„უკრაინის რკინიგზის“ სამმართველოს წევრმა, კომერციულმა და ლოგისტიკურმა დირექტორმა ირაკლი ეზუგბაიამ თანამდებობა დატოვა - ამის შესახებ მან 11 მარტს პრესკონფერენციაზე განაცხადა.
„შექმნილი ვითარებიდან გამომდინარე გადავწყიტე თანამდბობიდან წასვლა, გენერალური დირექტორის სრული მხარდაჭერით. იმედი მაქვს რომ პირადი საკითხები, რომელიც დომინირებდა რაციონალური გადაწყვეტილებების მიღების დროს , დღის წესრიგში აღარ იქნება და რეფორმა გაგრძელდება“ - განაცხადა ეზუგბაიამ.
Biz.liga.net-ი წერს, რომ გადადგომის მიზეზებს შორის, მან კორუფცია და რკინიგზაში რეფორმების განხორციელების შეყოვნება დაასახელა.
„არსებობენ გარკვეული ძალები, რომლებიც დაინტერესებული არიან ეროვნული სატვირთო გადამზიდავით. დაიწყო ზეწოლა, რომელიც გონივრულ საზღვრებს გასცდა. ამასთან ერთად ნელა ვითარდება რეფორმა, რომელიც ჯერ კიდევ 10 წლის წინ უნდა განხორციელებულიყო“ - ამბობს ეზუგბაია.
- 2020 წლის 29 სექტემბერს უკრაინის რკინიგზის ხელმძღვანელმა ვლადიმერ ჟმაკმა განაცხადა, რომ ირაკლი ეზუგბაია სატვირთო გადაზიდვების მიმართულებას უხელმძღვანელებდა. 2005 წლიდან 2012 წლამდე ეზუგბაია საქართველოს რკინიგზის სათავეში იყო. იგი ასევე მიხეილ სააკაშვილის მრჩეველი გახლდათ ინფრასტრუქტურის საკითხებში. იანვრის ბოლოს, უკრაინის რადამ შექმნა დროებითი საგამოძიებო კომისია უკრაინის რკინიგზის საქმიანობის შესაფასებლად და 2017-2020 წლებში ძალაუფლების ბოროტად გამოყენების ფაქტების გამოსაძიებლად. პირველი მოსმენის შემდეგ, დროებითმა საგამოძიებო კომისიამ მინისტრთა კაბინეტს ვლადიმერ ჟმაკის საქმიანობის შეფასების ნებართვის მოთხოვნით მიმართა, თუმცა ის ამ თანმდებობაზე მხოლოდ 2020 წლის ბოლოს დაინიშნა. რკინიგზის ხელმძღვანელმა დროებითი საგამოძიებო კომისიის მოთხოვნას გაუგებრობა უწოდა.
- 9 მარტს უკრაინის რეფორმების აღსრულების კომიტეტის ხელმძღვანელმა მიხეილ სააკაშვილმა გადაცემაში „ სავიკ შუსტერის სიტყვის თავისუფლება“ განაცხადა, რომ დროებით საგამოძიებო კომისიას ჟმაკის თანამდებობიდან გათავისუფლება სურს და „კორუფციული სქემების დაფარვას ცდილობს.
- 10 მარტს ვლადიმერ ჟმაკმა განაცხადა, რომ უკრაინის რკინიგზის მმართველობა მზადაა დროებით საგამოძიებო კომისიას მიაწოდოს ყველა ინფრმაცია პოლიგრაფის დახმარებით.
biz.liga.net
მარიამ მორგოშია