ჩინეთში ძალაში ხელოვნების მოღვაწეებისთვის ე.წ. „მორალური კოდექსი“ შევიდა. ახალი წესები მსახიობებისთვის, მუსიკოსებისთვის, მოცეკვავეებისთვის, ოპერის მომღერლებისთვის, ცირკის აკრობატებისთვის და ხელოვნებასთან დაკავშირებული სხვა პროფესიიის ადამიანებისთვის „თვითდისციპლინის ზომებს“ წარმოადგენენ.
ჯერ კიდევ 2014 წელს ჩინეთის კომპარტიის ყრილობაზე ქვეყნის მეთაურმა სი ძინ პინმა განაცხადა, რომ „ხელოვნება ხალხს და სოციალიზმს უნდა ემსახურებოდეს“. ამის შემდეგ 7 წელი გავიდა და ჩინეთის ლიდერის სიტყვიერმა მოწოდებამ კანონის ძალა მიიღო. ის სავალდებულოა ყველასთვის, ვინც სცენაზე გამოდის ან გამოსვლას გეგმავს.
7 წელი ცოტა არაა, თუმცა, კანონი ძალიან დროულად იქნა მიღებული. სადღეისოდ, ჩინელ პოპ-შემსრულებლებს, მსახიობებს და შემოქმედებითი ელიტის სხვა წარმომადგენლებს სოციალურ ქსელებში ასობით მილიონი ხელმომწერი ჰყავთ.
კუმირებს თვალს მათი თაყვანისმცემლები ადევნებენ, ისინი ახალგაზრდებში ქცევის წესებს აყალიბებენ და ამ ფონზე უცნაური იქნებოდა, ამაზე კომპარტიის იდეოლოგიურ აპარატს ყურადღება რომ არ მიექცია.
ჩინეთის შემოქმედებით ელიტა ხელისუფლების ნებას ყოველთვის ითვალისწინებდა, 2017 წელს მუსიკოსებმა ასობით სიმღერა „თავჯდომარე სის ახალ კურსს“ მიუძღვნეს, 2019 წელს აქტიურად ახდენდნენ ე.წ. „სოციალური კრედიტის“ პროგრამის რეკლამირებას.
რამდენიმე სიმღერა სტრატეგიულ ინიციატივა „სარტყელი და გზა“-საც კი შეეხებოდა.
თუმცა, ეს საკმარისი არ აღმოჩნდა, ოფიციალური პეკინი ხელოვნებას როგორც „რბილ ძალას“ აფასებს და შესაბამისად, კონტროლსაც ამკაცრებს. მუსიკის და კინოს ვარსკლავები, რომლებიც ასობით მილიონი ჩინელის კუმირები არიან, საკუთარი მაგალითით სახელმწიფოს უნდა ემსახურონ.
„თვითდისციპლინა“ გულისხმობს, რომ: შემოქმედებით ელიტას სამშობლო უნდა უყვარდეს, პარტიის პოლიტიკას მხარს უჭერდეს, სახელმწიფოს მიერ ორგანიზებულ ღონისძიებებში მონაწილეობა უნდა მიიღოს და რა მთავარია, პასუხისმგებლიანი, ოჯახური ცხოვრების მაგალითი უნდა იყოს.
ასევე კოდექსი აკრძალვებს დიდი ჩამონათვალს შეიცავს. შემოქმედებითი ადამიანებისთვის დაუშვებელია, ეროვნული ერთიანობის, სუვერენიტეტის, და ტერიტორიული მთლიანობის ეჭვქვეშ დაყენება, ეთნიკური და რელიგიური შუღლის გაღვივება, სხვადასხვა ჯგუფებისადმი სიძულვილის პროპაგანდა, რელიგიის საკითხებში ეროვნული პოლიტიკის უარყოფა და სექტების პროპაგანდა.
ასევე მათთვის კატეგორიულად აკრძალულია პორნოგრაფიაში მონაწილეობა, აზარტული თამაშები, ნარკოტიკები, კრიმინალში ჩართულობა.
აკრძალვების შორისაა გამოსვლის დრო ფონოგრამის გამოყენება, აფიშაზე წინასწარი შეტყობინების გარეშე.
„თვითდისციპლინის წესების“ დარღვევა საკმაოდ მკაცრად ისჯება, გამოსვლების აკრძალვა 1-დან 5 წლამდე. დარღვევის სიმძიმის მიხედვით. უკიდურეს შემთხვევებში შესაძლებელია შემსრულებლის სცენიდან სამუდამო განდევნაც.
haqqin.az
მოამზადა თენგიზ აბლოთიამ