Johnson & Johnson-ის ანტიკოვიდური ვაქცინა ადამიანის ორგანიზმში იშვიათი თრომბების განვითარების რისკს ზრდის - ამაზე მეტყველებს ახალი კვლევის შედეგები.

შტატ მინესოტას ქალაქ როჩესტერის კლინიკის მეცნიერებმა შეადარეს ერთმანეთს ამ ვაქცინით აცრილების და პამდენიამდე მოსახლეობისგან მიღებული მონაცემები და აღმოაჩინეს, რომ Johnson & Johnson-ით ვაქცინირებულებს შორის თრომბის გაჩენის რისკი ჩვეულებრივ ადამიანებთან შედარებით 3,5-ჯერ მაღალია.

ცერებრალური ვენოზური თრომბების ჩამოყალიბება ისედაც დიდი ხანია იდენტიფიცირებულია, როგორც ამ ვაქცინის ერთ-ერთი გვერდითი ეფექტი, რის გამოც ჯერ კიდევ აპრილში მისი გამოყენება შეჩერდა.

2021 წლის თებერვალ-მაისში შტატებში გამოყენებულ იქნა Johnson & Johnson-ის ვაქცინების 8,7 მლნ. დოზა, და ამ დროისთვის ცერებრალური თრომბის წარმოქმნის 46 შემთხვევა დაფიქსირდა, მათ შორის 70% ქალებში გამოვლინდა.

აცრილთა რაოდენობის და პანდემიამდე ამ საკმაოდ იშვიათი და ხშირ შემთხვევაში სასიკვდილო დაავადების გავრცელების მასშტაბების გათვალისწინებით, გამოდის, რომ, Johnson & Johnson-ით ვაქცინირებულ 100 000 მოქალაქეზე 8,6 თრომბი დაფიქსირდა, რაც 3,5-ჯერ მეტია ვიდრე პანდემიამდელ პერიოდში. მეცნიერებმა ასევე დაადგინეს, რომ ვაქცინის მიმღებებისთვის ამ კუთხით ყველაზე საშიშია პრეპარატის მიღების შემდეგ პირველი 15 დღე. ასევე ჭარბი რისკის ჯგუფში არიან 30-64 წლის ქალები.

თუმცა, მკვლევარების საბოლოო დასკვნა Johnson & Johnson-ის ვაქცინასთან დაკავშირებით დადებითია - იმის მიუხედავად, რომ რისკი მართლაც არსებობს და ეს ადრეც ცნობილი იყო, ეს საფრთხე მინიმალურია და კორონავირუსის გართულებების რისკი გაცილებით უფრო მაღალია. შესაბამისად, Johnson & Johnson-ით აცრები უნდა გაგრძელდეს.

თრომბის შედარებით მაღალი ალბათობის შესახებ აქამდეც იყო ცნობილი - 13 აპრილს აშშ-ის სანიტარული ზედამხედველობის სამსახურმა ამ ვაქცინის გამოყენება მას შემდეგ შეაჩერა, რაც აცრის შემდეგ 6 პაციენტს თრომბი დაუდგინდა. 23 აპრილიდან ვაქცინის გამოყენება განახლდა, თუმცა, მას თან ერთვის გაფრთხილება 50 წლამდე ქალებისთვის თრომბის წარმოქმნის მაღალი რისკის შესახებ.

შტატებში 3 ყველაზე გავრცელებულ ვაქცინას შორის, Johnson & Johnson ყველზე ნაკლებად პოპულარულია, თუმცა მის პოტენციალს მნიშვნელოვნად ზრდის ის გარემოება, როს ეს ერთჯერადი პრეპარატია. ეს კი მას უპირატესობას უქმნის იმ რეგიონებში, სადაც დანარჩენი ვაქცინებისთვის აუცილებელი ორჯერადი აცრა სირთულეს წარმოადგენს. ცერებრალური ვენოზური თრომბი საკმაოდ იშვიათი, მაგრამ ძალიან საშიში მოვლენაა - ის ტვინის გარე ფენების ვენებში წარმოიქმნება და ტვინიდან გულში სისხლის გადინებას ხელს უშლის. უარეს შემთხვევაში, და სწრაფი მკურნალობის გარეშე, ამ დაავადებას საბოლოო ჯამში თითქმის გარანტირებულად მძიმე ინსულტი და სიკვდილი მოჰყვება.