ევროკავშირი უკრაინაში რეფორმების პროცესის დამუხრუჭებით უკმაყოფილოა, უკრაინა კი თავის მხრივ უკმაყოფილოა ევროკავშირში წევრობის პერსპექტივის არარსებობით. ბრიუსელს და კიევს შორის ურთიერთობებში აშკარა სიცივე იგრძნობა.
ევროპის აუდიტის პალატამ სექტემბრის ბოლოს უკრაინასთან დაკავშირებით დამანგრეველი ანგარიში გამოაქვეყნა.
ევროკავშირი ათწლეულების მანძილზე უკრაინას პოლიტიკურ რეფორმებში და კორუფციასთან ბრძოლაში ყველანაირად ეხმარება, თუმცა, დიდი ძალისხმევის მიუხედავად, ქვეყანაში გაყიდული მაღალჩინოსნების და ოლიგარქების გავლენა ერთი გრამითაც არ შემცირდა.
ბრიუსელის შეფასებით, 2014 წლიდან უკრაინამ ევროკავშირისგან დახმარების სახით 15 მლრდ. ევრო მიიღო. ამით ევროკავშირი იმედოვნებს, რომ თავისი მოკავშირეს სტაბილიზებას და დასავლეთთან მეტად მიბმას მოახერხებს, თუმცა, ქვეყანა ევროგაერთიანებაში შესვლისგან დღეს ისე შორსაა, როგორც არასდროს.
უკრაინის საგარეო საქმეთა მინისტრის დმიტრი კულებას თქმით, პრობლემა ისაა, რომ ევროკავშირს კიევისთვის თუნდაც წევრობის პერსპექტივის დაპირების პოლიტიკური ნება არ გააჩნია.
კიევს და ბრიუსელს შორის ურთიერთობების გაგრილება ვერ დამალა ევროკავშირი-უკრაინის სამიტმაც კიევში, სადაც ქვეყნის პრეზიდენტმა ვლადიმერ ზელენსკიმ, ევროკომისიის თავმჯდომარემ ურსულა ფონ ლიაიდენმა და ევროსაბჭოს თავმჯდომარემ შარლ მიშელმა ბევრი თბილი სიტყვა წარმოთქვეს. ურსულა ფონ ლიაიდენის თქმით, უკრაინა და ევროკავშირი ერთმანეთს სულ უფრო მეტად უახლოვდებიან, თუმცა, კანონის უზენაესობისა და კორუფციასთან ბრძოლის კუთხით, ჯერ კიდევ ბევრი სამუშაოა.
ზელენსკიმ საპასუხოდ კიევის და ბრიუსელის ურთიერთობები ასევე დადებითად შეაფასა, თუმცა, სტუმრებს შეახსენა, რომ „უკრაინა ევროპულ პერსპექტივას იმსახურებს“.
ევროკავშირის ლიდერებმა და ვლადიმერ ზელენსკიმ ხელი რამდენიმე შეთანხმებას მოაწერეს, მათ შორის, უკრაინის ევროპის საჰაერო სივრცეში ინტეგრაციის თაობაზე. ენერგეტიკის საკითხებში კი სტუმრებმა უკრაინას შეუზღუდავ დახმარებს შეჰპირდნენ.
რუსეთთან დაძაბული ურთიერთობების გამო უკრაინა თავის მეზობლისგან უშუალოდ და პირდაპირ გაზს არ ყიდულობს. ძირითადად, ბუნებრივი აირი უკრაინაში, შუამავლების მეშვეობით, სლოვაკეთიდან მოდის.
კიევი ძალიან უკმაყოფილოა გაზსადენ „ჩრდილოეთ ნაკად 2-ის" მშენებლობით, რომელიც მაინც და მაინც არ შეესაბამება კიევის მიმართ სოლიდარობას, რომელზეც ევროკავშირის ლიდერები მუდმივად საუბრობენ.
კიევს ასევე ევროპის იმედი აქვს აღმოსავლეთ უკრაინაში რუსეთთან ჰიბრიდულ ომში, თუმცა, არ მალავს, რომ ნატოში და ევროკავშირში წევრობის ნათელი და პროგნოზირებადი პერსპექტივა იქნებოდა ამ კუთხით ყველაზე სერიოზული დახმარება. ოფიციალური კისევის აზრით, სწორედ ესაა ის, რასაც ევროპა უკრაინას ვერ სთავაზობს.
ავტორი თენგიზ აბლოთია