ივნისის ბოლოსთვის გაცემული ახალი იპოთეკური სესხების 7 დღის საშუალო მაჩვენებელმა პანდემიის შემდეგ პირველად გადაუსწრო იანვარ-თებერვლის პერიოდის საშუალოს. ამის შესახებ ინფორმაციას „თიბისი კაპიტალი“ აქვეყნებს. ზრდამ ბოლო კვირაში +11% შეადგინა.
თიბისი ჯგუფის მთავარი ეკონომისტის ოთარ ნადარაიას განცხადებით, შედარებით დაბალშემოსავლიან სეგმენტზე უფრო მეტია კრიზისის დარტყმა, ვიდრე იმ სეგმენტზე ვინც იპოთეკური დაკრედიტებით სარგებლობს და შეიძლება ესეც განვიხილოთ იპოთეკური სესხების გაცემის ზრდის ერთ-ერთ ფაქტორად.
„იპოთეკური სესხების ბაზარზე ჩვენი მოლოდინები პოზიტიურია. ვფიქრობთ, რომ სახელმწიფო მხარდაჭერა კიდევ უფრო წაახალისებს არსებულ ბაზარს. ეს იმით არის გამოწვეული, რომ უძრავი სექტორის ფასების მხრივ კრიზისამდე არ გვქონია ე.წ გადახურება. ასევე, თავის მხრივ საბანკო სექტორი მაქსიმალურად უწყობს ხელს რომ დაკრედიტება გაიზარდოს. დასაქმებას რაც შეეხება, ჯერჯერობით მართალია სამწუხარო სიტუაციაა, თუმცა გაუმჯობესებას ველოდებით. ამასთან, შედარებით დაბალშემოსავლიან სეგმენტზე უფრო მეტია დარტყმა, ვიდრე იმ სეგმენტზე ვინც იპოთეკური დაკრედიტებით სარგებლობს და შეიძლება ესეც განვიხილოთ სესხების ზრდის ერთ-ერთ ფაქტორად. ეს ის ძირითადი ფაქტორებია, რასაც ამ ბაზრის დინამიკა განაპირობებს. მიმდინარე სტატისტიკის მხრივ ასევე უნდა გავითვალისწინოთ დიდწილად ჩაკეტილი ეკონომიკის პირობებში ფორმირებული გადადებული მოთხოვნა და ასევე იანვარ-თებერვლის დაბალი სეზონური ეფექტი, თუმცა სექტორზე ოპტიმისტურ მოლოდინებს ეს მაინც ვერ ცვლის. ჩვენი აზრით, ბინათმშენებლობის სექტორი ისედაც აღდგებოდა, უბრალოდ მთავრობის ახალი ინიციატივით, რაც სესხების გაცემებში მხოლოდ ახლა გამოჩნდება, სექტორის აღდგენა უფრო ადრე მოხდება. იპოთეკური სესხების სუბსიდირება ბანკებისთვისაც პოზიტიურია, თუმცა მთავარი გათვლა მაინც სამშენებლო სექტორზე და ზოგადად ეკონომიკაზეა“, - განაცხადა ოთარ ნადარაიამ.
აღსანიშნავია, რომ წინა წლის ანალოგიურ პერიოდთან შედარებით ცვლილება -65%-ს გაუტოლდა, რაც 2019 წლის ივნისის ბოლოს ძლიერი საბაზისო ეფექტით აიხსნება.
ნინო თამაზაშვილი