ქვეყანაში ეპიდემიოლოგიური მდგომარეობის გართულებასთან ერთად საქართველოს მთავრობა საერთაშორისო ავიამიმოსვლის თანდათანობით გახსნას აანონსებს, მაშინ როდესაც ვირუსის გავრცელების სტაბილური დინამიკისას საზღვრების 100%-იანი ჩაკეტვის გადაწყვეტილება მიიღეს. საერთაშორისო მიმოსვლებსა და ტურიზმის სფეროში არსებულ პრობლემებზე „კომერსანტთან“ ავიაციის ექსპერტი თამუნა თანდაშვილი საუბრობს.
„ჩვენი ინფორმაციით, ევროპის ქვეყნებში ასეთი შეზღუდვა არ არის და ჩვენი რეგულაცია ზედმეტად მკაცრია. როდესაც ვირუსის გავრცელების დინამიკა არ იყო ასეთი აგრესიული - ჩაკეტილი ვიყავით და ზაფხულის პერიოდში საზღვრები არ გაიხსნა. რატომ ხსნის ახლა, როცა ევროპაშიც უფრო ცუდი სიტუაციაა ვიდრე იყო? ეს არ არის გასაგები და ლოგიკას არ ექვემდებარება.
გასაგებია, რომ ეს გადაწყვეტილებები საერთაშორისო მოლაპარაკებებით არის მიღებული, მაგრამ ბაზრისთვის დამაზიანებელი ნამდვილად არის იმიტომ, რომ ეს არა მხოლოდ საქმიანი მიმოსვლა, არამედ ჩვენი ტურიზმი ავიაციაზე დგას და აქ შეზღუდვები ტურისტული ნაკადების შემოსვლაზე პირდაპირ გავლენას ახდენს. ასევე გაუგებარია როგორ მოხვდა საქართველოში ამდენი რუსი ტურისტი, როდესაც ავიამიმოსვლა ჩაკეტილია, ანუ რასთან გვაქვს საქმე რთული ასახსნელია და ვფიქრობ, რომ სახელმწიფო ორგანოებმა მიღებული გადაწყვეტილებები კიდევ უფრო მკაფიოდ და გამჭვირვალედ უნდა ახსნან“, - განმარტავს თამუნა თანდაშვილი.
როგორც თამუნა თანდაშვილმა აღნიშნა, მთავრობის მხრიდან გარკვეულ ცდომილებებს აქვს ადგილი და ერთიანი სტრატეგია მათ არ გააჩნიათ. ასევე, ავიაციის ექსპერტის განმარტებით, საქართველოს მოქალაქეებისთვის სავალდებულო კარანტინის გავლა ყოვლად მიუღებელია.
„წითელი ზონა ვართ თუ მწვანე, ჩემს კომპეტენციას ნამდვილად სცილდება, თუმცა, როცა მწვანე ზონა ვიყავით საქართველომ ვერანაირი სარგებელი ვერ მიიღო. დაპირებისამებრ საზღვრები არ გაიხსნა. ტურიზმის ადმინისტრაციამ გამოგვიგზავნა ოფიციალური წერილი პარტნიორებისთვის, რომ პირველ რიცხვში გახსნის თაობაზე ინფორმაცია მიგვეწოდებინა, თუმცა, როდესაც ორი დღით ადრე ისევ ჩაკეტვა დაანონსდა, მთელი ინდუსტრია უხერხულ სიტუაციაში აღმოჩნდა.
ახლა რაღაც უცნაური გადაწყვეტილებებია მიღებული. ყოველთვე გამოდის ნოტამი, რომელიც გვამცნობს, რომ არაა ისევ ჩაკეტილი, ან რაღაც ცვლილებები ხდება, რაც ერთიან სტრატეგიაზე არ მიუთითებს. მესმის, როდესაც საქმე ამდენი ადამიანის ჯანმრთელობას ეხება რთულია გადაწყვეტილებების მიღება. როგორც ვხედავთ, ეს ვირუსი არსად არ მიდის და დანარჩენმა მსოფლიომ მასთან თანაცხოვრება დაიწყო. ჩვენთვის განსაკუთრებით რთული იქნება იმ ობიექტების ფინანსური კრიზისი, რომელზეც ქვეყანა დგას.
ტურიზმის ალიანსმა განცხადება გააკეთა, რომ საქართველოს მოქალაქეების კარანტინში გადაყვანის გადაწყვეტილებას არ ემხრობა და PCR ტესტებით რეგულირებისა და მწვანე სტატუსის მქონე ქვეყნებთან ფრენების აღდგენის მომხრეა. ეს არის ის მიმართულებები რაზეც ალიანსიც მუშაობს და ვფიქრობთ, რომ კოორდინირებულად მთავრობასთან ჩვენი რეკომენდაციები უბრალოდ ხმაური კი არა, არამედ რაღაც შედეგის მომტანი იქნება“, - ამბობს თამუნა თანდაშვილი.
როგორც თამუნა თანდაშვილმა „კომერსანტს“ განუცხადა ტურიზმის ანტიკრიზისულ გეგმაში ცვლილებებია შესატანი, წინააღმდეგ შემთხვევაში კი ქვეყანა მნიშვნელოვან ფინანსურ წყაროს დაკარგავს.
„რეალურად უკვე შეცვლილი რეალობა გვაქვს და ის ანტიკრიზისული გეგმა, რომელიც პირველად მაისის თვეში გამოვიდა ახალი დახმარების პაკეტების შემუშავებას საჭიროებს. გრძელ ვადაში ვხედავთ, რომ თუ ტურისტები არ შემოვლენ სასტუმროები არ გაიხსნება. თუ სასტუმროები ვერ გაიხსნება, შესაბამისად ალტერნატიული სამუშაო ადგილების დაკარგვას ექნება ადგილი. რაღაც მინიმუმი მაინც უნდა გააკეთოს მთავრობამ რომ ამდენი სამუშაო ადგილი არ დაიკარგოს. პოზიცია ასეთია, რომ მაქსიმალურად შენარჩუნდეს სამუშაო ადგილები რათა ეკონომიკურ საქმიანობაში ჩასართველად ადამიანებს მინიმალური დოვლათი ჰქონდეთ. წინააღმდეგ შემთხვევაში ყველაფრის ფასი გაიზრდება. იქიდან გამომდინარე, რომ ტურიზმიდან შემოდინებული სახსრები ქვეყნისთვის უალტერნატივო შემოსავლის წყარო იყო და წარმოებაში ჩვენ ძლიერები არ ვართ, საერთო დიდი კრიზისი გველოდება. 2 თვეში კი დიდი წარმოების ქვეყანად ვერ გადავიქცევით. დონორების დახმარება და ის ვალი, რომელსაც სახელმწიფო იღებს ჩვენთვის მნიშვნელოვანია, რომ ყველა ინდუსტრიაზე თანაბრად იყოს გადანაწილებულიყო და შერჩევითობის პრინციპით დახმარებების გაწევა არ მოხდეს“, - აღნიშანს თანდაშვილი.
ანი ცარციძე