პეკინში ე.წ. „ორი სესიის“ - სახალხო წარმომადგენელთა კრების და პოლიტიკური საკონსულტაციო საბჭოს ყოველწლიური სხდომა დასრულდა.
ამ ღონისძიებების დროს ჩინეთის კომპარტიამ ახალი სტრატეგიული გეგმა დაამტკიცა, რომელიც 2025 წლის ჩათვლით ქვეყნის მთავრობის მთავარ პრიორიტეტებს განსაზღვრავს.
ამჯერად, გეგმის თანახმად 2021-2025 წლებში საფუძველი ორი ძირითადი გრძელვადიანი მიზნის რეალიზებას უნდა ჩაეყაროს - 2025 წლისთვის მშპ-ს გაორმაგებას და მაღალი შემოსავლების მქონე ქვეყნის სტატუსის მიღწევას.
ჩინეთის კომპარტიის მთავარი მოვლენა რთულ პირობებში ჩატარდა, თუმცა, პეკინს თავის მოწონებისთვის ბევრი მიზეზი აქვს - პირველი რიგში ის, რომ პანდემიის და საყოველთაო ვარდნის პერიოდში ჩინეთი ერთად-ერთი ქვეყანა იქნება, რომლის ეკონომიკა, მინიმალურად, 2,3%-ით, მაგრამ მაინც გაიზარდა.
მეორე ისაა, რომ სესიების ჩატარებამდე მცირე ხნით ადრე ჩინეთის მთავრობამ 2021 წლის იანვარში დაწყებული კორონავირუსის მეორე ტალღა სწრაფად და ეფექტურად შეაჩერა. ეს ადვილი ამოცანა არ იყო, განსაკუთრებით მაშინ, როდესაც თებერვალში ჩინეთში ქვეყნის მთავარი დღესასწაული, მთვარის კალენდარით ახალი წელი აღინიშნება.
სტრატეგიაში საუბარია არა მხოლოდ შორს მიმავალ, არამედ უახლოეს გეგმებზეც. კერძოდ, 2021 წელს ეკონომიკური ზრდის სამიზნე მაჩვენებელი „6%-ზე მეტად“ არის განსაზღვრული, რაც რთული არ იქნება, იმის გათვალისწინებით, რომ საერთაშორისო სავალუტო ფონდის პროგნოზით, ეს მაჩვენებელი 8%-ს მიაღწევს.
გეგმის თანახმად, უახლოეს წლებში უმუშევრობა 5,5%-ზე დაბალი იქნება და მხოლოდ 2021 წელს 9 მლნ. სამუშაო ადგილი შეიქმნება.
სტრატეგიაში ასევე ახალი პრიორიტეტი გაჩნდა, ქალაქების მოსახლეობის ზრდა დღევანდელი 60%-დან 65%-მდე. პრაქტიკული თვალსაზრისით, ეს ნიშნავს, რომ 5 წლის მანძილზე ყოველწლიურად 10 მლნ. ჩინელი სოფლებიდან ქალაქებში უნდა გადასახლდეს.
ეს სერიოზულ ადმინისტრაციული სირთულეებთანაა დაკავშირებული. ჩინეთში ჩაწერის ინსტიტუტი მოქმედებს, რომელიც სოფლის მოსახლეობის უფლებებს ქალაქებში მკვეთრად ზღუდავს. მათ დახურული აქვთ წვდომა სამედიცინო, საგანმანათლებლო და სხვა სახელმწიფო მომსახურეობასთან, შესაბამისად, სოფლელების დიდი ნაწილი ქალაქებში არალეგალურად ცხოვრობს. კომპარტია ამ წესის გადახედვასაც აპირებს, დღეს არსებული ზღვარი ქალაქის და სოფლის მოსახლეობის სტატუსს და უფლებებს შორის წაიშლება.
მე-14-ე ხუთწლედის კიდევ ერთი პრიორიტეტია ინოვაციების განვითარება. კომპარტია მაღალ ტექნოლოგიებში სახელმწიფო ინვესტიციების წელიწადში 7%-ით გაზრდას გეგმავს - ეს მშპ-ს 2,2% იქნება. შედარებისთვის აშშ-ს სახელმწიფო ინვესტიციები ამ სექტორში მშპ-ს 2,7%, ხოლო სამხრეთ კორეაში, 4,5%-ს შეადგენს.
ოფიციალური პეკინის გათვლებით ქვეყნის მშპ-ში ციფრული ეკონომიკის წვლილი 2025 წლისთვის დღევანდელი 7,8%-დან 10%-მდე გაიზრდება.
განსაკუთრებით დიდი ყურადღება მიკროჩიპების და ნახევარგამტარების წარმოებას მიექცევა. ამ დარგებში ჩინეთი თითქმის მთლიანად დამოკიდებულია შტატებზე. ადრე ჩინელებისთვის ეს პრობლემას არ წარმოადგენდა, მაგრამ დღეს, როდესაც ურთიერთობები ამერიკასთან გაუარესდა, დამოკიდებულება ამ საკითხისადმი შეიცვალა.
მაღალი ტექნოლოგიების განვითარება ჩინეთისთვის პრინციპული საკითხია. ჯო ბაიდენმა განაცხადა, რომ აშშ-ს მსოფლიო ლიდერობის აღდგენას გეგმავს, ეს კი შტატებს და ჩინეთს შორის IT-სექტორში კონკურენციის გამკაცრებას ნიშნავს.
ბრძოლა ძალიან სერიოზული და დაუნდობელი იქნება. ამერიკა მაღალ ტექნოლოგიებში უპირობო ლიდერობას კარგავს და ამ დარგში ჩინეთის სწრაფი ზრდის შეჩერება ადვილი არ იქნება. ჩინეთი ცდილობს მაღალ ტექნოლოგიებში ლიდერის პოზიციის დაკავებას, რაც, დღევანდელ ციფრული ეპოქის ფონზე, ფაქტიურად, მსოფლიო ლიდერობის ტოლფასია.
ამიტომაც პეკინის ახალი გეგმა ვაშინგტონში, როგორც ამერიკის გლობალური ლიდერობისთვის მთავარ გამოწვევად ფასდება.
haqqin.az