ღვინის წარმოება, ქართული კულტურის გაცნობა თუ სხვა შემეცნებით-დასასვენებელი აქტივობები, რასაც მომხმარებელს შატოები სთავაზობენ, აქამდე უცხოელი ტურისტების მთავარი სამიზნე ლოკაციები იყო. 

ჩაკეტილი საზღვრებისა და ტურისტების დეფიციტით გამოწვეული სიცარიელის შევსებას 2020 წლის სეზონზე ადგილობრივი დამსვენებლები შეეცადნენ, თუმცა რამდენად აისახა შიდა ტურიზმი შატოების საქმიანობასა და შემოსავლებზე, ამის გარკვევას „კომერსანტი“ შუხმან ვაინს ჯორჯიაში შეეცადა. როგორც „კომერსანტთან“ საუბრისას შუხმან ვაინს ჯორჯიას გენერალურმა დირექტორმა ნუცა აბრამიშვილმა განაცხადა, პანდემია ჯერ არ დამთავრებულა და კრიზისული პერიოდი ჯერ კიდევ წინაა.

„შუხმან ჯგუფისთვის“, რომელიც სხვადასხვა მიმართულებითაა დივერსიფიცირებული, ღვინის ექსპორტი მთავარი მამოძრავებელი ძალა აღმოჩნდა. კომპანიას წარმოებული პროდუქციის 95%-ი, რომელიც წელიწადში 1.5 მლნ. ბოთლს მოიცავს, გასაყიდად ქვეყნის გარეთ გააქვს.

„ამ ეტაპისთვის, რასაც ზოგადად სექტორი ინარჩუნებს ეს არის მეღვინეობა და ღვინის ექსპორტი. გამომდინარე იქიდან, რომ ქვეყანაში ჩაკეტილობის დროსაც ღვინის წარმოების მიმართულებით არ ყოფილა არანაირი შეზღუდვა და  ქართულ ღვინოზე მოთხოვნა ნარჩუნდება, ჩვენც ვანხორციელებთ დაგეგმილ ექსპორტს, რომელიც ერთიან ჭრილში კომპანიის სტაბილურობის შენარჩუნებაში გვეხმარება. გარდა ამისა, სტაბილურობა ასევე თანამშრომლების შენარჩუნებით განისაზღვრება და მათ გაშვებას არც ვაპირებთ. შესაბამისად, ჩვენთვის ნომერ პირველი გამოსავალი არსებული სიტუაციის შენარჩუნებაა, რომელიც სამომავლოდ როგორც თანამშრომლების ასევე კომპანიის საქმიანობის კეთილდღეობაზე იქნება დამოკიდებულება“, -განმარტავს ნუცა აბრამიშვილი.

როგორც „შუხმან ჯგუფში“ განაცხადეს ტურისტული სეზონი ჯერ არ დამთავრებულა და სასტუმროში ადგილობრივი დამსვენებლების მიღებას აქტიურად განაგრძობენ. მიუხედავად ამისა, წინა წლის ანალოგიურ პერიოდთან შედარებით სტუმრების რაოდენობა ფაქტობრივად განახევრებულია.

„კახეთში ახლა რთველის პერიოდია და ეს პროცესიც ყოველგვარი სტანდარტების დაცვით, შეუფერხებლად მიმდინარეობს. ეს როგორც კომპანიის, ასევე ქვეყნის წარმოებისთვის არის ძალიან მნიშვნელოვანი. ცხადია  ქვეყანა ჩაკეტილია და ჩამოსული სტუმარი არ გვყავს, თუმცა აქ იმ კარგი ინფორმაციის თქმა შემიძლია, რომ ადგილობრივი ტურიზმი ძალიან გააქტიურდა. ჩვენმა ხალხმა საკუთარი ქვეყნის მონახულება დაიწყო და სოციალური პასუხისმგებლობის ეს ტვირთი იკისრა. შესაბამისად, არც სასტუმრო დაკეტილა და სხვადასხვა სასტუმრო მიმართულებებიც (ღვინის სპა, რესტორანი, ღვინის სადეგუსტაციო სერვისები და სხვ.) ფუნქციონირებს.

ზოგადად, მომხმარებლის ქცევა 100%-ით რადიკალურად შეიცვალა, რაც იმას ნიშნავს, რომ ქართველები აუცილებლად განაგრძობენ ჩვენივე არაჩვეულებრივი რეგიონების, კურორტების თუ სასტუმროების მონახულებას. ეს ძალიან კარგია, რადგან ეკონომიკაში არსებული თანხის ჩაბრუნება ხდება. ყოველთვის მომხრე ვარ ტრადიციული და ეროვნული პროდუქციის მოხმარების, რომელიც  როგორც საქართველოში წარმოებულ სხვადასხვა პროდუქციაზე, ასევე ქართულ სასტუმროებზე აისახება. ვფიქრობ, რომ ამ ძალიან რთულ პერიოდში ყველას ვალია შეძლებისდაგვარად  გვერდში დავუდგეთ ერთმანეთს.

ცხადია ის მონაცემები ვერ გვექნება, როგორიც გვქონდა თუნდაც გასული წლის ანალოგიურ პერიოდში და შეგვიძლია ვთქვათ, რომ სტუმართა რაოდენობა განახევრებულია. თუმცა, წლის ჭრილში 40%-იან დატვირთულობას ვინარჩუნებთ, რომელსაც ქართველი დამსვენებლები შეადგენენ. გამომდინარე იქიდან, რომ პანდემიური პროცესებია და პროდუქტებზე მოთხოვნაა დავარდნილი, ასევე, ჯერჯერობით არც უცხოელი  სტუმარი ჩამოდის ქვეყანაში, ეს ძალიან ცუდად აისახება უკვე ადგილობრივ გაყიდვებზე. შესაბამისად, ეს მიმართულებაც ფაქტიურად განახევრებულია.“ - აღნიშნავს ნუცა აბრამიშვილი.

„შუხმან ჯგუფის“ გენერალური დირექტორის თქმით, მოლოდინები პოზიტიური აქვთ თუმცა, სამუშაო პროცესების ჩვეულ რეჟიმში დაბრუნებას გარკვეული დრო სჭირდება.

„მჯერა, ყოველ რეცესიას შემდგომ მოყვება აღმავლობა. ეს აღმავლობა აუცილებლად დადგება, მაგრამ ყველაფერი დროსთანაა დაკავშირებული. როგორც ჩვენ, ასევე სექტორმა და ზოგადად ბიზნეს-საზოგადოებამ  მეტნაკლებად რისკების მართვა უნდა მოახდინოს. ამ სიტუაციას ჩვენ ვუყურებთ, როგორც ერთ-ერთ ეკონომიკურ კრიზისს, რომელიც ამ შემთხვევაში პანდემიით არის გამოწვეული და რომელიც სამწუხაროდ დაგეგმილზე უფრო გრძელვადიანია. ეს დრო უნდა მოვახმაროთ იმას, რომ შევინარჩუნოთ სტაბილურობა და არ გვქონდეს ძალიან ბევრი წითელი ციფრები და უარყოფითი ეფექტები როგორც კომპანიაში ასევე სექტორში.

გამომდინარე იქიდან, რომ ვართ ექსპორტიორი კომპანია და ძირითადად შემოსავლები უცხოურ ვალუტაში გვაქვს, კომპანია არ ზარალობს. შესაბამისად, პანდემიის პროცესში ჩვენი სასტუმროს მიმართულებით  გარკვეული ფასდაკლებები გვაქვს. ვითვალისწინებთ ქართველი მოსახლეობის მსყიდველობით უნარიანობას, რომელიც მკვეთრად განსხვავდება უცხოელი ტურისტისგან, ამიტომ ჩვენთან ფასის ცვლილება არ ყოფილა და არც ვგეგმავთ“, - განმარტავს ნუცა აბრამიშვილი.