„ურჩი ქართული მართლმადიდებელი ეკლესია აღდგომის დღესასწაულზე მრევლს აკრძალვების მიუხედავად მიიღებს“ - ამ სათაურით სტატიას ტელეკომპანია CNN-ი ავრცელებს. სტატიის ავტორი ნილ ჰოუერი აღნიშნავს, რომ საქართველომ კორონავირუსთან ბრძოლაში წარმატებას მიაღწია და ამ დროისთვის ინფიცირებულთა რაოდენობა მხოლოდ 370-ით შემოიფარგლება, თუმცა აღდგომის დღესასწაულის გამო ქვეყანა სერიოზული ტესტის წინაშე აღმოჩნდება.

„19 აპრილს ქვეყანა აღდგომას იზეიმებს და გავლენიანი მართლმადიდებელი ეკლესია მასშტაბურ დღესასწაულის ჩატარებას გეგმავს, რასაც, ჯანდაცვის სფეროს მუშაკთა განცხადებით, შესაძლოა ფატალური შედეგი მოჰყვეს.

საქართველოს ხელისუფლებამ კორონავირუსს სწრაფად და დროულად უპასუხა. სკოლებში სწავლა 29 თებერვალს შეჩერდა, როდესაც ქვეყანაში მხოლოდ 3 დადასტურებული შემთხვევა იყო. პირველი დღეებიდან ისმოდა მოწოდებები სოციალური დისტანცირების და სხვა აუცილებელი ზომების გათვალისწინების შესახებ.

მიუხედავად ამისა, ქართულმა მართლმადიდებელმა ეკლესიამ უარი თქვა ჯანდაცვის სფეროს წარმომადგენელთა მიერ გაცემული რეკომენდაციების შესრულებაზე, რომლებიც მოსახლეობას სახლში დარჩენისკენ მოუწოდებენ. ეკლესიები საქართველოში კვლავ ღიაა, გრძელდება ღვთისმსახურება, რასაც, ექსპერტების აზრით, შესაძლოა კატასტროფა მოჰყვეს.

გასულ კვირას, ბზობის დღესასწაულზე ეკლესიებში ათასობით ადამიანი შეიკრიბა. ღვთისმსახურება ჩატარდა მიუხედავად იმისა, რომ 30 მარტს სახელმწიფომ კარანტინი გამოაცხადა, რომლითაც 3-ზე მეტი ადამიანის შეკრება იკრძალება. ეპიდემიოლოგების რჩევების მიუხედავად, ტრადიციების მიმდევარი ეკლესია უარს ამბობს ზიარების წესის შეცვლაზე. მსახურების ბოლოს მორწმუნეები ერთი კოვზით ეზიარებიან.

„კოვზი ხშირად არც კი ირეცხება“, - აცხადებს CNN-თან საუბარში „საქართველოს პოლიტიკური ინსტიტუტში“ რელიგიის საკითხებზე მომუშავე სალომე კანდელაკი. საპატრიარქოში ჩვენს კითხვებს არ უპასუხეს, თუმცა საეკლესიო პირებს არაერთხელ უთქვამთ, რომ რელიგიური რიტუალების დროს დაინფიცირება გამორიცხულია“, - აღნიშნულია სტატიაში.

ნილ ჰოუერი აღნიშნავს, რომ ქართული ეკლესიის გადაწყვეტილება კიდევ უფრო გაუგებარია იმ ფონზე, როდესაც სხვა მართლმადიდებელმა ეკლესიებმა, მათ შორის რუსულმა და ბერძნულმა ეკლესიებმა მრევლს აღდგომის დღესასწაულზე სახლში დარჩენისკენ მოუწოდეს.

„აღდგომის დღესასწაული საქართველოსთვის დიდი რისკის შემცველი იქნება. თუ დღესასწაული ხალხმრავლობის ფონზე აღინიშნება, საქართველოს წარმატებას კორონავირუსთან ბრძოლის კუთხით შესაძლოა საფრთხე დაემუქროს“, - აღნიშნულია სტატიაში.

imedinews