2022 წლის 1-ელი ივნისის მდგომარეობით ოფიციალურად დადასტურებულია რეინფიცირების 138 331 შემთხვევა. დაავადებათა კონტროლისა და საზოგადოებრივი ჯანმრთელობის ეროვნული ცენტრის (NCDC) უახლეს ანგარიშში აღნიშნულია, რომ საშუალო პერიოდი პირველსა და ბოლო დადასტურებებს შორის არის 305 დღე, მინიმალური 60 დღე, ხოლო მაქსიმალური 767 დღე.

„სულ ლაბორატორიულად COVID-19-ის დადასტურებული შემთხვევების ელექტრონულ სისტემაში 2020 წლის 26 თებერვლიდან 2022 წლის 1 ივლისამდე აღირიცხა 138 331 შესაძლო რეინფიცირების შემთხვევა უნიკალურ პირში, რომლებიც იყვნენ დადებითი PCR კვლევით ან ანტიგენის სწრაფი ტესტირებით, სულ მცირე 60 დღის შუალედით.

მათ შორის მამრობითი სქესის იყო 53 194 (38%), ხოლო მდედრობითი - 85 137 (62%). შესაძლო რეინფიცირებულთა ასაკის საშუალო განმეორებითი ინფიცირებისას იყო 37 წელი, მინიმალური ასაკი >1, მაქსიმალური 103.

საშუალო პერიოდი პირველსა და ბოლო დადასტურებებს შორის არის 305 დღე, მინიმალური 60, ხოლო მაქსიმალური 767 (SD=135). 138 331 შემთხვევიდან 10 997-ის რეინფექცია დადგა 2020 წლის 26.02 – 2021 წლის 31.12-ის პერიოდში“, განმარტავენ დაავადებათა კონტროლისა და საზოგადოებრივი ჯანმრთელობის ეროვნულ ცენტრში.

ანგარიშის თანახმად, ლუგარის კვლევითი ცენტრის მიერ 2020 წლის მარტიდან 2021 წლის 31 დეკემბერის ჩათვლით სექვენირება ჩატარდა 41 შესაძლო რეინფიცირების შემთხვევაზე, საიდანაც ლაბორატორიულად დადასტურდა 16 რეინფიცირების და 1 პერსისტირების შემთხვევა.

COVID-19-ის შესაძლო რეინფიცირების შემთხვევების მაჩვენებელი 100 000 მოსახლეზე ყველაზე მაღალია 30-39 წლის ქალებში. 2021 წლის 15 მარტიდან 2022 წლის 1 ივლისამდე, რეინფიცირებულთა შორის 16 868 შემთხვევაში იყო ჰოსპიტალიზაცია, ხოლო მათგან 102 პირი გარდაიცვალა. აღწერილი შემთხვევებიდან გარდაცვლილთა საშუალო ასაკი იყო 69 წელი [SD 13], მინიმალური ასაკი - 18 წელი, ხოლო მაქსიმალური - 89.

„სულ 138 331 შესაძლო რეინფიცირების შემთხვევიდან, 101 306 (73%) შემთხვევაში რეინფიცირება დადგა ვაქცინით არაიმუნიზებულ პირებში. კოვიდის საწინააღმდეგო იმუნიზაცია პირველად და განმეორებით ინფიცირებას შორის ჩაუტარდა 37 025 (27%) ადამიანს: მ.შ. 1 ბუსტერ დოზა მიღებული ჰქონდა რეინფიცირებულთა 2.3%-ს (3 213), ხოლო 4 დოზა - 0.035%-ს (49). მამრობითი სქესის იყო 13 044 (35%), ხოლო მდედრობითი - 23 981 (65%) (N=37 030). რეინფიცირებისას ვაქცინირებული პირების საშუალო ასაკი იყო 42 წელი, მინიმალური 12, მაქსიმალური - 96 (SD=15) (N=37 025), აღნიშნულია NCDC-ის კვლევაში. 

საანგარიშო პერიოდში აღრიცხული რეინფიცირების სავარაუდო და დადასტურებული შემთხვევების 92% უკავშირდება SARS-CoV-2-ის ომიკრონის ვარიანტების (უპირატესად BA 1, BA 2) გავრცელებას საქართველოში.