საქართველოს ტურიზმი, რომელიც კორონავირუსთან ბრძოლის ფრონტის წინა ხაზზე არსებული ინდუსტრიაა, მნიშვნელოვანი პრობლემების წინაშე აღმოჩნდა. ბოლო 6 დღის განმავლობაში მარტი - აპრილის თვეების ჯავშნების 80-90% გაუქმდა, რაც ნიშნავს, რომ ინდუსტრია თითქმის გაკოტრების ზღვარზეა, ამ ყველაფერს გადასახდელი საბანკო ვალდებულებებიც დაემატა.

„საქართველოს საბანკო ასოციაციის“ პრეზიდენტმა ალექსანდრე ძნელაძემ „კომერსანტთან“ საუბრისას აღნიშნა, რომ ტურიზმის ინდუსტრიასთან მოლაპარაკებები მიმდინარეობს და  საბანკო სისტემის ინტერესი არის, რომ თუ სისტემური პრობლემაა იმ სექტორთან ერთად მაქსიმალურად მოძებნოს გამოსავალი.

„ამ ეტაპზე მიმდინარეობს მოლაპარაკებები, შეხვედრა მქონდა შალვა ალავერდაშვილთან, განვიხილეთ ეს საკითხი და მაქსიმალურად ვცდილობთ, რომ მოვიპოვოთ ინფორმაცია, კონკრეტული პასუხები და კონკრეტული გამოსავალი ჯერჯერობით ნაპოვნი არ არის, შემდეგ კვირაში მოგაწვდით უფრო დეტალურ ინფორმაციას. მათ უნდათ, რომ წელს პრობლემები არ შეექმნათ, ეს არის მთავარი ამბავი, საუბარი იქნება ვალდებულებების გადავადებაზე თუ სხვა გამოსავალს ვიპოვით, ეს ჯერჯერობით არ ვიცით. საუბარი არის სასტუმროების საკმაოდ დიდ ჯგუფზე, ინდუსტრიასთან შეხვედრა მთავრობასაც აქვს და აქტიურად ვართ მოლაპარაკებებში ჩართული.

ბანკები არცერთ ეტაპზე არ გაურბოდნენ არც პრობლემებს და არც რელურ სურათს, ყოველთვის აბსოლუტურად ადეკვატურად ხდებოდა რეგირება, ნებისმიერი პრობლემის წარმოშობის შემთხვევაში საბანკო სისტემამ მაქსიმალურად აღმოუჩინა მსესხებლებს დახმარება. საბანკო სისტემის ინტერესი არის, რომ თუ სისტემური პრობლემაა იმ სექტორთან ერთად მაქსიმალურად მოძებნოს გამოსავალი, ეს მიკროდონეზე იქნებოდა თუ მთლიანად სისტემურ დონეზე საბანკო სისტემა ყოველთვის რეაგირებდა. რეალურად დღეის მდგომარეობით არ გვაქვს კონკრეტული სურათი, შიგნითაც ვმუშაობთ ამ საკითხზე, იქნება შეხვედრები მთავრობასთანაც. საკმაოდ სერიოზულ გლობალურ საკითხზე ვსაუბრობთ, რომელიც ბევრ კლიენტს ეხება, ამიტომ მალე ალბათ ვერ მოგვარდება და გრძელვადიანი პროცესი იქნება“, -  განაცხადა ალექსანდრე ძნელაძე.

„საქართველოს საბანკო ასოციაციის“ შემდეგ, საქართველოს ტურიზმის სექტორის წარმომადგენლებმა ეკონომიკისა და მდგრადი განვითარების მინისტრ ნათია თურნავასთან ერთად კორონავირუსის ფონზე არსებულ გამოწვევებსა და მათი დარეგულირების საკითხებზე იმსჯელეს.

„ტურისტული სექტორი ამ გამოწვევას უყურებს, როგორც დროებითს, რომელიც გადალახული იქნება უახლოეს 2, ან მაქსიმუმ 3 თვეში. ეს არის გლობალური ტურიზმის განწყობაც და ჩვენი ტურისტული ინდუსტრიის განწყობაც. ასევე მნიშვნელოვანია, რომ სრულიად გვერდით უდგანან ხელისუფლებას იმ ნაწილში, რაც ეხება ქვეყნის დაცვას ვირუსისგან, პრევენციულ ღონისძიებებს, თუნდაც ეს ღონისძიებები გარკვეულ შეზღუდვებს აწესებდეს. მეტიც, ტურისტული ინდუსტრია მოგვიწოდებს და ჩვენ ამაში ერთიანები ვართ, რომ ამ ნაწილში ვიყოთ მაგალითი მსოფლიოსთვის უსაფრთხოების და ეპიდემიოლოგიური უსაფრთხოების თვალსაზრისით. გარდა ამისა, ვიმსჯელეთ და მოვისმინეთ პრობლემები, რაც შეეხება დროებით ფინანსურ გამოწვევებს, რომლებიც წარმოიქმნა იმის გამო, რომ ჯავშნების ნაწილი იქნა გადადებული და ზოგი გაუქმებული“, - განაცხადა ნათია თურნავამ.

სასტუმროებისა და რესტორნების ფედერაციის დამფუძნებელი შალვა ალავერდაშვილი აცხადებს, რომ კორონავირუსის გამო ყველაზე დიდი პრობლემა სასტუმროებს შეექმნათ, განსაკუთრებით ცუდი მდგომარეობა კი თბილისშია. მისივე თქმით, ეკონომიკისა და მდგრადი განვითარების მინისტრთან შეხვედრისას მიიღეს პირობა, რომ მათ შეთავაზებებს ეკონომიკური გუნდი განიხილავს.

„ეკონომიკის მინისტრი შეგვპირდა, რომ ჩვენს ყველა შეთავაზებას გადასცემენ ეკონომიკურ გუნდს და მთავრობა ამ პრობლემებზე იმსჯელებს. შეთავაზებები გულისხმობს: 1. საქართველოს მთავრობამ მიიღოს ინდივიდუალური-სამართლებრივი აქტი, ტურიზმის სექტორში დაუძლეველი გარემოებიდან გამომდინარე ტურიზმის სფეროში დასაქმებული ორგანიზაციების, კომპანიების და სასტუმროების მხარდაჭერის მიზნით; 2. მხარდაჭერას ვითხოვთ სახელმწიფო და კომუნალური გადასახადების გარკვეული ვადით გადავადებისა და დავალიანების შემდგომ თვეებზე გადანაწილების შესახებ. ეს გადასახადებია: ქონების გადასახადი; საშემოსავლო გადასახადი და საპენსიო შენატანი; 3. ასევე, ვთხოვთ მხარდაჭერას და შუამდგომლობას ენერგოკომპანიებთან, რომლებსაც უნდა გადავუხადოთ კომუნალური გადასახადები, მათი გარკვეულ ვადამდე გადაწევისა და შემდგომ თვეებში გადანაწილების შესახებ; 4. აგრეთვე, სახელმწიფოს მხარდაჭერას საბანკო სექტორთან. კერძოდ, სახელმწიფოს შუამდგომლობა საბანკო სექტორთან, აღებული საბანკო ვალდებულებების გარკვეულ ვადამდე გადაწევისა და რესტრუქტურიზაციის მიზნით“, - განაცხადა შალვა ალავერდაშვილმა.

აღსანიშნავია, რომ ტურიზმის ინდუსტრიაში შექმნილი მძიმე სიტუაცია იანვარ-თებერვალში, მსოფლიოში სწრაფი ტემპით კორონავირუსის გავრცელების გამო განვითარებულ საფრთხეს უკავშირდება. სასტუმროების 80-90% იანვარსა და თებერვალში ფაქტობრივად დაუტვირთავი იყო. ამას დაემატა ისიც, რომ როგორც კი დაფიქსირდა საქართველოში კორონავირუსის შემთხვევები, მარტსა და აპრილში ჯავშნების 90% მოიხსნა.

ნინო თამაზაშვილი