„ძალიან გამიმართლა, რადგან გიორგი ხმალაძე ძალიან კარგი ქართველი არქიტექტორია, რომელმაც გამიკეთა ისეთი კოტეჯები, რომლებიც თან ჩანს ბუნებაში, თან არ ჩანს“, - ამის შესახებ, რადიო „კომერსანტის“ ეთერში, ლევან კობერიძის საავტორო გადაცემაში „ბრენდი საქართველო“ ველნეს კურორტ „ბიოლის“ დამფუძნებელმა თამაზ მჭედლიძემ ისაუბრა, მისი თქმით, ადამიანმა უნდა შექმნას ისეთი გარემო, რომ ბუნებასთან ჰარმონიაშია.
„შეიმალო ბუნებაში, ეს სტილისტიკაც უნდა გავაკეთოთ, ამ ეტაპზე ველნეს კოტეჯები დავარქვით, ყველა მათგანი არის მწვანე სახურავით, ყველა მხარეს იღება, რომ სივრცეები იყოს ღია, იონიზირებული ჰაერი ძალიან მნიშვნელოვანია, სადაც ვენტილაცია და კონდიციონერია, იქ იონიზაცია კვდება, ამიტომ ბუნებაშიც კი ღია სივრცეში თუ არ ხარ და დახურე, იქ იონიზაცია გითავდება, ბუნება უნდა იყოს ბუნებასთან და შერწყმული უნდა იყო“, - აღნიშნა თამაზ მჭედლიძემ
თამაზ მჭედლიძის თქმით, ბიოლის მთავარი ველნეს-ექსპერტი არის მიხეილ ქოჩიაშვილი, ექიმი, ფიტოთერაპევტი, თანამედროვე მედიცინის და ბუნების ენერგიის გამოყენების მცოდნე.
„ჩვენ სწორ ენერგიას ვიღებთ ბუნებიდან, სწორად რომ ვიკვებებით, სწორ დანამატებს, რომ ვიღებთ და ა.შ. ჩვენ დავამუშავეთ ქართული პროცედურები, ქართული მარილის პროცედურები. ჩვენ გვაქვს პროცედურები, რომლებიც უცხოელებს არ აქვთ, ჩვენ ქართულ ველნესს ვაშენებთ და ვინმემ რომ თქვას, ტაილანდურ მასაჟს გაგიკეთებთო, სასაცილო იქნება. ეს უნდა იყოს ეთნო ქართული და ამ ყველაფერს ვაკეთებთ და ამას განვავითარებთ“, - აღნიშნა თამაზ მჭედლიძემ.
კითხვაზე, რა სისტემური ნაბიჯები უნდა გადაიდგას იმისთვის, რომ რომ ქართული ველნესი გახდეს საქართველოს ბრენდკოდი და ქვეყანამ მკურნალი ქვეყნის სტატუსი შეიძინოს, თამაზ მჭედლიძე პასუხობს, რომ ამისთვის საჭიროა კანონმდებლობა და განათლებით ტირაჟირება.
„ბუნება გვაქვს, ბუნების ეკოლოგიური კანონმდებლობაც მოსაწესრიგებელია , ფოთლების და ბალახის დაწვა კატეგორიულად აკრძალულია, მძიმე მეტალები ფოთლებიდან ადის ჰაერში, თავსაც ვიწამლავთ, შვილებსაც ვწამლავთ და მთელი ბუკეტი ავადმყოფობების ფეთქდება, ამის კულტურა გვინდა და ეკოლოგიურად ცხოვრების კულტურა გვჭირდება“, - აღნიშნა თამაზ მჭედლიძემ.
თაკო კვაჭანტირაძე