„კომერსანტის“ ექსკლუზიური ინფორმაცია, მარნეულში სასოფოლო- სამეურნეო მიწის ნაკვეთის არა მიზნობრივად გამოყენების შესახებ დადასტურდა. რამდენიმე დღის წინ მედიაჰოლდინგი გიყვებოდათ, რომ 15 683 კვ. მეტრზე სიმინდის ყანების, კომბოსტოს პლანტაციების, ან სულაც კარტოფილის ნათესები ნაცვლად ტირ პარკი - „მწვანე“ ფუნქციონირებდა. სანდო წყარო გვიყვებოდა, რომ ადგილობრივმა და ცენტრალურმა მთავრობამ შ.პ.ს. „მწვანეს“ მწვანე შუქი აუნთეს და ბიზნესსაქმიანობის უხეში კანონდარღვევით დაწყების უფლება მისცეს. მას შემდეგ, რაც საქართველოს გარემოს დაცვისა და სოფლის მეურნეობის სამინისტრომ აღნიშნული ფაქტის შესახებ „კომერსანტისგან“ გაიგო, უწყებამ საკითხის მოკვლევა დაიწყო, რის შემდეგაც დაადგინა, რომ სახნავ-სათესი მიწა, არამიზნობრივი დანიშნულებით გამოიყენება:

„სსიპ „მიწის მდგრადი მართვისა და მიწათსარგებლობის მონიტორინიგის ეროვნულმა სააგენტომ“, კომპეტენციის ფარგლებში, მოიძია ინფორმაცია განცხადებაში აღნიშნულ ფაქტთან დაკავშირებით. ინფორმაციის შესაბამისად, დასტურდება მარნეულის რაიონის სოფელ კაპანახჩში არსებული სასოფლო- სამეურნეო დანიშნულების მიწის ნაკვეთის, ბიზნეს სუბიექტის მიერ, არამიზნობრივი დანიშნულებით გამოყენების ფაქტი“, - ნათქვამია გარემოს დაცვისა და სოფლის მეურნეობის სამინისტროს მიერ მოწოდებულ ინფორმაციაში.

ამასთან "კომერსანტს" აცნობეს, რომ სამინისტროს საქვეუწყებო დაწესებულება - გარემოს დაცვითი ზედამხედველობის დეპარტამენტი, შემდგომი რეაგირებისთვის, კომპეტენციის ფარგლებში შეისწავლის აღნიშნულ ფაქტს და საკითხის შესწავლის დასრულებისთანავე, მოგვაწვდის ინფორმაციას ჩატარებული ღონისძიებების შესახებ.

შეგახსენებთ, რომ სასოფოლო- სამეურნეო მიწის ნაკვეთის მიზნობრივი დანიშნულების ცვლილების გარეშე, არა სასოფოლო- სამეურნეო დანიშნულებით გამოყენება აკრძალულია. ეს უმნიშვნელოვანესი საკითხი საქართველოს კანონმდებლობით რეგულირდება, თუმცა როგორც ჩანს კანონი შპს „მწვანესთვის“ დაბრკოლება არ ყოფილა. სახნავ მიწაზე დაგებულია ბეტონის საფარი და იქ საერთაშორისო გადამზიდავი სატვირთო ავტომანქანების ავტოსადგომი ფუნქციონირებს.

უხეშ კანონდარღვევის შესახებ ინფორმაცია არა ჰქონდათ საკითხზე კიდევ ერთ პასუხისმგებელ უწყებაში, ეკონომიკის სამინისტროში. სწორედ მათ დაქვემდებარებაში არსებულმა, სახმელეთო ტრანსპორტის სააგენტომ გასცა ლიცენზია ავტოსადგომის ფუნქციონირებისთვის. თუმცა, გარემოს დაცვისა და სოფლის მეურნეობის სამინისტროსგან განსხვავებით „კომერსანტის“ არა ერთი მცდელობის მიუხედავად მიეღო პასუხი კითხვაზე, უნდა გაგაეცათ თუ არა ავტოსადგომის ლიცენზია სახანავ მიწაზე, ნათია თურნავას უწყებისგან დაპირების მიუხედავად პასუხი ვერ მივიღეთ.

სანამ სახელმწიფო უწყებები საკითხს იკვლევენ, შპს „მწვანეს“ ოთხი მესაკუთრე: მადატ გუსეინოვი, ვუგარ ნოვრუზოვი, მამედ ქერიმოვი და სადიგ კურბანოვი,  სავარაუდოდ, უკვე დიდი ხანია სახელმწიფო უწყებებთან კორუფციული გარიგებით, ბიზნეს საქმიანობიდან სარგებელს ნახულობენ. ვინ მიიღო და იღებს სარგებელს სავარაუდო კორუფციული გარიგებით, ჰქონდა თუ არა ადგილობრივი და ცენტრალური ხელისუფლების მხრიდან გულგრილობას ადგილი და გადადგამს თუ არა ხელისუფლება ქმედით ნაბიჯს აშკარა კანონდარღვევის ფაქტის გამოსავლენად, „კომერსანტი“ თემაზე მუშაობას აგრძელებს და დამატებით დეტალებს უახლოესს მომავალში მოგაწვდით.

ბაჩო ადამია