პარლამენტის წევრმა და ჯანდაცვის ყოფილმა მინისტრმა დავით სერგეენკომ აცრებისა და პირბადის სწორად ტარების მნიშვნეობაზე ისაუბრა და სიკვდილიანობის შემცირების მიზნის მისაღწევად ისეთი შეზღუდვები დააანონსა, რომლებიც მხოლოდ არავქცინირებულებზე გავრცელდება.

„იქნება მეხუთე, მეშვიდე თუ მეთორმეტე ტალღა, თვლას უბრალოდ აზრი აღარ აქვს. ყველამ უნდა გამოვყოთ ის რესურსი, რაც შეგვიძლია – ქუჩაში ქადაგად დავეცეთ და ყველას ვთხოვოთ, რომ პირბადე ატარონ სწორად და არა ნიკაპზე. ნიღაბი იცავს და რისკებს ამცირებს. რაც შეეხება აცრებს, ძალიან სამწუხაროა, ხანდახან ანტივაქსერები ცნობადი სახეები თუ სამედიცინო სფეროს წარმომადგენლები ხდებიან. არ ვიცი, ეს რატომ ხდება, მაგრამ დამერწმუნეთ, ორ საუკუნეზე მეტია, აცრაზე უკეთესი საშუალება ინფექციური დაავადების წინააღმდეგ არავის არ მოუგონია“ - განაცხადა დავით სერგენკომ.

ჯანდაცვის ექს-მინისტრის თქმით, არავაქცინირებულებისთვის ცალკე დამატებითი შეზღუდვები უნდა დაწესდეს, რათა რაც შეიძლება მეტი ადამიანი აიცრას და მეტი ადამიანის სიცოცხლე გადარჩეს.

„მნიშვნელოვანია არსებული შეზღუდვების განუხრელი აღსრულება და შესრულება. პრობლემის შესარბილებლად ქვაკუთხედი მონიტორინგი და ადეკვატური რეაგირებაა. უკვე ასპარეზზე გამოვა შეზღუდვების ნაწილი, რომელიც განასხვავებს ვაქცინირებულს და არავაქცინირებულს. არავაქცინირებულებისთვის განხორციელდება ის შეზღუდვები სელექტიურად, რაც ყველასთვის მძიმე გადასატანია, მაგრამ ეს არის ის ფასი, რაც უნდა გადავიხადოთ იმაში, რომ ყოველდღიურად ამდენი ადამიანი არ იღუპებოდეს.

სავალდებულო აცრებს მნიშვნელობა მაშინ ექნება, თუ მას შესაბამისი აღსრულება ექნება. მხოლოდ რეგულაციაში ასახული სავალდებულოობა საკმარისად ეფექტური არ იქნება. ახლა უნდა განხორციელდეს სელექტიური შეზღუდვები არავაქცინირებულებზე და რაც არ უნდა დისკრიმინაციილად ჟღერდეს – უპირატესობა ვაქცინირებულს მიენიჭოს. თუ ამან ორ-სამკვირიან პერიოდში შედეგი არ იქონია, საჭირი იქნება ძალიან ხისტი ნაბიჯების გადადგმა პროფესიული ნიშნით და რისკჯგუფების სავალდებულო აცრისთვის“,- განაცხადა დავით სერგეენკომ.

18 ოქტომბრის მდგომარეობით, საქართველოში პანდემიის დაწყებიდან დღემდე სულ ინფიცირების 664 813 შემთხვევა გამოვლინდა, საიდანაც 9510 გარდაიცვალა. მოსახლეობის რაოდენობის გათვალისწინებით ინფიცირების შემთხვევათა რაოდენობის მიხედვით 1 მლნ-დან 167 000 საქართველო მეხუთე ადგილზე იმყოფება. მას მხოლოდ სეიშეილი, მონტენეგრო, ანდორა და ბრიტანეთზე დამოკიდებული ტერიტორია - გიბრალტარი უსწრებს. გარდაცვლილთა რაოდენობის მხრივ კი 1 მლნ-დან 2390-ით მე-13 ადგილზეა. მძიმე ეპიდვითარების პარალელურად მდგომარეობა კატასტროფულია ვაქცინაციის მხრივაც. 18 ოქტომბრის მდგომარეობით მინიმუმ 1 დოზით 1.011 მლნ ადამიანია აცრილი, რაც მოსახლეობის 27.3%-ს შეადგენს, მათგან სრულად ვაქცინირებულთა რაოდენობა 903 ათასს ანუ მოსახლეობის 24.4%-ს შეადგენს. თუ აგვისტოში დღიურად 20 000-ზე მეტი ადამიანი იცრებოდა 17 ოქტომბერს მხოლოდ 2260 აიცრა. სიკვდილიანობის შესამცირებლად კი მოსახლეობის მინიმუმ 60%-ის აცრაა საჭირო. ესპანეთში, პორტუგალიაში, სინგაპურსა და არაბთა გაერთიანებულ საამიროებში უკვე მოსახლეობის 80%-ზე მეტია 2 დოზით ვაქცინირებული.