სასტუმროებისა და რესტორნების ასოციაციის დამფუძნებელმა შალვა ალავერდაშვილმა ტურიზმის სექტორში პანდემიის გამო შექმნილი მდგომარეობა 2008–09 წლების პერიოდს შეადარა. მისი თქმით, არა მხოლოდ საქართველოში, არამედ მთელ მსოფლიოში ძალიან არაპროგნოზირებადი მდგომარეობაა და საქართველოში შემოსული ტურისტების რაოდენობა მიზერულია. შალვა ალავერდაშვილი სექტორის გამოცოცხლებისთვის საგადასახადო შეღავათების შემოღებას აუცილებლად მიიჩნევს. ამის შესახებ ასოციაციის დამფუძნებელმა რადიო „კომერსანტის“ გადაცემაში „კომერსანტის დილა“ ისაუბრა.
„ამ ეტაპისთვის ჩვენ საზღვარი გავუხსენით აზერბაიჯანს, მაგრამ აზერბაიჯანს ჩვენთვის საზღვარი არ გაუხსნია. გარდა ამისა, ძალიან ბევრი ევროპული ქვეყანა თავის მოსახლეობას მოუწოდებს, რომ მოგზაურობისგან თავი შეიკავონ, განსაკუთრებით ისეთ ქვეყნებში, სადაც ვაქცინაციის დონე განსაკუთრებით დაბალია. შესაბამისად, ამ ეტაპზე ტურისტების რაოდენობა ქვეყანაში ძალიან დაბალია. დღესდღეობით ჩვენთან ტურისტები შემოდიან ბელარუსიდან, უკრაინიდან და არაბული ქვეყნებიდან, რაც 2019 წლის ნიშნულთან შედარებით ზღვაში წვეთია.
რეგიონის სასტუმროების თითქმის 90% ადგილობრივ ტურისტებზე არის დამოკიდებული, რაც გვახარებს არის ის, რომ საქართველოს მოქალაქეები საქართველოში დასვენებას მიეჩვივნენ და ეს ძალიან კარგია, თუმცა ეს არ ნიშნავს იმას, რომ რეგიონალური სასტუმროები კარგად არიან, ფასები 2019 წლის ფასებთან შედარებით საგრძნობლად დაბალია, მით უმეტეს რომ ლარი გაუფასურებულია“, - აღნიშნა შალვა ალავერდაშვილმა.
ალავერდაშვილის თქმით ტურიზმის აღდგენისთვის ვაქცინაცია ძალიან აქტუალურია და მიუხედავად იმისა, რომ ქვეყანაში ძალიან ბევრი
ანტივაქსერია, აღსანიშნავია, რომ ტურიზმის სექტორის 60-70% ვაქცინაციის პროცესისთვის მზად არის.
„ვაქცინაციის პროცესი ქვეყანაში ძალიან დაბალია და ეს განსაკუთრებით ევროპული ქვეყნებიდან ტურისტების შემოდინებაზე ძალიან აისახა, ჩვენ წინ ვერ წავალთ თუ ვაქცინას არ გავიკეთებთ და ჩვენი ქვეყნისთვის ტურუსტული სექტორის აღდგენა წარმოუდგენელი იქნება, თუ ვაქცინაციის პროცენტული მაჩვენებელი ერთნიშნა ნიშნულზე დარჩება“, - განმარტა შალვა ალავერდაშვილმა.
ალავერდაშვილი ამბობს, რომ კერძო სექტორი მთელი მისი არსებობის მანძილზე საგადასახადო პოლიტიკის გამარტივებას ითხოვს და მაშინ, როდესაც ისედაც დაქცეული სექტორი ფეხზე დგება, გარკვეული შეღავათები კარგი იქნებოდა.
„სახელმწიფოსაც აქვს თავისი ვალდებულებები და სახელმწიფოსაც არ შეუძლია ასე ერთი ხელის მოსმით შეღავათების გაცემა, ეს მოლაპარაკების საგანი უნდა იყოს და ჩვენ პერმანენტულად ველაპარაკებით სახელმწიფოს წარმომადგენლებს და ამაზე მსჯელობა სულ მიმდინარეობს. სექტორი თანდათანობით ფეხზე დგება, აქამდე საერთოდ გაყინული იყო და ახლა როდესაც სექტორის წარმომადგენლების ნაწილი თავის შენახვისთვის სახსრებს გამოიმუშავებს, ყველას ჰგონია, რომ ეს ძალიან კარგია.
რაც შეეხება პერსონალს და დასაქმებულ ადამიანებს, ამ მიმართულებით თბილისში სავალალო მდგომარეობა გვაქვს, რესტორნებმა და სასტუმროებმა ერთბაშად უამრავი კადრების აყვანა გადაწყვიტეს, რადგან გამოცდილი კადრები გადაკვალიფიცირდენენ და მუშაობა სხვა სექტორში დაიწყეს, რომელთა დაბრუნებაც უკვე შეუძლებელია.
ჩვენ ვართ 2008-2009 წლის დონეზე სადაც თავიდან უნდა დავიწყოთ ინდუსტრიის აწყობა, ვერ ვიტყვით რომ სამუშაო ადგილები არ არის, ბევრი სამუშაო ადგილია, უბრალოდ ის რაც ჩვენ გვქონდა, რისთვისაც ჩვენ წლები ვმუშაობდით და ბევრი ტრენინგები გვქონდა გავლილი, იმის დაბრუნება რთულია“, - აღნიშნა შალვა ალავერდაშვილმა.
ალავერდაშვილის თქმით სასტუმროების და რესტორნების სექტორში სახელფასო ზღვარმა აიწია, თუმცა ადამიანები ტურიზმის სექტორს აღარ ენდობიან და ეშინიათ, რომ პანდემიის ახალი ტალღის შემთხვევაში კვლავ უმუშევრები დარჩებიან.
თაკო კვაჭანტირაძე