დღეიდან ჩინეთში ბიტკოინით და სხვა კრიპტოვალუტით განხორციელებული ყველა ფინანსური ოპერაცია უკანონოა. ამის შესახებ "ბიბისი" წერს. გამოცემა ჩინეთის სახალხო ბანკზე დაყრდნობით იუწყება, რომ ვინც კრიპტოვალუტით ფინანსურ ოპერაციას განახორციელებს, სისხლის სამართლის პასუხისმგებლობა დაეკისრება.

ჩინეთის სახალხო ბანკმა (ცენტრალური ბანკი) შესაბამისი დადგენილება 24 სექტემბერს გამოსცა. ამასთან, აიკრძალა ციფრული აქტივების გაყიდვა და ოპერაციები კრიპტოვალუტით.

ჩინეთის ცენტრალური ბანკის განცახდების შემდეგ, ბიტკოინი ერთბაშად $3 000 გაუფაურდა და კრიპტპვალუტის ღირებულებამ $42,5 ათასი შეადგინა.

ცნობისთვის, გადახდის საშუალებად ბიტკოინის გამოყენება, რიგ პრობლემებს უკავშირდება, რომელთაგან მთავარი ისაა, რომ ყველაზე პოპულარული ციფრული ვალუტის ფასი, დიდი რყევებით გამოირჩევა. მისი ფასი ხშირად იცვლის მიმართულებას და ფართო დიაპაზონში მერყეობს.  მიუხედავად არასტაბილურობისა, ჩინეთისგან განსხვავებით, ვირტუალურ ფულს ნდობას უცხადებენ ამერიკაში. ორი კვირის წინ კინთეატრების ამერიკულმა ქსელმა „AMC ინტერტაინმენტმა“ კინთეატრების ბილეთების ბიტკოინსა და სხვა ციფრულ ვალუტებში გაყიდვა დააანონსა. კინოთეატრის მენეჯმენტის განმარტებით, ციფრული ვალუტებით გადახდა, მხოლოდ ონლაინ შესყიდვების შემთხვევაში იქნება შესაძლებელი. 

თუ მანამდე კრიპტოვალუტა უკრაინაში ე.წ. ნაცრისფერ სამართლებრივ ზონაში არსებობდა, სექტემბრის დასაწყისში უკრაინა მეხუთე ქვეყანა გახდა, რომელმაც კრიპტოვალუტის ლეგალიზების კანონი მიიღო. უკრაინის პარლამენტმა თითქმის ერთხმად მიიღო კანონი, რომელიც კრიპტოვალუტას აკანონებს და არეგულირებს. აქამდე უკრაინის მოსახლეობას  ვირტუალური ვალუტის შეძენისა და გადაცვლის უფლება ჰქონდა, მაგრამ კრიპტოვალუტის კომპანიები და ბირჟები სამართალდამცავი ორგანოების მუდმივი დაკვირვების ობიექტები იყვნენ. ბიტკოინის ეროვნულ კანონმდებლობაში შეტანით უკრაინა იმ ქვეყნების სიას შეუერთდა, როგოროცაა: სალვადორი, კუბა, აშშ, გერმანია და პანამა.  

მიმდინარე წლის მაისი-აგვისტოში პირველად, ციფრული ვალუტების მსოფლიო ბაზრის მოცულობა 2 ტრილიონ დოლარს ასცდა.  სწორედ გასულ თვეში ანალიტიკოსებმა ივარაუდეს,  რომ ბიტკოინი შესაძლოა, მალე 55 ათასიან ნიშნულზე ავიდეს, თუმცა შემდეგ ისევ 30 ათასზე ჩამოვა. სპეციალისტები 2022 წლისთვის ციფრული ბაზრის  100 ათას დოლარამდე გაზრდას პროგნოზირებენ.

ავტორი: ბელა გელაშვილი

წყარო: BBC