დისტანციური მუშაობა შრომის ეფექტურობას ზრდის - კანადაში ჩატარებული კვლევის თანახმად, გამოკითხულთა მესამედი ონლაინ მუშაობის პირობებში შრომის ხარისხის მკვეთრ ზრდაზე საუბრობს.სადღეისოდ, კორონავირუსის პანდემიის გამო, მთელს მსოფლიოში ათობით მილიონი ადამიანი დისტანციურად, ხელმძღვანელობისგან ყოველგვარი კონტროლის გარეშე მუშაობს. ეს ახალი და ძალიან უჩვეულო რეალობაა, თუმცა, დამსაქმებლებს სანერვიულო არაფერი აქვთ. ბიზნესისთვის ასეთი მოცემულობა ზოგჯერ უარესი,ზოგჯერ კი უკეთესია.
ახალ პირობებთან და სახლიდან მუშაობასთან ადაპტირების საკითხებზე, მკვლევარებმა 1600-ზე მეტი ადამიანი გამოკითხეს. მათმა მესამედმა დისტანციური მუშაობა ჩვეულებრივზე ეფექტურად ჩათვალა.რესპოდენტების აზრით, სახლში ყოფნისას მათ საკუთარი დროის და შესრულებული სამუშაოს მოცულობის უკეთესი გაკონტროლება შეუძლიათ.თუმცა, განსხვავებული აზრიც არსებობს - ისინი ვინც თავს იზოლირებულად გრძნობს და ვისი სამუშაოც სხვებთან ურთიერთქმედებაზეა დამოკიდებული, დისტანციურ შრომას ნაკლებად ეფექტურად მიიჩნევს.
პანდემიის დაწყების შემდეგ, ბევრმა კომპანიამ თავის თანამშრომლებს სახლიდან მუშაობა სთხოვა. შესაძლოა, მათ თანამშრომელთა მუშაობის ეფექტურობის საკითხი აწუხებთ, თუმცა, მონრეალის უნივერსიტეტის მიერ ჩატარებული კვლევის თანახმად, მათი წუხილი უსაფუძვლოა. მკვლევარების აზრით, დისტანციური მუშაობა ბიზნესისთვის პირიქით, სასარგებლოა.
გამოკითხვაში მონაწილე 1600 რესპოდენტიდან 75% ქალია, 25%- კი მამაკაცი, 85%- დაახლოებით 40 წლისაა, 85% აქვს უმაღლესი განათლება, 70% საჯარო და ნაწილობრივ საჯარო სტრუქტურებში მუშაობს.გამოკითხულთა ნახევარი დაოჯახებულია, შესაბამისად, დისტანციურად მუშაობის დროს, გვერდით შვილები და მეუღლეები ჰყავს.კვლევის თანაავტორის ტანია საბას თქმით, ქალების და კაცების აზრი ამ საკითხში ერთიანია.
„არასწორია აზრი, თითქოს ონლაინ მუშაობას პრიორიტეტს ძირითადად ქალები იმის გამო ანიჭებენ, რომ ასეთი რეჟიმი მათ ოჯახური ცხოვრების და სამუშაოს დაბალანსების საშუალებას აძლევს. ეს მხოლოდ ერთი მხარეა, სხვა ფაქტორებიც არსებობს“ - განაცხადა მან.
მათ შორის, ვისაც დისტანციური მუშაობა მოსწონს, უმეტესობა 40 წელზე უფროსია. ისინი ოჯახურ მოვალეობებზე ნაკლებ დროს ხარჯავენ. მათი აზრით, ონლაინ რეჟიმზე გადასვლის შემდეგ, შრომითი დატვირთვა გაიზრდა, თუმცა, ამავე დროს მათ საკუთარი დროის და შესრულებული სამუშაოს ოდენობის ბევრად უფრო ეფექტური გაკონტროლება შეუძლიათ.
„ჯერ ერთი, ხდება დროის სერიოზული ეკონომია - ადამიანების სამსახურში წასვლაზე და სამსახურიდან სახლში დაბრუნებაზე უამრავ დროს ხარჯავენ. დისტანციური მუშაობის დროს მათ ამ დროის დაზოგვა შეუძლიათ . ეს არ არის 10-15 წუთი დღეში. დიდ მეგაპოლისებში ამაზე 1-1, 5 საათი იხარჯება. გარდა ამისა, თავად სახლიდან მუშაობა ნაკლებად დამღლელია, იმიტომ რომ თანამშრომლებს თავისუფალი დროის გაცილებით უფრო ნაყოფიერად გამოყენება შეუძლიათ. ჯამში, ეს ფაქტორები შესაძლოა დისტანციური შრომის ეფექტურობის ზრდას ხელს მართლაც უწყობდეს“ - მიიჩნევს ტანია საბა.
თუმცა, არსებობს განსხვავებული პოზიციებიც. მკვლევარებმა დისტანციური მუშაობით უკმაყოფილო თანამშრომლებიც აღმოაჩინეს. „უკმაყოფილოები არიან ისინი ვინც თავს იზოლირებულად და გადაწყვეტილებების მიღებისგან დაშორებულად მიიჩნევენ. მათი აზრით, პირიქით, დისტანციური რეჟიმი შრომის ხარისხზე ნეგატიურად მოქმედებს. დიდხანს მარტოობაში მუშაოდა ბევრს უჭირს“ - თვლის მკვლევარი.
ბოლოს და ბოლოს პანდემია დასრულდება და თანამშრომლები ოფისებში დაბრუნებას დაიწყებენ, თუმცა, 40%-ს სახლში დარჩენა ურჩევნია.
მოამზადა თენგიზ აბლოთიამ
შრომის ეფექტურობა
