ოქტომბრის შუა რიცხვებიდან საქართველოში ბუნებრივ პირობებში მოყვანილი პომიდვრის მიწოდება მკვეთრად მცირდება და სასათბურე პროდუქტზე მოთხოვნა იზრდება. დიდი სათბურები ახალი სეზონისთვის ემზადებიან. პანდემიამ გარკვეულწილად მათი გეგმები შეცვალა, თუმცა ისინი არ ვარაუდობენ, რომ ტომატებზე მოთხოვნა მკვეთრად შემცირდება.
ჰიდროპონიკური სასათბურე მეურნეობა „იმერეთი გრინერი“ სამტრედიაში მდებარეობს. სათბურების მთლიანი ფართია 20 000 კვ.მ. კომპანია სალათის ფურცლებს (4000 კვ.მ.) და ტომატებს (16 000) აწარმოებს. სათესლე მასალა ჰოლანდიიდან ჩამოაქვს. კომპანიაში სალათის ფურცლების წარმოება უწყვეტ რეჟიმში მიმდინარეობს, ხოლო ტომატების - სეზონურად, ნოემბრიდან ივნისის ჩათვლით.
პროდუქცია მთლიანად ადგილობრივ ბაზარზეა ორიენტირებული - პროდუქტი სუპერმარკეტებში იყიდება, ასევე სასტუმროებს და რესტორნებს მიეწოდება. 2020 წელს კომპანიამ გეგმები შეცვალა. პანდემიის დროს ჩერის ტიპის ტომატების გაყიდვა 55%-ით შემცირდა, რის გამოც ამ წელს ჩერის მოყვანა დროებით შეწყდა.
პანდემიასთან დაკავშირებული სატრანსპორტო პრობლემების გამო სათესლე მასალის შემოტანა დაგვიანდა, რის გამოც მოსავალიც დაგვიანებით აიკრიფება. სასტუმროების და რესტორნების პრობლემების გათვალისწინებით „იმერეთი გრინერი“ ძირითად აქცენტს საცალო გაყიდვებზე აკეთებს.
კომპანიის წარმომადგენლის დავით ჩხეიძეს თქმით, წარმოების თვითღირებულება ლარის კურსის დევალვაციის გამო გაიზარდა - ეს ძირითადად დაკავშირებულია იმპორტირებული მასალების გაძვირებით.
დანახარჯების ზრდამ 30% შეადგინა, თუმცა ფასები პროდუქციაზე არ შეიცვლება, შესაბამისად, კომპანიის მომგებიანობა შემცირდება.
პრობლემების მიუხედავად, კომპანია წარმოებას არ ამცირებს, რადგანა მოთხოვნის შენარჩუნებაში დარწმუნებულია.
„ადგილობრივმა მომხმარებელმა ჩვენი პროდუქტი იცის და მასზე მოთხოვნა საკმაოდ მაღალია. რაც შეეხება თურქულ იმპორტს, ჩვენ მას კონკურენტად არ მივიჩნევთ. ჩვენი პროდუქტი გაცილებით უფრო ხარისხიანია, ჩვენი მომხმარებელი კი საშუალო და მაღალი შემოსავლის მქონე ფენაა და ამ კატეგორიაში პრემიუმ-კლასის პროდუქტზე მოთხოვნა საკმაოდ მაღალია. შესაძლოა ქვეყანაში შექმნილი ეკონომიკური მდგომარეობიდან გამომდინარე, მოსახლეობის შემოსავლები შემცირდა, თუმცა, ჩვენ მიზნობრივ ფენას ეს ყველაზე ნაკლებად ეხება“ - თვლის დავით ჩხეიძე.
Georgian Agro House საქართველოში უმსხვილესი სასათბურე მეურნეობაა და ის ადგილობრივ ბაზარზე ბრენდ „პლანტა“-ს ქვეშ მუშაობს. კომპლექსი გარდაბნის რაიონში მდებარეობს, და 12 ჰექტარს იკავებს. კომპანია სხვადასხვა ბოსტნეული აწარმოებს, ძირითადად ტომატებს და კიტრს.
კომპანიის დირექტორის ლუკა სტურუას თქმით, წარმოებაზე პანდემიამ ნეგატიური გავლენა მხოლოდ დასაწყისში მოახდინა, კერძოდ რუსეთში ექსპორტს შეუშალა ხელი.
ამავე დროს ადგილობრივ ბაზარზე მოთხოვნა გაიზარდა - კორონავირუსის ეპიდემიის დროს სულ უფრო მეტი მომხმარებელი უპირატესობას შეფუთულ პროდუქტებს ანიჭებდა.
საშემოდგომო სეზონზე კომპანიას წარმოება არ შეუმცირებია და რამდენიმე დღეში გაყიდვებს იწყებს. „პლანტაში“ მოთხოვნის შემცირებას არ ელოდებიან და მიიჩნევენ, რომ მოთხოვნა სტაბილური იქნება.
იმპორტირებულ ტომატებს კონკურენტად არც „პლანტა“ მიიჩნევს - საკუთარი პროდუქციის მაღალი ხარისხის და ლოიალური მომხმარებლების ფენის არსებობს წყალობით.
2019 წელს საქართველოში წარმოებულ იქნა 62 000 ტონა პომიდორი, ხოლო იმპორტმა 14 890 ტონა შეადგინა - ეს ბოლო 4 წლის მანძილზე ყველაზე დაბალი მაჩვენებელია.
ტომატი
