უწყინარი ჰესები, სადაც საშუალება გვეძლევა, აუცილებლად უნდა აშენდეს და განვითარდეს, რომ რაც შეიძლება მეტი ადგილობრივი რესურსი იქნას გამოყენებული ჩვენს ელექტროენერგიის კალათაში , - ამის შესახებ სემეკის თავმჯდომარემ დავით ნარმანიამ „პალიტრანიუსის“ გადაცემა „რეზიუმეში“ განაცხადა.

მან განმარტება საბჭოთა პერიოდში აშენებულ ჰესებზეც გააკეთა და აღნიშნა, რომ მათ აქვთ ექსპლუატაციის ვადა და დადგენილი მაქსიმალური სიმძლავრე, რომელსაც ეს ჰესები რეაბილიტაციის მიუხედავად ვერ გადააჭარბებენ.

ამასთანავე, ნარმანიამ აღნიშნა, რომ რაც უფრო მეტად განვითარდება ქვეყანა ეკონომიკურად, მით უფრო მეტი იქნება ენერგიაზე მოთხოვნა.

„საბჭოთა პერიოდში აშენებულ ჰესებს აქვთ თავისი ექსპლუატაციის ვადა და აქვთ თავისი მაქსიმალური სიმძლავრე მასზე მეტს ვერ გამოიმუშავებენ, თუმცა იქ, სადაც რემონტები შესაძლებელია, ჩვენ ამას ვითვალისწინებთ და როცა ჰესების ტარიფს ვადგენთ კაპიტალურ ხარჯებს ვითვალისწინებთ, რათა მოხდეს ჰესების შეკეთება და თუ რამე დანაკარგი აქვთ, მეტი გამოიმუშაონ ასეთმა ჰესებმა. მაგალითად, „ენგურჰესი“, რომელიც იანვრიდან აპრილის ბოლომდე გაჩერდება და სერიოზული რეაბილიტაციაა დაგეგმილი, ეს ითვალისწინებს, რომ გვირაბში არსებული დანაკარგები რაც აქვს ამ ჰესს, ეს დანაკარგები აღარ იყოს და ამის შედეგად გამომუშავება გაიზრდება, დაახლოებით, 15%-მდე დანაკარგი რაც აქვს არ იქნება ამ რეაბილიტაციის მერე, მაგრამ მასზე მეტს ხომ ვერ გამოიმუშავებს?! იმიტომ, რომ აქვს თავისი სიმძლავრე. რაც უფრო მეტი ეკონომიკური აქტივობა იქნება, მით უფრო მეტი იქნება ენერგიაზე მოთხოვნა, ზოგადად ევროპაშიც ასეა და ყველა ნორმალურ და განვითარებად ქვეყანაში, რომ რამდენი პროცენტითაც იზრდება ეკონომიკა, იმის ადეკვატურად თითქმის იმდენივე პროცენტით იზრდება ყოველწლიურად ელექტროენერგიაზე მოთხოვნა. ამ თვალსაზრისით, გამონაკლისი ვერც საქართველო ვერ იქნება, ამიტომაც არის მნიშვნელოვანი, რომ ის უწყინარი ჰესები გაკეთდეს. რაღაც ნონსენსური ვითარება გვაქვს - ვამბობთ, რომ ჰესები არ უნდა აშენდეს და მეორე მხრივ, ასევე აპროტესტებენ სოციალურ ქსელებში იმას, რომ რატომ ძვირდება ტარიფი და ეს ასე არ გამოვა“, - განაცხადა ნარმანიამ.

IPN.GE