ე.წ. სამხრეთ ოსეთის შინაგან საქმეთა სამინისტროს ეკონომიკურ დანაშაულთან ბრძოლის დეპარტამენტის თანამშრომლებმა ცხინვალის აფთიაქებიდან ქართული წარმოების მედიკამენტები ამოიღეს.ამ მოქმედებებს საფუძვლად დაედო მთავრობის დადგენილება, რომელიც კრძალავს არა მხოლოდ მედიკამენტების, არამედ ყველანაირი ქართული პროდუქცის გაყიდვას თვითგამოცხადებული რესპუბლიკის ტერიტორიაზე.
ამ დადგენილების მიღებასთან დაკავშირებით რამდენიმე ვერსია არსებობს. ყველაზე გავრცელებული ე.წ. სამხრეთ ოსეთის ყოფილმა პრეზიდენტმა ლეონიდ თიბილოვმა გაახმოვანა. თავისი პრეზიდენტობის პერიოდში მან გასცა ცხინვალის მაღაზიებიდან ქართული ღვინის და მინერალური წყლების ამოღების ბრძანება და განაცხადა - „ჩვენ არ შევუწყობთ ხელს მტრული სახელმწიფოს ეკონომიკურ განვითარებას“.
როგორც ამბობენ, ცხინვალში მოსახლეობას ექიმები ხშირად ქართული მედიკამენტების შესყიდვას დაბალი ფასის და მაღალი ხარისხის გამო ურჩევენ. ადგილობრივი ექიმების გათვლებით, ქართულ მედიკამენტებს ადგილობრივი ფარმაცევტული ბაზრის 20%-ი უჭირავს და ამას ვერანაირი აკრძალვა ვერ ცვლის.
ქართული ფარმაცევტული პროდუქცია ცხინვალში სხვადასხვა გზებით შედის. როდესაც ღია იყო ახალგორის რაიონის გამშვები პუნქტი „რაზდაზანი“ - ამ გზით, შემდეგ, როდესაც ეს გადასასვლელი დაიხურა - მედიკამენტების ნაკადი ჩრდილოეთ ოსეთის გავლით წავიდა.შემდეგ გაიხსნა ახალი გამშვები პუნქტი სინაგური, რის შემდეგაც ქართული პრეპარატების ტრაფიკი გაიზარდა, რასაც რეპრესიული ზომების გააქტიურება მოჰყვა.
სხვათაშორის იანვარში შსს თანამშრომლებმა მედიკამენტების გარდა ისევ ამოიღეს ცხინვალის სავაჭრო ქსელებიდან ქართული ღვინო და მინერალური წყლები.მედიკამენტების შემოტანის წინაამღდეგ ბრძოლა ბევრად უფრო რთულია, ვიდრე საჭმელ-სასმელთან, რადგანაც ისინი იყიდება არა მხოლოდ სავაჭრო წერტილებში, არამდე ხელზე. მაგალითად, ბევრი ცხინვალელი, ვისაც აწუხებს კუჭის დაავადებები, უპირატესობას ანიჭებს ქართულ „ომეზს“, რადგანაც ის რუსულზე იაფია და ამავე დროს საკმაოდ ხარისხიანი.
ცხინვალში საქართველოდან შემოსული ყველა პრეპარატი არაა ადგილობრივი წარმოების. მათ შორის არის ჩვეულებრივი იმპორტული პრეპარატები ქართულ წარწერებით, თუმცა, ისინიც დარტყმის ქვეშ მოხვდნენ.სქემა მუშაობს შემდეგნაირად - ცხინვალელი აფთიაქარი ან დილერი ყიდულობს მედიკამენტებს საქართველოში, შემდეგ, პროდუქცია სამხრეთ ოსეთში ყოველგვარი კონტროლის გარეშე შემოაქვს.
ადგილობრივი ექიმები, თავისი გამოცდილებიდან და სანდო ინფორმაციის საფუძველზე, ადგენენ რომელი პრეპარატი არის უფრო ეფექტური და მას პაციენტებს უნიშნავენ.ყველაფერი ქართულის წინააღმდეგ დეკლარირებულმა ბრძოლამ შედარებით გაართულა პროდუქციის გადატანის პროცესი. თუმცა, ის მაინც არ შეფერხდა - ბოლოს და ბოლოს, სხვა თუ არაფერი, კორუფცია ჯერ არავის გაუუქმებია.
თანაც, საქართველოდან ცხინვალში სხვადასხვა საქონელი შემოაქვს ბევრ ადგილობრივ მაღალჩინოსანს, მათ კი პრობლემა არასდროს უჩნდებათ.
წყარო: Ekhokavkaza
თენგიზ აბლოთია
ცხინვალი
