„კორონავიურსსაც მოვერევით, მაგრამ გვექნება სრული გაჩერება ეკონომიკაში თუ სასწრაფოდ არ მივიღეთ ზომები. ფინანსური საკრედიტო პოლიტიკის გაჯანსაღების გარეშე ვერაფერი ვერ წაიწევს წინ. ამ სიტუაციაში ჭკვიანი ფინანსთა მინისტრის და ჭკვიანი ბანკის მმართველის აქტიური მოქმედებაა საჭირო.“ - კომპანია „კავკასუს როუდ პროჯექტის“ ხელმძღვანელი პაატა ტრაპაიძე სამშენებლო სექტორისთვის კორონავირუსისა და შესაბამისად, ლარის კურსით გამოწვეულ სიძნელეებზე საუბრობს.
როგორც ტრაპაიძე აღნიშნავს, კომპანიებს მასალების შესყიდვა მაღალი კურსით უწევთ, მომწოდებლების დიდი ნაწილი კი თანხების წინასწარ გადახდას ითხოვს. მისივე თქმით, სექტორი დიდ სიძნელეებს აწყდება და პროექტების განხორციელება საკრედიტო პოლიტიკის დარეგულირების გარეშე შეუძლებელია.
„როცა მსოფლიოს და ჩვენს სახელმწიფოს უჭირს, ჩვენი მხრიდან წუწუნის დაწყება აბსურდია, მაგრამ გაუსაძლისია ის ფინანსური მდგომარეობა რაც ახლა არსებობს.
რკინა და სხვა სამშენებლო მასალები სამწუხაროდ დოლარშია ნომინირებული. ხალხს მუშაობა უნდა და არ ეშინია, მაგრამ ლარის და დოლარის კურსს ვერაფერს ვერ ვუზამთ, ეს ჩვენს ძალებს აღემატება. ამიტომ, ქვეყანამ უნდა შექმნას თავისი სავალუტო ბალიში, წინააღმდეგ შემთხვევაში ყველაფერი გაჩერდება. დღეს მთავარი პრობლემა არის ქეში, ჩვენ ქეშს ვიღებთ ბანკებიდან ან შესრულებული სამუშაოდან, მაგრამ ეს ყველაფერი უნდა გადავიყვანოთ ვალუტაში და ვიყიდოთ რაც გვჭირდება დოლარებში. რკინის, არმატურის ფასი კვოტირდება დოლარში, დიდი რაოდენობით რკინა გვაქვს საყიდელი და დიდი რაოდენობით სამუშაოებს ვასრულებთ. რა ვქნათ? ყველას ვუთხრათ რომ ლარში გადაიყვანოს ყველაფერი? - ეს ჩვენს პრეროგატივაში არ შედის. მაშინ უნდა გვითხრან, რომ ვერ აკავებენ ლარს. ყველა კონტრაქტი, რომელიც მოგებული გვაქვს იყო მაშინ, როცა დოლარის კურსი 2,81-დან 2,85- ამდე იყო. თუ მე კონტრაქტი აღებული მაქვს ამ კურსით, ამ ლარის კურსის ფონზე უკვე 15 პროცენტით გაძვირდა ჩვენი პროექტები. არ ვლაპარაკობთ არავითარ მოგებაზე, საიდან მოვიტანოთ ეს ფული, რომ დავფაროთ ხარჯები.
სამშენებლო მასალების მომწოდებლები წინასწარ ითხოვენ გადახდას და ეს კიდევ უფრო ართულებს საქმეს. ყველას ეშინია და გასაგებიცაა ასეთ კრიტიკულ სიტუაციაში. ვიცი, რომ ძალიან უჭირს ქვეყანას, რადგან უზარმაზარი შემოდინებები გაჩერდა, ცალკე ტურიზმი და ცალკე გადმორიცხვები შეგვიჩერდა. მაგრამ ანალოგიური მდგომარეობა იყო 2008 წელს და გამოვძვერით. ის ნაბიჯები უნდა გადაიდგას ახლაც, რომ ავიღოთ დამატებითი სავალუტო კრედიტები.“ - აღნიშნა პაატა ტრაპაიძემ.
მარიამ მორგოშია