მსოფლიო პანდემიით გამოწვეული კრიზისული მდგომარეობა სათამაშო ბიზნესისთვის კრიტიკული აღმოჩნდა.
იმ დროს, როცა ბიზნეს გარკვეული სექტორები თანდათანობით აღდგა და მუშაობის ჩვეულ რეჟიმს დაუბრუნდა, დაწესებულება, სადაც სტუმრების ძირითად ნაწილს ტურისტები შეადგენდნენ ამ დრომდე უფუნქციოდაა.
სხვადასხვა მიღებული მითითებებისა და რეგულაციებისა, სამორინეების გახსნის თარიღი ჯერ კიდევ უცნობია.
როგორც „კომერსანტს“ სამორინე „შანგრი ლა თბილისის“ ფიდი დირექტორმა (Playing Development director) ჯონ ჰარაკმა განუცხადა, არსებული ბიზნეს სექტორი, რომელიც ყოველთვის ცუდ კონტექსტში განიხილება, ქართული ეკონომიკისთვის ერთ-ერთი უმნიშვნელოვანესი რგოლია.
„ჩვენ 7 თვეა დაკეტილები ვართ. შესაბამისად შემოსავალი კი არ შემცირდა, უბრალოდ საერთოდ არ გვაქვს. ძალიან მნიშვნელოვანია იმის გააზრება, თუ რა გავლენა აქვს კაზინოს ინდუსტრიას ქვეყნის ტურიზმზე. მთელი რიგი შუა აღმოსავლეთის ქვეყნების ფრენებისა - თურქეთი, ისრაელი და ჩვენი სხვა მეზობლი ქვეყნები, მთლიანად კავშირშია სათამაშო სექტორთან. ამ სტუმრებს აქვთ უზარმაზარი გავლენა ყველა სხვა ტურისტულ სექტორზე, მათ შორის სასტუმროებზე, რესტორნებზე, ქვეყნის საცალო და შიდა ტურიზმზე. საქართველოს მოქალაქეებისთვის მარტივია ცუდად მოიხსენიონ ეს ინდუსტრია, თუმცა მას აქვს უაღრესად პოზიტიური გავლენა ეკონომიკაზე. „ - აცხადებს ჯონ ჰარაკი
ჯონ ჰარაკის თქმით, ტურისტული ნაკადების გარეშე კაზინოების გახსნა შეულძლებელია. შესაბამისად, ქვეყანაში შექმნილი ფორსმაჟორული სიტუაციიდან გამომდინარე აღნიშნული ბიზნესი გაჩერებულია. მიუხედავად ამისა, მიღებული რეკომენდაციების გათვალისწინებით კაზინო „შანგრი ლა თბილისი“ გახსნის მზადყოფნას გამოთქვამს.
„რა თქმა უნდა, გლობალური პანდემიის გამო, რომელმაც თითოეული ჩვენგანის ცხოვრებაზე გალენა მოახდინა, მომავალი გაურკვეველია. ჩვენ ველოდებით, რომ გავიხსნათ და გვქონდეს ისევ თავისუფალი მიმოსვლა.ძველი მდგომარეობის დასაბრუნებლად ეს ძალიან რთული და ნელი პროცესი იქნება. მზად ვართ მუშაობის გაგრძელებისთვის, თუმცა სახელმწიფო ინსტიტუტებთან დიალოგი გვჭირდება, რომ გავიგოთ გარემოებები, რა პირობებშიც მოგვიწევს მუშაობის განახლება. რადგან ბევრი ფინანსური ვალდებულება გვაქვს, რასაც ჩვენ წინასწარ ვიხდით, ეს დრო უნდა იყოს გამოყენებული ისე, რომ ვიმუშაოთ და შევძლოთ გადასახადების მომდევნო ნაკადის გადახდა. ეს საუკეთესო შესაძლებლობაა ბიზნესის გადასარჩენად,რომ საქართველოს ყველა ტურისტულ ასპექტში უდიდესი წვლილის შეტანა განვაგრძოთ.“ - განმარტავს ჯონ ჰარაკი
გამომდინარე იქიდან, რომ მთელ მსოფლიოში სიტუაცია ყოველდღიურად იცვლება, „შანგრი ლა თბილისი“ ქართული ბაზრის დატოვებას არ განიხილავს და საქმიანობის დროულად აღდგენას იმედოვნებს.
„ჩვენ 10 წელია, რაც საქართველოში ვფუნქციონირებთ და ძალიან ბედნიერები ვართ. ეს არის მშვენიერი ადგილი, როგორც სამუშაოდ, ასევე საცხოვრებლად. ჩვენ არ ვაპირებთ ქართული ბაზრის დატოვებას და გვიხარია, რომ ასეთი წვლილი შეგვაქვს ქვეყნის ეკონომიკაში. სანამ სწორ პირობებში გახსნის შესაძლებლობა გვეძლევა, ქართული ბაზრის დატოვების მიზეზი არ გვაქვს. ყოველთვის ვითვალისწინებდით ჩვენი ბიზნესის პასუხისმგებლობას და ამაყები ვართ ჩვენი მიღწევებით. ასევე, ყველაფერი გავაკეთეთ სამუშაო ძალის შესანარჩუნებლად, რომელსაც ძირითადად ადგილობრივი მოქალაქეები შეადგენენ.“ - აღნიშნავს ჯონ ჰარაკი
როგორც „შანგრი ლა თბილისის“ ფიდი დირექტორი აცხადებს საქართველო მსოფლიო გამოწვევას მაქსიმალური ძალებით ებრძვის და ამ რთული პერიოდის საქართველოში გატარებით მოხარულია.
„ნათელია, რომ არსებულ სიტუაციასთან გასამკლავებლად, ყველა ქვეყანა თავის მაქსიმუმს აკეთებს. ზოგი უფრო ეფექტური აღმოჩნდა, ვიდრე სხვები. მე ვხედავ, რომ საქართველომ ძალიან ბევრი იმუშავა ამ მდგომარეობასთან საბრძოლველად. დასაწყისშივე რომ არ ყოფილიყო ის მკაცრი შეზღუდვები, ჩვენ აუცილებლად ჩავვარდებოდით მეზობელი ქვეყნების მდგომარეობაში ინფიცირებულებისა და გარდაცვლილების დიდი მაჩვენებლით. რა თქმა უნდა, ფაქტტია, რომ ყველა ქვეყანაში მეორე ტალღა დაიწყო და ამ გარემოებაში ეკონომიკისა და ბიზნესის გადასარჩენად გადაწყვეტილებების მიღება ძალიან რთულია. მხოლოდ მას შემდეგ შევძლებთ ამ ყველაფრის ანალიზსა და კრიტიკას, თუ რომელმა სახელმწიფომ მიიღო სწორი გადაწყვეტილება და რომელმა არა, როცა პანდემია მორჩება. მე მოხარული ვარ, რომ ჩემს ოჯახთან ერთად ამ რთულ პერიოდს საქართველოში გავდივარ.„ - აცხადებს ჯონ ჰარაკი
შეგახსენებთ, რომ „შანგრი ლა თბილისი“, რომელიც უკვე 10 წელია ქართულ ბაზარზე ფუნქციონირებს, იმ საერთაშორისო ქსელში შედის, რომელიც ასევე მინსკში, რიგასა და ერევანშია წარმოდგენილი.
ანი ცარციძე