იანვარ-თებერვალში გასული წლის ანალოგიურ პერიოდთან შედარებით ექსპორტი 54.5%-ით $760 მლნ-მდე, იმპორტი 47.2%-ით $1.782 მლრდ-მდე, მთლიანი ბრუნვა კი 49.3%-ით $2.542 მლრდ-მდე გაიზარდა. ექსპორტშ იპირველი ადგილი ჩინეთმა, იმპორტში კი თურქეთმა დაიკავა. რადგან რუსეთ-უკრაინის ომი 24 თებერვალს დაიწყო, სტატისტიკაში მისი გავლენა ჯერჯერობით მინიმალურია და სურათის შეცვლა მარტიდანაა მოსალოდნელი.

მიიღე ინფორმაცია უფრო სწრაფად ჩვენს Telegram-ზე.

წლის პირველ ორ თვეში 77%-იანი ზრდის შემდეგ ჩინეთში ექსპორტი $95 მლნ-მდე გაიზარდა და პირველი ადგილი დაიკავა. 36%-იანი ზრდის შემდეგ რუსეთში ექსპორტის მოცულობამ $93 მლნ-ს მიაღწია. 39%-ით $93 მლნ-მდე გაიზარდა ექსპორტი აზერბაიჯანშიც. 19%-იანი ზრდის შემდეგ ექსპორტმა უკრაინაში $48 მლნ-ს მიაღწია და მეექვსე ადგილი დაიკავა.

TOP 10 საექსპორტო პარტნიორიდან ათივეში პოზიტიური დინამიკა ფიქსირდება, მათ შორის სამნიშნა პროცენტული ზრდა აღინიშნა: ბულგარეთში 131%-ით $84 მლნ-მდე, შეერთებულ შტატებში 147%-ით $42 მლნ-მდე და პერუში 939%-ით $18 მლნ-მდე.

რაც შეეხება საექსპორტო პროდუქციას, პირველ ადგილზე $156 მლნ-ით სპილენძის მადნებია, ზრდა გასული წლის ანალოგიურ პერიოდთან შედარებით 65%, ორ თვეში 93%-ით $100 მლნ-მდე გაიზარდა ფეროშენადნობის ექსპორტიც, მსუბუქი ავტომობილების ექსპორტმა კი 45%-იანი ზრდის შემდეგ $45 მლნ-ს მიაღწია.