ქობულეთში საოჯახო ტიპის სასტუმროები ჯანდაცვის სამინისტროს მიერ გაცემული რეგულაციების ფარგლებში 15 ივნისიდან გაიხსნება.იცავენ თუ არა მცირე  და საოჯახო ტიპის სასტუროები რეგულაციებს, მათ საქმიანობას ჯანდაცვის სამინისტროს შრომის დეპარტამენტის ინსპექტორები შეამოწმებენ. სივრცეების  შემოწმების უფლება საპატრულო პოლიციასაც შეეძლება.

 „კომერსანტთან“ საუბრისას  ქობულეთში მდებარე საოჯახო სასტუმრო „რეიამის“ მფლობელის თქმით, სასტუმრო 20 ივნისიდან გაიხსნება და რეგულაციის ყველა წესს დაიცავს.

 „ჯანდაცვის სამინისტროს მიერ გაცემულ რეგულაციებს ვითვალისწინებთ.  პირადად მე 20 ივნისისთვის ვაპირებ სტუმრების მიღებას. დღეის მდგომარეობით,  სასტუმროში ჩატარებული გვაქვს დეზინფექცია. აუცილებლად ვაპირებთ დისტანციის დაცვას და ამას მკაცრად გავაკონტროლებ.  ერთი ვიზიტორის სტუმრობის შემდეგ სანამ ნომერს შემდეგი სტუმარი დაიკავებს ოთახი სველი წესით დასუფთავდება და გაიწმინდება სპეციალური ხსნარით. რაც შეეხება შემოწმებას, ჩემი ინფორმაციით, ამის უფლება აქვს როგორც საპატრულო პოლიციას, ასევე იმ უწყების ინსპექტორებს, ვისაც უშუალოდ ევალება ეს საქმე. ჩემი სასტუმრო მზადაა და ნებისმიერ დროს მზად ვართ შემოწმებისთვის“-აცხადებენ სასტუმრო „რეიამში“. 

ადგილობრივი ტურიზმის  განახლების პარალელურად, გაიხსნება  საოჯახო სასტუმრო „პარკ ავენიუც“. სასტუმროს მეპატრონე „კომერსანტთან“  საუბრისას აცხადებს, რომ მისთვის უცნობია ვინ შეამოწმებს მათ მიერ გატარებულ რეფორმას.

„ვემზადებით გახსნისთვის,  სტანდარტული რეგულაციის ყველა წესს ვიცავთ. გვაქვს დეზობარიერი, თერმოსკრინინგი და ხელის სპეციალური ხსნარები. ოთახები დამუშავებული გვაქვს სპეციალური ხსნარით და ამ მეთოდით ვაპირებთ მუშაობის გაგრძელებას. რაც შეეხება შემოწმებას, ვინ შეგვამოწმებს ვასრულებთ თუ არა რეგულაციებს ჯერ ჩემთვის უცნობია“,-განაცხადეს საოჯახო სასტუმრო „პარკ ავენიუში“.  

ნათია ლომიძე