უახლოეს მომავალში უკრაინის ბაზარზე Zara, Pull & Bear, Bershka, Stradivarius, Massimo Dutti და H&M  დაბრუნდებიან.

focus.ua-ს ინფორმაციით, ზოგიერთი დასავლური ბრენდი, რომლებმაც უკრაინის ბაზარი ომის დაწყების შემდეგ დატოვეს, ქვეყანაში წლის ბოლომდე დაბრუნდება, ხოლო პოლონური და თურქული ბრენდები უკვე დაბრუნდნენ უკრაინაში.

უკრაინის სავაჭრო ცენტრების საბჭოს (URTC) ხელმძღვანელმა მაქსიმ გავრიუშინმა უკრაინის რადიოს ეთერში დასავლელ პარტნიორებთან სავაჭრო თანამშრომლობის შემდგომი პერსპექტივების შესახებ ისაუბრა.

მისი თქმით, გარდა McDonald's-ის ბრენდისა, უკრაინაში სხვა სავაჭრო ნიშნებიც ბრუნდება. მათ შორისაა Adidas-ი, ასევე სხვა ცნობილი პოლონური და თურქული ბრენდები.

გავრიუშინის თქმით, უკრაინის ბაზარზე ამ ბრენდების დაბრუნების შენელების მთავარი მიზეზი ბიუროკრატიაა. ფაქტია, რომ დასავლური კომპანიების მენეჯმენტი ძალიან სერიოზულად ეკიდება თანამშრომლების უსაფრთხოების საკითხს, შესაბამისად, თავიდან კომპანიების მუშაობა განახლდება კიევში და რეგიონებში, სადაც არ არის აქტიური საომარი მოქმედებები.

„ბრენდები უკრაინაში თანდათან ბრუნდებიან, ონლაინ ვაჭრობაც განახლდება. კერძოდ, ეს ეხება იმ ქალაქებს, სადაც საფრთხის გაზრდილი დონეა - დნეპერი, ხარკოვი, ზაპოროჟიე. ამ ქალაქებში ადამიანებს საშუალება ექნებათ შეუკვეთონ თავიანთი საქონელი ინტერნეტის საშუალებით", - განაცხადა მან.