ამერიკის შეერთებული შტატების განცხადება, ეხებოდა სულ რამდენიმე საათის წინ მომხდარ ამბავს, შესაბამისად, წინა პერიოდში ამ თემაზე ვერ იქნებოდა კომუნიკაცია, - ამის შესახებ ფრაქცია „ქართული ოცნების“ წევრმა დავით სერგეენკომ ნიკა მელიას დაკავების ფაქტზე საერთაშორისო გამოხმაურებებზე საუბრისას განაცხადა.
„აშშ-ის საელჩოს განცხადებაში არის საგულისხმო ფრაზა, რომ ნატოსკენ მიმართულების გზაზე უკან დაიხია საქართველომ, ნატოსკენ მიმავალი გზა ძალიან რთულია, თუმცა ერთად-ერთი სწორი გზაა საქართველოსთვის და ჩვენ სამწუხაროდ გვქონია წინსვლაც და უკან დახევაც. მაგალითად, 2008 წელს. რაც შეეხება ჩვენი საერთაშორისო პარტნიორების პოზიციას, უბრალოდ შეხსენებას გავაკეთებ, რომ უკლებლივ ყველა მათგანი, მოუწოდებდა ოპოზიციას შემოსულიყო პარლამენტში, თუმცა მათი მოწოდება სამწუხაროდ სრულად ყურად არ იყო მიღებული“,- განაცხადა სერგეენკომ.
ამასთან, სერგეენკოს განცხადებით, გამოძიებამ ყველაფერი უნდა გააკეთოს, რომ ნიკა მელიას საქმეს ჩამოსცილდეს პოლიტიკური მდგენელი და მხოლოდ სამართლებრივ ჭრილში იყოს მსჯელობა. „ვფიქრობ ეს საკითხი ამ მიმართულებით უნდა დაიწრიტოს და შემდეგ შეფასებების შეიცვლება“, - აღნიშნა სერგეენკომ.
„ნაციონალური მოძრაობის“ თავმჯდომარე, ნიკა მელია დააკავეს.
ნიკა მელიას ედავებიან ჯგუფური ძალადობის ხელმძღვანელობას და მასში მონაწილეობას. საქმე ეხება 2019 წლის 20 ივნისს პარლამენტის შენობასთან განვითარებულ მოვლენებს. მაშინ აქციაზე ნიკა მელიამ იქ შეკრებილ ადამიანებს მიმართა, რომ მათი ადგილი პარლამენტს გარეთ არ იყო და ისინი პარლამენტის შენობაში უნდა ყოფილიყვნენ. ამის შემდეგ სიტუაცია დაიძაბა და იქ შეკრებილები სამართალდამცველებს დაუპირისპირდნენ.
2019 წლის 27 ივნისის განჩინებით, ნიკა მელიას აღკვეთის სახით 30000-ლარიანი გირაო შეეფარდა, მაშინ პარლამენტმა მას დეპუტატის იმუნიტეტი პირველად მოუხსნა და სასამართლოს განჩინება აღსრულდა. მან პირველ ჯერზე გადაიხადა 30000 ლარი, თუმცა მას შემდეგ რაც, 2020 წლის 1-ელ ნოემბერს პარლამენტთან აქციაზე ელექტრონული სამაჯური დემონსტრაციულად მოიხსნა, გენერალურმა პროკურატურამ კიდევ ერთხელ მიმართა სასამართლოს, რათა ნიკა მელიას გირაოს სახით 100 000 ლარი შეფარდებოდა, თუმცა სასამართლომ 40 000 ლარი განუსაზღვრა, რომელიც მან არ გადაიხადა.
ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა. მეორე დღეს, 18 თებერვალს, გიორგი გახარიამ პრემიერ-მინისტრის თანამდებობა დატოვა. ამასთან დაკავშირებით კი, შინაგან საქმეთა სამინისტრომ მელიას საქმეზე დაგეგმილი ღონისძიება დროებით გადადო.
imedinews.ge