„რადგან მხოლოდ შიდა ტურიზმზე ვართ დამოკიდებული გაყიდვების მაჩვენებელიც საგრძნობლად შემცირებულია,“  - ამის შესახებ „კომერსანტს“ დეველოპერული კომპანია „რედკოს“ იურისტმა მალხაზ კუნელაურმა განუცხადა.

პანდემიისა და საგანგებო მდგომარეობის დროს „რედკო“-ს ახალი გუდაურის პროექტის ბინებზე მოთხოვნა მნიშვნელოვნად იყო შემცირებული. როგორც მაშინ კომპანიაში განგვიცხადეს, ბინების გაყიდვები 90 პროცენტით დაეცა. როგორც აღმოჩნდა, მაღალ საფასო სეგმენტზე გათვლილი ბინების გაყიდვების შემცირებამ ასახვა ჰპოვა კომპანიის პროექტების შემდგომ განვითარებაზე, ამიტომაც „რედკოში“ დაგეგმილი პროექტების ნაწილის შემცირება მოხდა. 

მოთხოვნის შემცირების გამო ჩვენი მხრიდან მიწოდება შემცირებულია, თუ დაგეგმილი იყო პარალელურად 10 მშენებლობა, დავიწყეთ იმდენი რამდენის მოთხოვნაც იყო. სამომავლოდ, როგორც კი მოთხოვნა აღდგება, მიწოდებაც გაიზრდება. 

 სადაც ჩვენ სასტუმროს ტიპის საცხოვრებელ სახლებს ვაშენებთ, იქ ძირითადად ტურიზმის მიმართულებით არის დაინტერესება. ვინაიდან საზღვრები ჩაკეტილია, უცხოელები ვერ ახერხებენ ქვეყანაში ჩამოსვლას, შესაბამისად ამ მიმართულებით ძალიან მკვეთრად არის ტურისტული აქტივობა შემცირებული. გუდაური სპეციფიური ადგილია და ძირითადად ზამთრის სეზონს ემსახურება და ადგილობრივების მხრიდან აქტივობა ნაკლებია.

გაყიდვები პირდაპირპროპორციულად ტურიზმზეა მიბმული. ადგილობრივი თუ უცხოელი სწორედ იმიტომ ყიდულობს მსგავსი ტიპის ქონებას, რომ შემდეგ გააქირავოს და მცირე ბიზნესი აწარმოოს.ამ ეტაპზე, რადგან შექმნილმა ვითარებამ გაყიდვებზე გავლენა იქონია და მაჩვენებელი შემცირდა, დაგეგმილი აქტივობების ნაწილი დროებით შეჩერდა. ჩვენი პროექტების გაგრძელება ეკონომიკური აქტივობის დინამიკაზეა დამოკიდებული.“ - განმარტავს მალხაზ კუნელაური.

კომპანია „რედკომ“ გუდაურის განვითარების პროცესი ცოტა ხნის წინ განაახლა. როგორც ცნობილია დეველოპერული კომპანია პროექტ „ახალი გუდაურის“ ფარგლებში სასტუმროს ტიპის საცხოვრებელ სახლებს აშენებს, ასევე ადგილზე მიმდინარეობს „რედისონის“ ბრენდის სასტუმროს მშენებლობაც. 2019 წელს „რედკომ“ სამშენებლო სამუშაოების შესრულება სამშენებლო კომპანია „ანაგს“ გადააბარა, რომელიც, მათი თქმით, პასუხისმგებელია „რადისონ ბლუ გუდაურის“ და სხვა პროექტების მშენებლობასა თუ  ხარისხზე.

ანი ცარციძე