„მარტის თვეში პროდუქციის რეალიზაცია გაცილებით ნაკლები იქნება, ვიდრე დაგეგმილი გვქონდა. თუმცა,ამ თვის ხელფასების კუთხით, არცერთი ჩვენი თანამშრომელი არ დაზარალდება.“ - კომპანია „დიო“-ს თანადამფუძნებელი და აღმასრულებელი დირექტორი თამაზ დაუშვილი „კომერსანტთან“ საუბრისას აღნიშნავს, რომ მომხმარებელთა აქტივობა მკვეთრადაა შემცირებული, შესაბამისად, კომპანია თანამშრომლების შენარჩუნების გეგმის შემუშავებას ცდილობს.
კორონავირუსის გავრცელებისა და მსოფლიო ჯანდაცვის ორგანიზაციის რეკომენდაციების გათვალისწინებით, სხვა კომპანიებთან ერთად ,,დიო’’-მ კომპანიის ოფისებსა და შოურუმებში სადეზინფექციო ღონისძებები განახორციელა, თანამშრომლები კი სპეციალური აღჭურვილობით ემსახურებიან მომხმარებელს.
თუმცა, თამაზ დაუშვილის თქმით, ვირუსის შეჩერების მცდელობას მომხმარებლის აქტივობის შემცირება ახლავს, მაშინ ოპერირება ბაზარზე რთულდება და აპრილის თვეში უცნობია რა რეალობის წინაშე აღმოჩნდება ბიზნესსექტორი.
„ასეთი კრიზისისთვის არავინ იყო მზად. ჩვენ ყველაფერი გავაკეთეთ იმისთვის, რომ ფუნქციონირება გაგვეგრძელებინა, ჩვენ განვახორციელეთ ყველა ღონისძიება უსაფრთხოების კუთხით - იქნებოდა ეს ოფისების დეზინფექცია თუ თანამშრომლების აღჭურვა ყველა საჭირო საშუალებებით. მზად ვიყავით, რომ ყველა რეკომენდაციის გათვალისწინებით გვემუშავა, მაგრამ რაც უფრო იმატებს შეზღუდვები საქმიანობაში, მით უფრო ძნელდება ოპერირება, შესაბამისად მომხმარებლის აქტივობაც მცირდება. ჩვენი მთავარი ამოცანა იყო გაგვეგრძელებინა მუშაობა ისე, რომ დაგვეცვა თანამშრომლები, კომპანია, ოჯახის წევრები და საზოგადოება. ახლა ჩვენი კომპანია ნაწილობრივ დისტანციური რეჟიმით მუშაობს, თანამშრომლები მორიგეობით დადიან, შემოსავლები შემცირდა.
რაც შეეხება შემდეგ თვეს, გვაქვს სურვილი, რომ გავაგრძელოთ მუშაობა, რადგან ჩვენი კომპანია არ მოექცა იმ სექტორების რიცხვში, რომელთაც ეკრძალებათ ბიზნესის წარმოება. შემდეგი თვის ხელფასებს რაც შეეხება, ეს დამოკიდებულია იმაზე, თუ როგორ განვითარდება მოვლენები. თუ მომხმარებელმა აქტივობა შეწყვიტა, უკვე სხვა რეალობა გვესახება. ხოლო თუ ფუნქციონირება შევძელით, შვეცდებით შევინარჩუნოთ თანამშრომლების მაქსიმალური რაოდენობა, რათა მათ მიიღონ გარანტირებული შემოსავალი.
მე მინდა მოვუწოდო ყველას იაქტიურონ იმიტომ, რომ თუ ვეცდებით რომ ხელები არ ჩამოვყაროთ და გავითვალისწინოთ რეკომენდაციები ვფიქრობ, რომ შევძლებთ გავაგრძელოთ ოპერირება ისე, რომ ბიზნესი სრულად არ გაჩერდეს. “ - აღნიშნა კომპანია „დიო“ს დამფუძნებელმა.
მისი ინფორმაციით, კომპანია „დიოს“ საინვესტიციო გეგმები დროებით გადაიდო. საუბარია, გაფართოებული საწარმოების დასრულებაზე თბილისსა და ქუთაისში და ახალი სეზონის მოლოდინზე.
„რამდენიმე ინვესტიცია უკვე განვახორციელეთ, ავაშენეთ ახალი საწარმო და ველოდებოდით ახალ სეზონის დაწყებას, ქუთაისსა და თბილისში საწარმოების ოფიციალურ გახსნას ვგეგმავდით, ეს ყველაფერი ჯერჯერობით შეჩერდა. ამასობაში იმედი გვაქვს, რომ ბანკებთან ერთად კოორდინირებულად შევძლებთ გამოვიდეთ ამ კრიზისიდან, რადგან ეს ინვესტიციები ბანკებთნ ერთად განხორციელდა და ერთერთი მთავარი გამოწვევაა ბანკის კრედიტის გადახდა.“ - განმარტა თამაზ დაუშვილმა.
მარიამ მორგოშია