11 თვეში საგარეო ვაჭრობის ბრუნვა 14.6%-ით $10.202 მლრდ-მდე შემცირდა, რაც გასული წლის ანალოგიურ პერიოდთან შეადარებით $1.489 მლრდ-ით ნაკლებია. ინფორმაციას საქსტატი ავრცელებს.

იანვარ ნოემბერში ექსპორტი 11.3%-ით $3.402 მლრდ-დან $3.016 მლრდ-მდე შემცირდა. ტოპ 10 საექსპორტო პარტნიორიდან კლება 7 სახელმწიფოში აღინიშნება.

ჩინეთი გამონაკლისი აღმოჩნდა, სადაც პანდემიისა და გლობალური ეკონომიკური კრიზისის პირობებში ექსპორტი 131%-ით $193 მლნ-დან - $446 მლნ-მდე გაიზარდა, რამაც საერთო ჯამში ექსპორტის ვარდნის ტემპი მნიშვნელოვნად შეამცირა. ჩინეთთან ნულოვანი ზრდის პირობებში ექსპორტი არა 11.3, არამედ 18.8 პროცენტით იქნებოდა შემცირებული. თუ გასულ წელს ჩინეთი ექსპორტით მე-6 ადგილზე იმყოფებოდა და 5.7%-იანი წილი ეკავა, წელს მან 14.8%-იანი წილით პირველ ადგილზე გადმოინაცვლა. ასეთ ზრდაში ლომის წილი სპილენძის მადნებსა და კონცენტრატებს მიუძღვით. 2019 წლის იანვარ-ნოემბერში ჩინეთში ექსპორტზე $148 მლნ-ის სპილენძი გავიდა, წელს - $370 მლნ-ის. ძვირფასი ლითონების ექსპორტი კი $1 მმლნ-დან 36 მლნ-მდე გაიზარდა. რაც შეეხება ღვინოს ის პირიქით, $17 მლნ-დან $12 მლნ-მდე შემცირდა. თავად სპილენძის მადნები რეექსპორტს წარმოადგენს, 9.3%-იანი კლების მიუხედავად $494 მლნ-ით იმპორტში მსუბუქი ავტომობილების შემდეგ მეორე ადგილს იკავებს.

ჩინეთთან თავისუფალი ვაჭრობის ხელშეკრულება 2018 წლის 1-ელ იანვარს ამოქმედდა, რამაც ჩინეთში ქართული ექსპორტი გააიაფა, თუმცა პირველი 2 წელი მნიშვნელოვანი ზრდა არ დაფიქსირებულა.

ჩინეთისგან განხვავებით 11.7%-ით $400 მლნ-მდე შემცირდა ექსპორტი სომხეთში, რუსეთში კიდევ უფრო მეტით 12.7%-ით, $396 მლნ-მდე, ხოლო უკრაინაში 16.9%-ით $190 მლნ-მდე, თუმცა ყველაზე დიდი - 56%-იანი ვარდნა სომხეთში დაფიქსირდა, სადაც ექსპორტის მოცულობა $371 მლნ-დან $164 მლნ-მდე შემცირდა.

ჩინეთის გარდა ექსპორტის ზრდა დაფიქსირდა ასევე ბულგარეთში + 10.3% - $283 მლნ-მდე, შვეიცარიაში + 26% - $94 მლნ-მცდე და ესპანეთში + 86% - $83 მლნ-მდე.

გიორგი ელიზბარაშვილი