დედამიწის „სასიცოცხლო მაჩვენებლები“ მკვეთრად გაუარესდა – პლანეტამ უკვე გადალახა კრიტიკული ზღვარი, რომლის შემდეგაც მდგომარეობის გამოსწორება შეუძლებელია.
ახალი კვლევა ცხადყოფს, რომ 31 მნიშვნელოვანი პარამეტრიდან 16 მკვეთრად გაუარესებულია. მათ შორის ისეთები, როგორც სასათბურე გაზების კონცენტრაცია, ოკეანეს დამჟავება, რქოსანი პირუტყვის რაოდენობა. ეს და სხვა მაჩვენებლები ანტირეკორდებს ხსნიან, მათ ვერ შველის პანდემია, რომელმაც საყოველთაო ლოქდაუნის გამო პლანეტაზე მოკლე ვადით ეკოლოგიური მდგომარეობის გაუმჯობესება გამოიწვია.
სულ უფრო მეტია იმის ნიშნები, რომ კაცობრიობამ კრიტიკული ზღვარი უკვე გადაკვეთა – განსაკუთრებით ისეთ მნიშვნელოვან საკითხებში, როგორც ანტარქტიკის და გრენლანდიის მყინვარების დნობა – განაცხადა კვლევის ავტორმა, ორეგონის უნივერსიტეტის პროფესორმა უილიამ რიპლმა.
მისი თქმით, მაჩვენებლების გაუარესება ცხადჰყოფს, რომ ეკოლოგიის მიმართ საყოველთაო ყურადღების მიუხედავად, რეალურ ცხოვრებაში არაფერი შეცვლილა და ყველაფერი ძველებურადაა. ამაზე მეტყველებს ანომალური სიცხე, უკიდურესად ძლიერი ქარიშხლები და ტყის ხანძრები.
NASA–ს ინფორმაციით, 2020 წელს პანდემიის გამო ჰაერის დაბინძურება მსოფლიოში 15%–ით შემცირდა, რადგანაც ადამიანებმა საწვავის გამოყენება მკვეთრად შეამცირეს. ამერიკის ზოგიერთ შტატში მავნე ნივთიერებების გამოყოფა 25%–ით, ხოლო აზიის მსხვილ მეგაპოლისებში 2–კერ შემცირდა.
მაგრამ, ამ ყველაფრის მიუხედავად, სწორედ 2020 წელი გახდა დაკვირვების ისტორიაში დაფიქსირებულ 3 ყველაზე ცხელ წელიწადს შორის ერთ–ერთი. სამივე პერიოდს ადგილი 2015 წლის შემდეგ ჰქონდა.
სტიქიური უბედურებების რაოდენობის და სიმძიმის მკვეთრი ზრდის, ატმოსფეროში ნახშირორჟანგის გაზის, მეთანის და აზოტის ზეჟანგის უპრეცედენტოდ მაღალი შემცველობა ცხადჰყოფს – კაცობრიობა დენთის კასრზე ზის და ამ პრობლემას სასწრაფო მიხედვა სჭირდება.
პრიორიტეტი სასათბურე გაზების, განსაკუთრებით მეთანის ატმოსფეროში გამოყოფის რადიკალური შემცირება უნდა გახდეს.
„თანაც, ჩვენ არ უნდა ვუყუროთ გლობალურ დათბობას, როგორც ცალკე პრობლემას – ის სტრესის მდგომარეობაში მყოფი დედამიწისთვის ერთ–ერთი, მაგრამ არა ერთადერთი პრობლემაა. კლიმატური ცვლილებების წინაამღდეგ მიმართულმა პოლიტიკამ მთავარი უნდა მოახერხოს – ადამიანის მიერ პლანეტის რესურსების ჭარბი მოხმარება უნდა შეწყვიტოს", – მიიჩნევს რიპლი.
კვლევის თანახმად, ამ დროისთვის დედამიწაზე 4 მლრდ მსხვილფეხა რქოსანი პირუტყვი ბინადრობს და ძროხების და სხვა ცხოველების მიერ სასათბურე გაზების ატმოსფეროში გამოყოფის მაჩვენებელი გაცილებით მეტია, ვიდრე ავტოტრანსპორტის მიერ დატოვებული კვალი.
ბრაზილიაში ამაზონის ტყეების დანაკარგმა 12–წლიან მაქსიმუმს 2020 წელს მიაღწია, როდესაც 1,1 მლნ ჰექტარზე ტყეები გაიჩეხა.
dailymail.co.uk