დარგობრივი ეკონომიკისა და ეკონომიკური პოლიტიკის კომიტეტმა „საქართველოს ტყის კოდექსში ცვლილების შეტანის შესახებ“ კანონპროექტი და მისგან გამომდინარე თერთმეტ საკანონმდებლო აქტში შესატანი ცვლილებების პროექტები პირველი მოსმენით განიხილა და მხარი დაუჭირა. ინფორმაციას პარლამენტის პრესსამსახური ავრცელებს.
საკანონმდებლო ინიციატივა ეკუთვნის პარლამენტის წევრებს მაია ბითაძეს, ხატია წილოსანს, გოგი მეშველიანს, ნინო ლაცაბიძეს, ირაკლი ზარქუას, ალექსანდრე დალაქიშვილს, ედიშერ თოლორაიას, ირაკლი ხახუბიას, ნოდარ ტურძელაძესა და დავით კაჭარავას.
გარემოს დაცვისა და ბუნებრივი რესურსების კომიტეტის თავმჯდომარის მაია ბითაძის განცხადებით, ტყის კოდექსის ამოქმედების შემდეგ, რომელიც ძალაში 2021 წლის პირველ იანვარს შევიდა, გამოიკვეთა გარკვეული მიმართულებები, რომლებიც დახვეწას და სხვა საკანონმდებლო აქტებთან ჰარმონიზაციას საჭიროებდა. მომხსენებლის განცხადებით საკანონმდებლო ინიციატივა სწორედ ამ მიზნით მომზადდა.
„პირველი რიგის ცვლილებები, რომლებიც საკანონმდებლო პაკეტში შედის, ეს არის ცვლილებები დაკავშირებული ტერმინთა განმარტებასთან. უფრო დეტალურად განიმარტება გარკვეული ტერმინები, მათ შორის, ხე-ტყის დამზადება, ფიჩხისა და ბოძის განმარტებები და ა. შ. ასევე აღნიშნული ტყის კოდექსის ჰარმონიზაცია ხდება დაცული ტერიტორიების სისტემის კანონთან. მნიშვნელოვანი ცვლილებები შედის ინსტიტუციონალური თვალსაზრისითაც“, - განაცხადა მაია ბითაძემ.
მისივე თქმით, წამოჭრილი პრობლემები არ უკავშირდება კოდექსის მიღების დროს გაცხადებული და დამტკიცებული პრინციპების აღსრულებას და კანონში გარკვეული ცვლილებების შეტანა არ ცვლის სატყეო რეფორმის მთავარ მიმართულებებსა და პრინციპულ საკითხებს.