დარჩება თუ არა შენგენის ზონაში თავისუფალი გადაადგილების აკრძალვა ცუდ მოგონებად? ევროკომისიას ეს ძალიან სურს. 4-მა ქვეყანამ - საფრანგეთმა, გერმანიამ, ავსტრიამ და შვეიცარიამ - ამ მიმართულებით მოძრაობა უკვე დაიწყო. კერძოდ 13 მაისს მათ წინასწარ შეთანხმებას მიაღწიეს - თუ ეპიდემიოლოგიური ვითარება მკვეთრად არ გაუარესდა, 15 ივნისიდან ამ ქვეყნებს შორის საზღვრები გაიხსნება.
პარალელურად, 15 მაისიდან თავისუფალი გადაადგილება ბალტიის 3 ქვეყანას შორის აღდგა - მათ ეს გადაწყვეტილება ჯერ კიდევ 5 მაისს მიიღეს.
თუმცა, ევროკომისია არ ჩქარობს - ბრიუსელში საზღვრების გახსნის 3-ეტაპიანი გეგმა დაამუშავეს, რომელიც კონკრეტულ ვადებთან მიბმული არაა. ეს სტრატეგია ზუსტ კრიტერიუმებს, ეპიდემიოლოგიურ სიტუაციას და ქვეყნებში საავადმყოფოებში საწოლ ადგილების რაოდენობას ეყრდნობა.
პირველ ეტაპზე ევროკავშირის ქვეყნები მიმდინარე კონტროლს, განსაკუთებით, მოსაზღვრე რეგიონებში, შეარბილებენ. შემდეგ ისინი საზღვრების გახსნას შეძლებენ, ისევე როგორც ეს 4-მა ხსენებულმა ქვეყანამ გააკეთა.
მე-3 ეტაპზე ევროკავშირში გადაადგილების ყოველგვარი აკრძალვები მოიხსნება, საავტომობილო მოძრაობა აღდგება, აეროპორტები ამუშავდება.
სავარაუდოდ, ეს ყველაფერი უახლოეს თვეებში მოხდება, თუმცა, ამის გარანტია არ არსებობს.
თუმცა, ევროკომისიის სტრატეგიას ბევრი წყალქვეშა დინებები აქვს - ისეთები, როგორც, მაგალითად, დისკრიმინაცია.
კერძოდ, თუ ბრიუსელი რომელიმე ქვეყანას ან რეგიონს ეპიდემიოლოგიური თვალსაზრისით არასაკმარისად უსაფრთხოდ ჩათვლის, ის საზღვრების დახურვის შესაძლებლობას იტოვებს. მაგალითად, შვეიცარია და ავსტრია საზღვრების გახსნას იტალიასთან ჯერ არ გეგმავენ.
საფრანგეთიც იტალიელების და ესპანელებისთვის ჩაკეტილი დარჩება, თანაც ქვეყანაში ჩამომსვლელებს 2-კვირიანი კარანტინის გავლა მოუწევთ.
ასეთი სანიტარული დისკრიმინაცია რისკ-ჯგუფში შემავალ ქვეყნებში სიტუაციის გაუმჯობესებამდე შენარჩუნდება.
სხვა, უფრო მძიმე და გაუმართლებელი დისკრიმინაციის შემთხვევებიც არის - კერძოდ, ავსტრია გერმანიასთან საზღვრებს გახსნის, თუმცა, არა ჩეხეთთან, სადაც ეპიდემიოლოგიური მდგომარეობა უარესი არაფრით არაა.
ევროკომისია ასეთი პრაქტიკის მიუღებლობაზე საუბრობს - საზღვრების გახსნის დროს ადამიანების ეროვნებებად დაყოფა დაუშვებელია.
„გასაგებია, როდესაც ქვეყნებთან, სადაც დაინფიცირების რისკი ჯერაც მაღალია, ჩაკეტილობა შესაძლოა შენარჩუნდეს. ამას რაღაცა გამართლება მაინც აქვს. თუმცა, დაუშვებელია ვიზიტორების ეროვნების მიხევდით გაყოფა, თითქოს რესტორანში კერძებს ვირჩევთ“ - მიიჩნევს გერმანელი ევროდეპუტატი ანდრეს შვაბი.
შენგენის ზონა
