„PPA მექანიზმის აღდგენაზე დიდი ხანია საუბარი მიდის, თუმცა ეს დაპირება შესრულებული არ არის, გარდა ამისა აქ საკითხავია თუ რა პირობით მოგვცემენ PPA - ს“, - ამბობს „კომერსანტთან“ Helios energy Georgia- ს დამფუძნებელი თორნიკე დარჯანია, რომელიც პრემიერის გუშინდელ განცხადებას PPA მექანიზმის (გარანტირებული შესყიდვის ხელსეკრულება) აღდგენის შესახებ გამოეხმაურა.
დარჯანიას განმარტებით თუ სახელმწიფომ PPA მექანიზმი კვლავ იმ ფორმით შემოიღო, როგორც ეს ენერგეტიკის სამინისტროს გაუქმებამდე იყო მისთვის ეს საინტერესო არ იქნება. ენერგეტიკოსების მოთხოვნაა, რომ აღდგეს ენერგეტიკული ბირჟა და ენერგიის გაყიდვა მოხდეს აუქციონის წესით.
„PPA მექანიზმი იყო მანამ, სანამ ენერგეტიკის სამინისტრო გაუქმდებოდა, მაშინ ამბობდნენ, რომ დენს ჩვენგან შეიძენდნენ რვა თვის განმავლობაში, ხოლო დანარჩენი 4 თვე - არა. საუბარი იყო მაისი, ივნისი, ივლისი, აგვისტო, ანუ მაშინ როდესაც მზე აქტიურ ფაზაშია. ახლა თუ ისევ ის პრინციპი ამოქმედება, ჩვენთვის ეს საინტერესო არ იქნება, ჩვენთვის მნიშვნელოვანია ისევ და ისევ ბაზარი, ანუ ენერგეტიკული ბირჟის დროულად ამოქმედება.
„თუ ჩვენ ვამბობთ, რომ ბაზარი უნდა იყოს თავისუფალი და ეს ბაზარი უნდა გავხსნათ, მაშინ ამ მოცემულობაში PPA შეიძლება შეუთავსებელი იყოს. PPA არ არის თავისუფალი ბაზრის ელემენტი. მთელი რიგი ქვეყნები ელექტოენერგიას აუქციონის წესით ყიდიან და ამბობენ, ვინც ყველაზე ნაკლებ ფასს შემოგვთავაზებს ერთ კვტ/სთ-ში, მისგან ვიყიდით ენერგიას“, - ამბობს თორნიკე დარჯანია.
გუშინ საქართველოს პრემიერ-მინისტრმა ირაკლი ღარიბაშვილმა პარლამენტში სიტყვით გამოსვლისას განმარტა, რომ ქვეყნის ეკონომიკური გუნდის და მთავრობის ერთ-ერთი მთავარი პრიორიტეტი ენერგეტიკის განვითარებაა და ამის შესახებ მსოფლიო სავალუტო ფონდთან მთავრობა აქტიურად მუშაობს. მისი თქმით, PPA-ს სტრუქტურის შემოღება-დაბრუნებას აპირებენ.
თაკო კვაჭანტირაძე