საგანგებო მდგომარეობის მიუხედავად ინფრასტრუქტურული პროექტების განხორციელება საქართველოში ამ დრომდე გრძელდება, ქვეყნის ეკონომიკა სრულად, რომ არ გაჩერდეს საქართველოს მთავრობის გადაწყვეტილებით ქვეყანაში ინფრასტრუქტურული პროექტების და მშენებლობების განხორციელება ნებადართულია.

„კომერსანტი“ დაინტერესდა ქვეყანაში შექმნილი რთული მდგომარეობაში როგორ მიმდინარეობს ინფრასტრუქტურული სამუშაოები, აგრძელებენ თუ არა კომპანიები მუშაობას და რა გავლენას მოახდენს მათ საქმიანობაზე ეროვნული კურსის გაუფასურება?

გაუფასურებულმა ლარმა მნიშვნელოვანი პრობლემები უკვე შეუქმნა შპს „გრინსერვისი +“-ს. როგორც კომპანიის დირექტორი ლაშა ფურცხვანიძე აცხადებს, კომპანიამ  მიმწოდებლებისგან გაძვირებული პროდუქტი უკვე შეისყიდა. შპს „გრინსერვისი +“- ის დირექტორი მიიჩნევს, რომ სიტუაციის დასტაბილურების მიზნით ეროვნულმა ბანკმა ქმედითი ნაბიჯები უნდა გადადგას.

„ჯერჯერობით მუშაობას ვაგრძელებთ, მაგრამ ქვეყანაში შექმნილი მძიმე მდგომარეობა გავლენას არა მარტო ჩვენზე, ყველაზე მოახდენს. გაუფასურებული ეროვნული ვალუტის გამო დაიწყო საუბარი იმის შესახებ, რომ შეიძლება რაღაც კორექტირება მოხდეს. ჩვენ დამოკიდებულები ვართ მომწოდებლებზე, რომლებიც ასევე დამოუკიდებლები არიან ვალუტის კურსზე, მაგალითად, ქვა, რომელსაც ვყიდულობთ უკვე საკმაოდ გაგვიძვირეს.გრძელვადიან პერიოდში კომპანიას ალბათ მნიშვნელოვანი ზარალი მიადგება, თუმცა, მუშაობას ყველა ვარიანტში ვაგრძელებთ, პირველად არ ხდება, როდესაც ეროვნული ვალუტა მნიშვნელოვნად უფასურდება, იმედია სახელმწიფო მიიღებს რაღაც ზომებს ამ საკითხთან მიმართებაში. სურვილი მექნება, რომ ეროვნულმა ბანკმა ამ მიმართულებით მუშაობა დაიწყოს, თუმცა, ჩემი აზრით, პროცესებში დიდი ხნის წინ უნდა ჩარეულიყო“, - განაცხადა ლაშა ფურცხვანიძემ.

მუშაობას შეფერხებით აგრძელებს „შპს სკინჩი“. დაკეტილი საზღვრები, გაუფასურებული ლარი და მიმწოდებლების მხრიდან მოთხოვნილი ნაღდი ფული, ეს იმ გამოწვევების მცირე ჩამონათვალია, რომელის წინაშეც დღეს კომპანია დგას. „შპს სკინჩი“-ში აცხადებენ, რომ თუ ქვეყნაში სიტუაცია გაუარესდა კომპანია მუშაობას გააჩერებს. როგორც კომპანიის წარმომადგენელი „კომერსანტთან“ საუბარში აცხადებს, ზარალი, რომელიც შეიძლება კომპანიას მიადგეს, ლარის კურის ცვლილების პროპორციული იქნება.    

„ჩვენს მუშაობას აფერხებს ის, რომ ბიტუმის შემოსვლა ქვეყანაში გართულდა. შემოდის ირანის ნაცვლად აზერბაიჯანიდან, რომელიც ძვირია და იმდენად ხარისხიანი არ არის რამდენადაც ირანული. კიდევ ერთ პრობლემა, რომელიც შეგვექმნა არის ის, რომ მომწოდებლები, რომლებიც მასალს  კონსიგნაციით გვატანდნენ, ახლა  ნაღდ ფულს ითხოვენ, შექმნილი სიტუაციის ყველას ეშინია. სრულად ნაღდ ფულზე მუშაობა საგზაო სექტორში ძალიან დიდი რესურსს მოითხოვს.

ახლა 8 ტენდერზე ვმუშაობთ, რამდენიმე ობიექტზე მუშაობას მას შემდეგ დავიწყებთ, რაც სახელმწიფო უწყებიდან თანხა ჩაგვერიცხება, სახელმწიფო ხაზინა აჩერებს ფულს თუ რა ხდება ზუსტად ვერ გეტყვით, თუმცა, ვადები ჯერ კიდევ აქვს. აღსანიშნავია ისიც, რომ თანამშრომლების მესამედი არ გვყავს, ვინც სურვილი გამოთქვა, რომ შექმნილი სიტუაციიდან გამომდინარე ვერ იმუშავებდნენ დავასვენეთ. ასევე მძიმედ აისახება ეროვნული ვალუტის გაუფასურება. ჩვენი ანტიკრიზისული გეგმა მდგომარეობს იმაში, რომ თუ სიტუაცია გაუარესდა მუშაობას გავაჩერებთ, გაჩერებაც თავისთავად ზარალს ნიშნავს, თუ არ მუშაობ კომპანიას ხარჯები მაინც აქვს“, - განაცხადეს კომპანიაში.

ბაჩო ადამია