რუსული „გაზპრომის“ ხელმძღვანელმა ალეკსეი მილერმა პარასკევს, 10 სექტემბერს დილით განაცხადა, რომ მოსკოვის დროით 8:45 საათზე გაზსადენის „ჩრდილოეთის ნაკადი–2“ მშენებლობა დასრულდა. ამის შესახებ კომპანიის Telegram-არხზეა ნათქვამი.
მანამდე, 6 სექტემბერს გაზსადენის ოპერატორმა კომპანიამ Nord Stream 2 AG განაცხადა, რომ ბალტიის ზღვაში უკანასკნელი მილი შეადუღეს.
სააგენტო Bloomberg წყაროებზე დაყრდნობით 8 სექტემბერს წერდა, რომ რუსული გაზსადენით საწვავის გადატვირთვა 1–ელ ოქტომბერს დაიწყება.
ამასთან, ხუთშაბათის, 9 სექტემბრის ვაჭრობებზე ევროპაში ბუნებრივი გაზის ფასმა მორიგი ისტორიული რეკორდი დაამყარა და 1000 კბ/მ–ის ღირებულებამ $700–ს მიაღწია. ანალიტიკოსები ამ ფაქტს ევროპის საცავებში გაზის მარაგების სიმცირეს უკავშირებენ.
აშშ–ის კომპრომისი და კიევის პროტესტი
ივლისის შუა რიცხვებში აშშ–ის პრეზიდენტმა ჯო ბაიდენმა და გერმანიის კანცლერმა ანგელა მერკელმა ვაშინგტონში გამართული მოლაპარაკებების შემდეგ აღიარეს ამ რუსული პროექტის მიმართ აზრთა სხვადასხვაობა. თუმცა, 21 ივლისს ლიდერებმა დაალაგეს კონფლიქტი და გაზსადენთან მიმართებაში შეთანხმდნენ: აშშ არ დაუწესებს სანქციებს Nord Stream 2 AG–ს და მის ხელმძღვანელობას, გერმანია კი უკრაინას ეკონომიკის განვითარებაში დაეხმარება. ასევე, ლიდერები შეთანხმდნენ, რომ თუ რუსეთი შეწყვეტს უკრაინის გავლით ტრანზიტს, მის წინააღმდეგ რამეს მოიმოქმედებენ, თუმცა რას – არ დაუკონკრეტებიათ.
სასამართლო დავები
25 აგვისტოს ცნობილი გახდა, რომ Nord Stream 2 AG–მ გერმანიაში სასამართლო პროცესი წააგო, რომელზეც ის „ჩრდილოეთის ნაკადი–2“–ის ევროკავშირის გაზის დირექტივისგან განთავისუფლებას ითხოვდა.
დირექტივის თანახმად, დაუშვებელია ერთი და იგივე კომპანია იყოს ევროკავშირში გაზის მიმწოდებელიც და ახორციელებდეს ტრანსპორტირებას. ამდენად, „გაზპრომს“ ევროპის ტერიტორიაზე გაზსადენის მხოლოდ ნახევარი სიმძლავრის გამოყენება შეეძლება და დანარჩენ ადგილს ევროპულ მწარმოებლებს დაუთმობს.
„ჩრდილოეთის ნაკადი–2“ ორი გაზსადენი მილისგან შედგება, რომელიც რუსეთიდან ბალტიის ზღვის ფსკერის გავლით გერმანიის გაზგამანაწილებელ სისტემას უერთდება. გაზსადენის საპროექტო სიმძლავრეა წელიწადში 55 მლრდ კბ/მ ცისფერი საწვავის გატარება.