ციტრუსის მიმართ მოთხოვნა სტაბილურია. აჭარაში ციტრუსის რეალიზაციის საკოორდინაციო შტაბში ფაქტობრივად ყველა პირობაა, რომ ფერმერებს ლოგისტიკასა და რეალიზაციაში ხელი შეუწყონ. იმის გამო, რომ ქართული ციტრუსი კარგი ხარისხით გამოირჩევა, ექსპორტზე იგი ერთ-ერთი მოთხოვნადი და კონკურენტუნარიანი ქართული პროდუქტია. ექსპორტში მოწინავე პოზიციას რუსეთის ბაზარი იკავებს, სადაც ამ დროისთვის 1,703 ტონა ციტრსუსია გასული.

როგორც ციტრუსის საკოორდინაციო შტაბის ხელმძღვანელი ირაკლი ონიანი ,,კომერსანტთან“ ამბობს, ინტენსიური კრეფა ჯერ დაწყებული არ არის, შესაბამისად, ექსპორტი მომდევნო თვეების განმავლობაში გააქტიურდება, პანდემიის მიუხედავად საფრთხე ამ მხრივ არ შექმნილა.

„აქტიური სეზონი წინ გველის, ყველა პირობაა, რომ მოსავალი გაუყიდვავი არ დაგვრჩეს. ამის იმედს იძლევა ხარისხიც, რეგიონში 30-მდე დამხარისხებელი საწარმოა, რომელიც ექსპორტისთვის ამზადებს პროდუქტს. უცხოელ პარტნიორებთან შეთანხმება მიღწეულია და ამ მხრივ არანაირი დაბრკოლება არ არის. ექპორტი ძირითადად ტრადიციულ ბაზრებზეა. გარკვეული რაოდენობა გავა ევროპაშიც.  ამ ტაპზე რუსეთი ლიდერობს, მაგრამ შეიძლება სიტუაცია შეიცვალოს. რაც არ უნდა იყოს, ციტრუსის მიმართ მოთხოვნა არ შემცირდება, პირიქით, ლოგიკურად თუ ვიმსჯელებთ, უცხოურ ბაზრებზე რეალიზაცია, ეპიდემიის გათვალისწინებით, უფრო მოიმატებს, ვიდრე ჩვეულებრივ პერიოდში იყო“, - ამბობს ირაკლი ონიანი.

შეგახსენებთ, რომ ციტრუსის სარეალიზაციო შტაბი 2021 წლის 5 ნოემბერს გაიხსნა და მუშაობას 1-ელ თებერვლამდე გააგრძელებს.

შტაბის საქმიანობის  ძირითადი მიზანია მანდარინის ჩაბარების პროცესის მართვა, შესაბამისი სამოქმედო გეგმის შემუშავება და მისი შესრულების კონტროლი. სამუშაო ჯგუფი, გარდა არასტანდარტული მანდარინის რეალიზაციისა, უწყვეტ რეჟიმში იქნება ჩართული სტანდარტული მანდარინის რეალიზაციის მიმდინარეობის პროცესებში.

წელს საექსპორტო მანდარინს 30–მდე ციტრუსის საწარმო მიიღებს.

რაც შეეხება სუბსიდიის კომპონენტს, 1კგ. არასტანდარტულ მანდარინში მთავრობა 10 თეთრს იხდის. 10 თეთრს - საწარმოები. საერთო ჯამში მანდარინის სუბსიდირებაზე 500 ათასი ლარის დახარჯვაა დაგეგმილი.

წელს აჭარაში 65-70 ათასი ტონა მანდარინის და 3.6 ათასი ტონა ხურმის მოსავალს ელოდებიან.

გარემოს დაცვისა და სოფლის მეურნეობის სამინისტროს მონაცემით, 2021 წლის 1-ლი სექტემბრიდან 21 ნოემბრამდე პერიოდში, საქართველოდან 3512 ტონა მანდარინის ექსპორტი განხორციელდა, რომლის ღირებულებამ 1.6 მლნ აშშ დოლარი შეადგინა.

აღნიშნულ პერიოდში განხორციელებული მანდარინის ექსპორტის მოცულობა 153%-ით, ხოლო ექსპორტის ღირებულება 142%-ით გაიზარდა 2020 წლის ანალოგიური პერიოდის მაჩვენებელთან შედარებით.

2021 წელს წარმოებული მანდარინის ექსპორტში რუსეთი ლიდერია (1,703 ტონა), მეორე ადგილზეა სომხეთში (1,346 ტონა); რაც შეეხება სხვა ქვეყნებს:  უკრაინაში (375 ტონა), ყაზახეთში (40 ტონა), სლოვენიასა (28 ტონა) და ყირგიზეთში (20 ტონა).

მარი ჩიტაია