„დაასახელეთ მსოფლიოში ერთი ქვეყანა მაინც გარდა საქართველოსი, რომელმაც კორონავირუსის პანდემიის პერიოდში საკუთარ მოქალაქეებს არ გაუწია არც ერთი თეთრი ფულადი დახმარება“ - ამ კითხვით მიმართა პარლამენტში ანგარიშის წარსადგენად მისულ საქართველოს პრემიერ მინისტრ გიორგი გახარიას „ნაციონალური მოძრაობის“ წევრმა რომან გოცირიძემ. ოპოზიციონერმა დეპუტატმა თავის გამოსვლაში ყურადღება StopCov ფონდში ჩარიცხულ თანხაზე გაამახვილა.
„ბ.ნ პრემიერო დაასახელეთ მსოფლიოში ერთი ქვეყანა მაინც, გარდა საქართველოსი, რომელმაც კორონავირუსის პანდემიის პერიოდში საკუთარ მოქალაქეებს არ გაუწია არც ერთი თეთრით ფულადი დახმარება, არც ერთი ცენტი, ერთი ქვეყანა დაასახელეთ მსოფლიოში რომელია ასეთი.
მე მოგწერეთ წერილი, სადაც მაინტერესებდა ამ კოვიდ ფონდის ხარჯვის შესახებ, თუ რატომ არის ეს ფონდი გაუმჭვირვალე, რაში ხარჯავთ მას. 133 მლნ ლარი არის ამ ფონდში დღეს აკუმულირებული. დღეს გავიგეთ თქვენგან, რომ თურმე ეს ფონდი ყოფილა სარეზერვო, ბატონ ბიძინას მადლობაც გადაუხადეთ 100 მილიონისთვის და თქვით, რომ ამას გამოიყენებთ მერე; კი მაგრამ სარეზერვოდ გამოიყენეთ ის ფული, რომელიც მერე შემოვა საერთაშორისო ორგანიზაციებიდან და ეს ფული, რომელიც დევს, დახარჯეთ ახლა. თქვენივე არასწორი სქემით, რომლითაც 300 ლარს უხდით დასაქმებულებს და ნახევარზე მეტს არც აძლევთ, ეს ფული რომ გამოიყენოთ, 133 მლნ ლარით 443 ათას თვითდასაქმებულს შეგიძლიათ მისცეთ 300-ლარიანი დახმარება. რატომ არ აკეთებთ ამას? ალბათ იმიტომ არ აკეთებთ, რომ რადგან იქ ბატონი ივანიშვილის ფული დევს, მისგან ელოდებით ნებართვას და შეიძლება ისეთივე უცნაურობა მოხდეს, როგორც წინა პერიოდში, 80 მლნ გაიღო სტიქიის მხარდაჭერისთვის, მერე მოვიდა ხელისუფლებაში და ეს 80 მლნ წაიღო უკან. თქვენ არ გაქვთ ამ ფულის განკარგვის უფლება? კეთილი ინებეთ და ამ ფონდიდან 430 ათას დასაქმებულს გადაუხადეთ ფული“, - განაცახდა რომან გოცირიძემ.
ბაჩო ადამია