„ჩვენ მზად ვართ, რომ კიდევ 1000 თანამშრომელი ავიყვანოთ“,- ამის შესახებ „აჭარა ტექსტილის“ ფინანსურმა დირექტორმა „ბიზნესპრესნიუსს“ განუცხადა. ამ შემთხვევაში საუბარია „ქართლი ტექსტილზე“, რომელიც მიმდინარე წელს გაიხსნა და ის „აჭარა ტექსტილის“ ჯგუფის რიგით მეოთხე საწარმოა. გია ლომინაძის თქმით, კადრებზე მოთხოვნა შეკვეთების რაოდენობამ განაპირობა, რომელიც უცხოელი პარტნიორების მხრიდან სულ უფრო მზარდია.

ახალ გახსნილ საწარმოში ამ ეტაპზე 1000-მდე ადამიანია დასაქმებული. პროექტის ჯამური ღირებულება კი, 20 მილიონი ლარია.

„ჩვენ კადრებს სისტემატიურად ვიღებთ. გვინდა, რომ გავზარდოთ საწარმოს მოცულობები. ამ დროისთვის "ქართლი ტექსტილში" დასაქმებულია 1500 ადამიანი. ჩვენ მზად ვართ, რომ კიდევ 1000 თანამშრომელი ავიყვანოთ. ამის მიზეზია ჩვენი პარტნიორების, ანუ საერთაშორისო ბრენდების მხრიდან შეკვეთების გაზრდილი რაოდენობა. მიუხედავად პანდემიისა, მზარდი ტენდენცია შენარჩუნებულია.

ზოგადად, ჩვენი კომპანიის ქსელში დასაქმებული გვყავს 5000-მდე ადამიანი და პერიოდულად ყველგან ვამატებთ კადრებს“,- განაცხადა გია ლომინაძემ.

კომპანია წლების განმავლობაში ადგილობრივ ბაზარზე მოქმედ სხვადასხვა სამკერვალოსთანაც თანამშრომლობდა, თუმცა, როგორც გია ლომინაძე აცხადებს, ახლა უკვე კომპანია ყველა შეკვეთას თავად ამზადებს.

„ამ დროისთვის ჩვენ სხვა სამკერვალოებთან აღარ ვთანამშრომლობთ და ყველა შეკვეთას თავად ვამზადებთ“,- განაცხადა გია ლომინაძემ.

ცნობისთვის, ქართული ექსპორტიორი კომპანია „აჭარა ტექსტილი“ საფეიქრო მრეწველობის სფეროში 2009 წლიდანაა ჩართული და დღემდე ბათუმში, ქობულეთში, ფოთსა და რუსთავში ოთხ სამკერვალო ქარხანას აერთიანებს. კომპანია სპორტული პროდუქციის რეალიზაციას საერთაშორისო ბაზარზე ახორციელებს და ისეთ მსხვილ სპორტულ ბრენდებთან თანამშრომლობს, როგორებიცაა: Adidas, Lotto, Erima, Under Armour და სხვა.

Bpn.ge