ჩინეთმა ბოლო წლების მანძილზე კოსმოსურ კვლევებში ხარისხობრივი გარღვევა მოახდინა - მთვარეზე და მარსზე თვითმავალი აპარატები გაგზავნა და დედამიწის ორბიტაზე საკუთარი სადგურის მშენებლობა დაიწყო.

ჩინეთმა უკვე გაუსწრო რუსეთს და კოსმოსში შტატების შემდეგ მეორეა, თუმცა, პეკინი ამ დარგში გლობალური ლიდერობისთვის აქტიურად იბრძვის.

ერთ-ერთი ასეთი მიმართულებაა მთვარის შესწავლა.

ამ მიმართულებით საქმიანობა ჩინელებმა 15 წლის წინ დაიწყეს, მაგრამ პეკინის მიერ დაგეგმილი 4 ეტაპიდან 3 უკვე გავლილია - პირველი ფაზა (2007-2012 წლები) დედამიწის თანამგზავრზე კოსმოსური აპარატების გაგზავნა, მეორე  - მთვარის ბნელ მხარეზე რობოტის დასმა, მესამე კი მთვარის ირგვლივ გადაფრენას გულისხმობდა.

პროგრამის მეოთხე ფაზა 2023 წელს დაიწყება და მის ფარგლებში მთვარის სამხრეთ პოლუსზე რობოტიზირებული სადგურის შექმნა იგეგმება.

მთელი ამ გრძელვადიანი გეგმის საბოლოო მიზანია მთვარეზე ადამიანის გაგზავნა და თანამგზავრზე სრულფასოვანი, ადამიანების მიერ დასახლებული ბაზის დაარსება.

ამბიციური გეგმები პეკინს ასევე მარსთან დაკავშირებითაც გააჩნია - 2020 წელს ჩინელებმა  წითელ პლანეტაზე ზონდი და თვითმავალი აპარატი დასვეს. ჩინეთი გახდა ამერიკის შემდეგ მეორე ქვეყანა, რომელიც მარსზე აპარატის რბილი დაშვება და ამავე დროს ამის გაკეთება პირველივე ცდაზე მოახერხა.

ჩინეთმა პირველი ასტრონავტი კოსმოსში 2003 წელს გაუშვა და ამ კუთხით, მსოფლიოში მესამე ქვეყანა გახდა, რომელსაც პილოტირებადი ფრენების რეალიზება შეუძლია.

ამ დროისთვის ჩინეთის კოსმოსური პროგრამის ყველაზე მნიშვნელოვანი მიღწევა სულ მალე საკუთარი კოსმოსური სადგური გახდება, რომლის ბაზირება დედამიწის ორბიტაზე 2021 წელს დაიწყო, და 2023 წელს დასრულდება.

სადგურზე მუდმივ რეჟიმში 3 ასტრონავტი იცხოვრებს.

ჩინური სადგური საერთაშორისო კოსმოსურ სადგურთან შედარებით უფრო მოკრძალებული და ნაკლებად მასშტაბურია, თუმცა, ის ახალი და გაცილებით უფრო თანამედროვეა. თუ გავითვალისწინებთ საერთაშორისო კოსმოსური სადგურის გარდაუვალ მოძველებას, და ამერიკელების სურვილის დაბრუნდნენ მთვარეზე, სავარაუდოდ, კონკურენცია კოსმოსურ ზესახელმწიფოებს შორის დედამიწის ორბიტას გასცდება.

პეკინი ასევე აქტიურად მუშაობს მრავალჯარედი კოსმოსური ტექნოლოგიების დარგში. ამ მიმართულებით დღეს უპირობო ლიდერი ვაშინგტონია, თუმცა პეკინი ამერიკის გასწრებას აქტიურად ცდილობს.

მაგალითად, ჩინელები უკვე მუშაობენ ამერიკული SpaceX Falcon 9-ს ანალოგის შექმნაზე, ასევე მათ უკვე გამოსცადეს ამერიკული ორბიტალური აპარატის X-37B Orbital Test Vehicle-ის ანალოგი.

თუმცა, ბრძოლა ლიდერობისთვის მარტივი არ იქნება  - შთამბეჭდავი მიღწევების და ამბიციურ გეგმების მიუხედავად, კოსმოსურ ინდუსტრიაში გამოყოფილი სახსრების კუთხით ჩინეთი შტატებს მაინც ჩამორჩება.

ასევე ჩინეთი ვერ დაეწია ამერიკას, ევროკავშირს და რუსეთს მძიმეწონიანი, მძლავრი სარაკეტო ძრავების შექმნაში.

თუმცა, ყველას უნდა გვახსოვდეს - ეს ჩინეთია, რომელსაც საკუთარი გეგმების აჩქარების გარეშე და თანამიმდევრული რეალიზება ახასიათებს და ეს სხვა ტექნოლოგიებთან ერთად, კოსმოსის ინდუსტრიასაც შეეხება.

lenta.ru