„ჩვენი მთავარი ამოცანაა გადავრჩეთ, გადარჩენა კი დამოკიდებულია იმაზე თუ როდის გავიხსნებით“, - ამის შესახებ „კომერსანტს“  „სითი მოლის“ დირექტორმა ლევან მესხელმა განუცხადა. მისი თქმი, სავაჭრო ცენტრი მზადაა საქმიანობის განახლებისთვის. როგორც მესხელი განმარტავს, ბიზნესის ბედი სწორედ ეკონომიკური საქმიანობის გაგრძელების ნებართვაზეა დამოკიდებულებული. 

„ვემორჩილებით ყველა რეგულაციას, თუმცა დროა ბიზნესი ამუშავდეს და არ ჩამოიშალოს.  მთავრობის მიერ აქამდე მიღებული ყველა გადაწყვეტილება, ჯანდაცვის ორგანიზაციის გავლით,  ადამიანების უსაფრთხოებაზე ზრუნვას ემსახურებოდა, დღესაც იგივე გრძელდება, უბრალოდ ბიზნესის გაჩერების დრო აღარ არის. „სითი მოლი“ დღესაც მზადაა  გახსნისთვის, ყველა წესი დაცული გვაქვს.  პირველ ეტაპზე ჩვენი მთავარი ამოცანაა გადავრჩეთ, გადარჩენა კი დამოკიდებულია იმაზე თუ როდის გავიხსნებით“, -განაცხადა ლევან მესხელმა.

კომპანიას ამ დრომდე არ დაუთვლია ზარალი რომელიც პანდემიის გამო ბიზნესს მიადგა, თუმცა აცხადებს, რომ პანდემიამ ობიექტის ეკონომიკური მდგომარეობა საგრძნობლად დააზარალა. იგი აღნიშნავს, რომ კორონავირუსით გამოწვეული ზარალის დასათვლელად, საჭიროა იმის ცოდნა თუ როდის გაიხსნება ეკონომიკა. მიუხედავად იმისა, რომ კომპანიამ ანტიკრიზისული გეგმა შეიმუშავა, „სითი მოლის“ დირექტორი  თვლის, რომ გამოსავალი მხოლოდ ბაზრის ამოქმედებაა.

„ ამ პერიოდში საკმაოდ დიდი  ზარალი მოგვადგა. კალკულაციის ეტაპზე არ გადავსულვართ და ზუსტ რიცხვს ვერ დავაკონკრეტებ, თუმცა დიდ რიცხვზეა საუბარი.  ასეთ პერიოდში  ანტიკრიზისული გეგმის ზოგადი მონახაზი შევიმუშავეთ, მაგრამ ერთმნიშვნელოვნად გარემო პირობებზე ვართ დამოკიდებული. ბოლო ორი თვეა კომპანიას არ აქვს შემოსავალი, ხარჯის ნაწილი ისევ უცვლელი დაგვრჩა და  ჩვენი რეზერვიდან ვაფინანსებთ“,- განაცხადა ლევან მესხელმა.

„კომერსანტთან“  საუბარში მესხელმა მთავრობის ანტიკრიზისული გეგმის შეფასებისგან თავი შეიკავა თუმცა, აღნიშნა რომ მთავრობის გადაწყვეტილება და ანტიკრიზისული გეგმა ვირუსის პრევენციისკენაა მიმართული.

“მთავრობის ანტიკრიზისულ გეგმაზე,  ვერ ვისაუბრებ რადგან არც ისე ღრმად ვარ საკითხში გარკვეული და არ მინდა საკითხს არასწორად შევეხო. თუმცა ვფიქრობ, რომ  ყველა გადაწყვეტილება პრევენციას უკავშირდება. არც  მოლოდინებზე საუბარი მიმაჩნია მართებულად, რადგან მხოლოდ   გარე ფაქტორებზე ვართ დამოკიდებულები. მოლოდინი იმის მიხედვით უჩნდება ბიზნესს, თუ მიახლოებით მაინც იცის,  რა მდგომარეობა იქნება მსოფლიოში და როდემდე გაგრძელდება პანდემია“, -განაცხადა ლევან მესხელმა.

ნათია ლომიძე