშვნელოვანი ხელშესახები შედეგები გვექნება.
„ძალიან ძნელია კონკრეტულ თარიღებზე საუბარი, რადგან ვითარება არა მხოლოდ საქართველოში, არამედ მთელ მსოფლიოში ძალიან სწრაფად იცვლება. ხედავთ, ევროკავშირში ახალი პრობლემები რომ წარმოიქმნება კომპანიების მხრიდან ვაქცინის მიწოდებასთან დაკავშირებით. რა თქმა უნდა, ჩვენ ველოდებით, რომ ის, რაც უკვე დაკონტრაქტებულია, მივიღოთ „კოვაქსის“ პლატფორმით. ამასთან, მინდა გითხრათ, რომ „კოვაქს“ პლატფორმის მიღმა ვმუშაობთ ორმხრივად ჩვენს პარტნიორებთან და ამ მხრივ მნიშვნელოვანი შედეგი გვაქვს. არ მინდა, გავუსწრო მოვლენებს და მაღალი მოლოდინები შევქმნა, მაგრამ მერწმუნეთ, ჩვენ გვექნება მნიშვნელოვანი ხელშესახები შედეგები უახლოეს პერიოდში ამ მიმართულებით, მხედველობაში მაქვს „კოვაქსის“ პლატფორმის მიღმა საქართველოში ვაქცინის შემოტანა. ინდივიდუალურად ყველა ქვეყანასთან ვმუშაობთ, რომ მათთვის ზედმეტი ვაქცინა მოწოდებული იქნას საქართველოსთვის. იყო სპეკულაციები მალტასთან დაკავშირებით, რომელიც აბსოლუტურად ცრუ ინფორმაცია აღმოჩნდა. იყო ევროკავშირის საგარეო საქმეთა მინისტრების მოწოდება, რომ საქართველოსთან და უკრაინასთან ერთად უფრო აქტიურად იყოს ჩართული ევროკავშირი, რომ რაც შეიძლება ადრეულ ეტაპზე მივიღოთ ვაქცინა. ეს ძალიან დაგვეხმარება და ინდივიდუალური მუშაობა როგორც ევროკავშირის, ასევე არა ევროკავშირის წევრ ქვეყნებთან“, – განაცხადა დავით ზალკალიანმა.
1tv.ge