საქართველოს საბანკო ასოციაცია მთავრობის მიერ დაანონსებულ „საგადასახადო კოდექსში“ შესატან ცვლილებებზე პირველ კომენტარს „კომერსანტთან“ აკეთებს. როგორც ასოციაციის პრეზიდენტმა ალექსანდრე ძნელაძემ აღნიშნა, აღნიშნულ ცვლილებებთან დაკავშირებით მთავრობას ასოციაციასთან კომუნიკაცია არ ჰქონია. მისივე განმარტებით, ვიდრე ასოციაცია საკანონმდებლო ინიციატივას არ ნახავს და არ მოისმენს, რა გათვლები აქვთ მთავრობას, მანამდე ვერც თავად გააკეთებს გარკვეულ გაანგარიშებებს აღნიშნული ინიციატივის ფინანსურ თუ ფისკალურ ეფექტზე.

„სამი ცვლილება დაანონსდა ერთბაშად. პირველი ცვლილება რაც დაანონსდა არის ის, რომ გაუქმდება ე.წ. ესტონური მოდელი, პრინციპში არ ამოქმედდება.

მეორე საკითხი იყო მოგების გადასახადის ზრდა. ჯერ ჩანაწერი უნდა ვნახოთ, თუ რა ეფექტს ელოდება სახელმწიფო აქედან და მერე გამოვითვალოთ. ძალიან ცხელია ეს ინფორმაცია და გესმით, რომ გაანგარიშებები სჭირდება. ნახსენები იყო, რომ მოგების გადასახადი 15%-დან 20%-მდე გაიზრდება და დივიდენდის გადასახადი მოიხსნება და თუ არ ჩავხედეთ საკანონმდებლო ცვლილებებს, ჯერ ზუსტ პასუხებს ვერ გაგცემთ. აბსოლუტურ მაჩვენებლებში ეს თითებზე თვლა გამოვა, რომელიც არ იქნება სწორი.

და მესამე თემა არის ის, რომ მოგების გადასახადს ბანკები გადაიხდიან ფინანსური აღრიცხვების ანგარიშგების საერთაშორისო სტანდარტების მიხედვით. აქაც გარკვეული გამოთვლები გვჭირდება, ჩვენი მხრიდანაც და მათი მხრიდანაც, უნდა ვნახოთ რა ეფექტს ელოდებიან.

უპირველეს ყოვლისა უნდა ვნახოთ ეკონომიკური ცვლილება, რომელიც მომზადდა და ვნახოთ და დავთვალოთ, რა ეკონომიკური ეფექტი ექნება“, - განმარტავს ალექსანდრე ძნელაძე.

შეგახსენებთ,  დღეს პრემიერ-მინისტრმა განაცხადა, რომ ბანკები და საფინანსო სექტორი მოგების გადასახადების ე.წ ესტონურ მოდელზე აღარ გადადიან, შენარჩუნდება მოგების გადასახადის არსებული სისტემა და 15%-ის ნაცვლად 20%-ს გადაიხდიან.  პრემიერ-მინისტრის თქმით,  ბანკების სუფთა მოგება წლის ბოლოსთვის 2 მილიარდი ლარი იქნება, რაც გაუმართლებელია.  ირაკლი ღარიბაშვილმა აღნიშნა, რომ ამ გადაწყვეტილებით მთავრობა 2024 წლიდან დამატებითი შემოსავლის მიღებას ვარაუდობს.