გერმანიის მთავრობამ პირობა დადო, გაუთვალისწინებელი გადასახადებიდან მიღებული შემოსავალი გამოიყენოს იმისთვის, რომ დაეხმაროს მომხმარებლებს ენერგომატარებლებზე მზარდ ფასებთან გამკლავებაში მაშინ, როცა ქვეყანა თავს აღწევს რუსეთის ენერგორესურსებზე დამოკიდებულებას.
გერმანიის კანცლერმა ოლაფ შოლცმა 4 სექტემბერს განაცხადა, რომ მთავრობა 1,5 მილიარდ ევროს გამოყოფს საზოგადოებრივი ტრანსპორტის სუბსიდირებისთვის და ზოგიერთ სოციალურ შემწეობას ინფლაციის შესაბამისად გაუკეთებს კორექტირებას. მთლიანობაში პაკეტი შეადგენს 65 მილიონ ევროს ეკონომიკური მხარდაჭერის სახით, თქვა შოლცმა.
„ჩვენ გადავიტანთ ამ ზამთარს,“ განაცხადა შოლცმა და დასძინა, რომ გერმანიას საკმარისი ენერგორესურსები მოეპოვება, რათა გაძლოს მომავალ წლამდე - მათ შორისაა ბუნებრივი აირის საცავები და ნახშირზე მომუშავე ელექტროსადგურების კვლავ ამუშავება.
ევროპის უმსხვილესი ეკონომიკა ებრძვის COVID-19-ით გამოწვეული პრობლემების შედეგებს, ასევე ახალ ინფლაციურ ზეწოლას სურსათსა და ენერგიაზე, რაც უკრაინაში რუსეთის შეჭრასთან და მიმდინარე ომთანაა დაკავშირებული.
2 სექტემბერს რუსეთის სახელმწიფო კომპანია „გაზპრომმა“ განაცხადა, რომ პორტოვაიაში საკომპრესორო სადგურის ტურბინებში ზეთის გაჟონვის გამო გაურკვეველი ვადით წყვეტს ბუნებრივი გაზის მიწოდებას გაზსადენ „ჩრდილოეთის ნაკადი 1“-ით.
გერმანიის ფედერალურმა მარეგულირებელმა უწყებამ და სამრეწველო გიგანტმა Siemens Energy-მ, რომელიც აწარმოებს პორტოვაიის ტექნიკური აღჭურვილობის მომსახურებას, ეჭვქვეშ დააყენეს „გაზპრომის“ განცხადება და თქვეს, რომ არსებობს საკმარისი სარეზერვო სისტემები საიმისოდ, რომ უზრუნველყოფილი იყოს გაზის მიწოდება მიუხედავად ზეთის გაჟონვისა.
გაზის მიწოდების შეწყვეტამ გააჩინა შიშები, რომ რუსეთი გაზსადენს ხანგრძლივი პერიოდის განმავლობაში გააჩერებს გათიშულ მდგომარეობაში, რათა ზეწოლა განახორციელოს დასავლეთის ქვეყნებზე და დაარღვიოს მათი ერთობა უკრაინაში ომის გამო რუსეთის წინააღმდეგ დაწესებული სანქციების საკითხში.
წყარო: radiotavisupleba.ge