რა თქმა უნდა, ოპოზიციის არყოფნა ნაკლებ მუხტს დატოვებს, მაგრამ ეს არ იქნება დითირამბების მიძღვნა, იქნება კრიტიკული კითხვები, - ამის შესახებ პარლამენტის ვიცე-სპიკერმა, დავით სერგეენკომ განაცხადა, რითაც პარლამენტში მთავრობისათვის ნდობის გამოცხადების საკითხს გამოეხმაურა.

„ჩვენი ქვეყანა, ისევე როგორც მთელი მსოფლიო, ძალიან რთულ პერიოდს გადის და ჩვენ არ გვექნება იმის შესაძლებლობა, რომ ეტიკეტის გამო არ დავსვათ კრიტიკული კითხვები. მე ვფიქრობ, კრიტიკული კითხვები აუცილებლად იქნება - რა მიმართულებით და რა ფორმატით, მე ეს ვნახე მაშინ, როცა რვაჯერ პარლამენტში მამტკიცებდნენ მინისტრად. ჩემთვის კარგად არის ცნობილი ეს ფორმატი. ოპოზიციის არყოფნა, რა თქმა უნდა, ნაკლებ მუხტს დატოვებს ამაში, მაგრამ ეს არ იქნება დითირამბების მიძღვნა, ნამდვილად იქნება კრიტიკული და საქმიანი კითხვები“, - განაცხადა სერგეენკომ.

მან ასევე შეაფასა იუსტიციის მინისტრობის კანდიდატი გოჩა ლორთქიფანიძე და აღნიშნა, რომ მას 2012 წლიდან იცნობს.

„გოჩა ლორთქიფანიძეს წლებია ვიცნობ, ალბათ 2012 წლიდან და მხოლოდ დადებითი წარმოდგენა მაქვს მასზე. თუმცა, ეს, რა თქმა უნდა, არ ნიშნავს, რომ მე საფუძვლიანად ვარ გარკვეული მის ხედვებში. ამის შესაძლებლობა ჩვენ გვექნება უახლოეს დღეებში, როცა მომავალი კაბინეტის წევრები მოვლენ პარლამენტში და საჯაროდ წარმოადგენენ თავიანთ გეგმებსა და ხედვებს“, - განაცხადა სერგეენკომ.

imedinews.ge