ციტრუსის მოსავალი 2021 წელს, შარშანდელთან შედარებით, დაახლოებით 20 000 ტონით გაიზრდება. როგორც ,,კომერსანტს“ აჭარის სოფლის მეურნეობის სამინისტროდან აცნობეს, წლევანდელ სეზონზე დიდ იმედს ამყარებენ, რადგან მოსავლის რაოდენობა მეტია და ექსპორტის მიმართულებითაც მოსამზადებელი სამუშაოები აქტიურად მიმდინარეობს. აჭარის სოფლის მეურნეობის მინისტრის გიორგი სურმანიძის ინფორმაციით, საერთო ჯამში მანდარინის სუბსიდირებაზე 500 ათასი ლარის დახარჯვაა დაგეგმილი. თუმცა, სეზონის განმავლობაში ამ თანხის მოცულობა შეიძლება შეიცვალოს.

,,სეზონი პრაქტიკულად დაწყებულია. გადამამუშავებელ კომპანიებთან აქტიური კომუნიკაცია გვაქვს, რომ ჩაუბარებელი ციტრუსი არ დარჩეს. ამ მიზნით იგეგმება არასტანდარტული მანდარინის სუბსიდირება. როგორც შარშან, წელსაც 1 კგ. არასტანდარტულ მანდარინში მთავრობა 10 თეთრს გადაიხდის. 10 თეთრს გადაიხდიან საწარმოები. საერთო ჯამში მანდარინის სუბსიდირებაზე 0,5 მილიონ ლარს დავხარჯავთ. საჭიროების შემთხვევაში თანხა დაემატება. ასე მოხდა 2020 წელსაც, თავიდან ზუსტად ამდენი იყო გამოყოფილი, მაგრამ საბოლოოდ სახელმწიფოს მხრიდან გაწეულმა ხარჯმა 1,1 მილიონ ლარს მიაღწია. ჯამში 11 000 ტონაზე მეტი ციტრუსი გადავამუშავეთ. რაც შეეხება მოსავლიანობას, არსებული პროგნოზით, წელს 70 000 ტონა ციტრუსს ველოდებით, რაც წინა წლის მაჩვენებელს 20 000 ტონით აღემატება“, - ამბობს გიორგი სურმანიძე.

აჭარის სოფლის მეურნეობის მინისტრის ინფორმაციით, აგროსერვის ცენტრიდან 10 ტონა მანდარინი უკვე გავიდა ექსპორტზე.

ფერმერების ინფორმაციით, რეგიონში საადრეო ჯიშის ციტრუსის კრეფა დაახლოებით ორ კვირაში დასრულდება, ხოლო თვის ბოლოდან მასიური კრეფა დაიწყება და ნოემბრის ბოლომდე გაგრძელდება.

,,სეზონი საკმაოდ კარგად დაიწყო. მოსავალი შედარებით მეტია, არც ხარისხის მხრივ შეიმჩნევა პრობლემა. მთავარია, სეზონის ბოლომდე გაამართლოს ამინდმა და დაუბრკოლებლად შევძლოთ ციტრუსის მოსავლის ჩაბარება. სუბსიდია დიდ დახმარებას გაგვიწევს. მე პირადად 8-10 ტონამდე მოსავალს ველი. იმედია, რომ რეალიზაციის პრობლემა არ შეგვექმნება“, - ამბობს ქობულეთელი ფერმერი სოსო ბოლქვაძე ,,კომერსანტთან“ საუბარში.

შეგახსენებთ, ციტრუსი C-ვიტამინის შემცველი პროდუქტია, ამიტომაც პანდემიიდან გამომდინარე, მსოფლიო ბაზარზე ციტრუსზე მოთხოვნა მზარდია.

გარემოს დაცვისა და სოფლის მეურნეობის სამინისტროს მონაცემით, 2020 წელს საქართველოში ყველა სახის ხილის წარმოება იყო გაზრდილი, გარდა ციტრუსისა. ჯამში ქვეყანამ აწარმოა 57.1 ათასი ტონა ციტრუსი, რაც 10.8 პროცენტით ნაკლებია 2019 წლის ანალოგიურ მაჩვენებელზე.

ხილისა და ხილის გადამუშავებით მიღებული პროდუქციის ექსპორტით შარშან საქართველომ 200 მლნ დოლარის შემოსავალი მიიღო.

მარი ჩიტაია